ރާއްޖެ ޢުމްރާނީ ތަރައްޤީގެ ގޮތުން ބިނާކުރާ ފަދައިން، ފިކުރާ ސިކުނޑީގެ ގޮތުން ބިނާކުރަން ބޭނުން: ރައީސް މުޢިއްޒު

ދިވެހިރާއްޖެ ގެދޮރާއި އުމްރާނީ ތަރައްޤީގެ ގޮތުން ބިނާކުރާ ފަދައިން، ފިކުރާ ސިކުނޑީގެ ގޮތުން ބިނާކުރަން ބޭނުންކަމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވެއްޖެއެވެ. 

ރައީސް މުއިއްޒު މިހެން ވިދާޅުވީ ރާއްޖެ އިސްލާމްވީ ދުވަހުގެ މުނާސަބަތުގައި ބޭއްވި ޖަލްސާގައި ވާހަކަފުޅު ދައްކަވަމުން ދިވެހި މުދައްރިސުންނާއި މުޚާތަބު ކުރައްވައި ވާހަކަފުޅުދައްކަވަމުންނެވެ. 

“އިންސާނިއްޔަތާއި އަޚްލާޤާއި މާނަވީ ހަރުދަނާކަން އަދުގެ ޖީލުތަކުގައި އަށަގަންނަވަން ބޭނުން، މި ކަމުގައި ތިޔަ ހުރިހައި މުދައްރިސުންގެ އެއްބާރުލުން ނިހާޔަތަށް ބޭނުން، ދިވެހި ދަރީން ދިވެހި ޤައުމިއްޔަތަށް އަހުލުވެރިކޮށްދެއެްވާ، ދިވެހީންގެ ހަރުދަނާ މާތް ސިފަތަކުން ޒީނަތްތެރިކޮށްދެއްވާ، މަސައްކަތްތެރިކަމާއި އުފެއްދުންތެރިކަމާ، މަސްއޫލިއްޔަތު އުފުލުމުގެ ޝައުޤާއި ޤާބިލުކަން އަށަގަންނަވާދެއްވާ” ރައީސް މުއިއްޒު ދިވެހި މުދައްރިސުންނާއި މުޚާތަބު ކުރައްވައި ވިދާޅުވިއެވެ.

ރައީސް މުއިއްޒު ވިދާޅުވީ މިކަމުގައި ލޮބުވެތި ދިވެހި ހުރިހައި ރައްޔިތުންގެ އެއްބާރުލެއްވުން ވަރަށް ބޮޑަށް ބޭނުންވާ ކަމަށާއި،އެކަމަށް ޓަކައި އާރާސްތުކުރަން ޖެހޭ އަޚްލާޤީ އެތައް ބިނާއެއް އެބަ ހުރި ކަމަށް ރައީސް ވިދާޅުވިއެވެ.

އެންމެން އެކަތިގަނޑެއްގެ ގޮތުގައި އެއްރޫހެއްގައި ގަދައަޅާ އަޅުގަނޑުމެންގެ ހާލަތު ބަދަލުކުރުމަށް މަސައްކަތް ފެށުމަށް ރައީސް ގޮވައިލެއްވިއެވެ.

“މިއަދުގެ ޖީލަކީ ޖެންޒީ، އަންނާން އޮތީ އަލްފާ، ޖެންޒީގެ ވިސްނުންތައް، ތަޖުރިބާތައް އޭގެ ކުރީގެ ޖީލުތަކާ އިންތިހާޔަށް ތަފާތު، ވިސްނާގޮތާއި ފިކުރުކުރާ ގޮތްތައް ވެސް ތަފާތު، ދުނިޔެއަށް އަލަށް އައި ޓެކްނޯލޮޖީއާއި އެކި ކަހަލަ ކުރިއެރުންތައް އިންސާނީ މުޖުތަމަޢުތަކުގެ އަޚްލާޤަށް ބޮޑެތި ބަދަލުތަކެއް ގެނެސްފި، އޭގެ ތެރޭގައި އިސްތިޢުމާރީ ޙަރަކާތްތަކުގެ ދައުރު ވެސް ކުޑައެއް ނޫން، އަދި ދުނިޔޭގައި ހިނގާ ސިޔާސީ އިޤްތިޞާދީ އެކި އޮއިވަރުތަކުގެ ރޯލުވެސް ވަރަށް ފުޅާ، މި ބަދަލުތަކުގެ ތެރޭން ޖެންޒީއަކީ ކޮންޕިއުޓަރުގެ ޖީލު، ގޭމުތަކުގެ ޖީލު، ތަޢުލީމު ލިބިފައިވާ ފަލްސަފާގެ ސަބަބުން އަމިއްލަ މިނިވަންކަމަށް އިންތިހާއަށް ބޭނުންވާ ޖީލު، ލުއި އަވަސް ގޮތްތައް ފަހިވި ޖީލު” ކުރިއަށް އަންނަން އޮތް ޖީލު ސިފަކުރައްވަމުން ރައީސް މުއިއްޒު ވިދާޅުވިއެވެ.

މިއަދުގެ ޒުވާނުން ބާރުވެރިކުރުވަން މަސައްކަތްކުރަމުން ދާ އިރު، މިހިރީ ވިސްނާލަން ޖެހޭ ކަންކަން ކަމަށް ރައީސް ވިދާޅުވިއެވެ. އަދި މިއަދުގެ ޒުވާނުން ޤައުމާއި މުޖުތަމަޢުގައި ބާރުވެރިކުރުމަށް ޓަކައި މިޒުވާން ޖީލުގެ ވިސްނުމާއި ގުޅުވާލެވޭނެ ގޮތަކަށް އިސްލާމްދީނާއި ދިވެހީންގެ އަސްލުވަންތަކަން ރަނގަޅު މާނައިގައި ފަހުމުވާ ބަޔަކަށް އެޒުވާނުން ހަދަންޖެހޭ ކަމަށްވެސް ރައީސް ވިދާޅުވިއެވެ.

“އިސްލާމީ ޝަޚްޞިއްޔަތާއި ދިވެހި ޤައުމިއްޔަތަކީ ދިރިއުޅުމުގެ ބަޔަކަށް ހަދަން ޖެހޭ، ވަކި ޖިންސަކަށް ވީތީ ފަރަގުނުކޮށް ތިމަންނާއަކީ ވެސް މި ޤައުމާ އެއްކޮޅަށް ބަސްބުނާން، މި ޤައުމުގެ ތަރައްޤީއަށް ޓަކައި ދާ އޮހޮރުވާން ހުރި ޒުވާނެއްކަން ހިތުގެ އަޑިން ޤަބޫލުކޮށް ކަމަރު ބަންނަ ޒުވާނަކަށް ހެދުމުގެ ޤައުމީ، ދީނީ މަސައްކަތް ކުރަން އެބަ ޖެހޭ، އަދި މި ޖީލުގެ ކިބައިގައި ހުރި އިތުރަށް ފަރުވާ ބޭނުންވާކަންކަމަށް އަވަސް ހައްލެއް ގެންނަންޖެހޭ. ޚާއްޞަކޮށް އަޚްލާޤީ ރޫޙާނީ ދުޅަހެޔޮކަން އިތުރުކުރަން ޖެހޭ” ރަޢީސް ޑރ މުއިއްޒު ވިދާޅުވިއެވެ.

މިއަދުގެ ޖަލްސާގައި ރައީސް މުޢިއްޒު ވަނީ 28 ޙަފިޡަކަށް ޙާފިޡުކަމުގެ ސަނަދުވެސް އަރުވައިފައެވެ.