ކަނޑުމަތީގައި ނުރައްކާތެރިކޮށް ލޯންޗު ދުއްވި މައްސަލަ ފުލުހުން ބަލަނީ!

ކަނޑުމަތީގައި ނުރައްކާތެރިކޮށް ލޯންޗު ދުއްވި މައްސަލަ ފުލުހުން ބަލަމުންދާކަމަށް ފުލުހުން ބުނެފިއެވެ. 

ފުލުހުން މިމައްސަލަ ތަހުޤީޤުކުރަން ފަށާފައިވަނީ ރަށެއްގެ ފަޅުތެރެއަށް ނުރައްކާތެރިގޮތަކަށް 3 ލޯންޗެއް ދުއްވާފައި ވަންނަ ވީޑިއޯއެއް ސޯޝަލް މީޑިއާގައި ދައުރުވާން ފެށުމާއެކުއެވެ. މި ވިޑީއޯއާއި ގުޅިގެން ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ.

މިމައްސަލަ ފުލުހުން ތަހުޤީޤުކުރަން ފަށާފައިވާއިރު، މިމައްސަލައާއި ގުޅިގެން އެއްވެސް މީހަކު މިހާތަނަށް ހައްޔަރުކޮށްފައެއްނުވެއެވެ.

 ނަމަވެސް ސޯޝަލް މީޑިއާގައި ދައުރުވާ ވީޑިއޯގައި ފެންނަ ލޯންޗުތަކަކީ މިދިޔަ އޯގަސްޓް މަހުގެ 13 ވަނަ ދުވަހު އއ. އަތޮޅަށް ދަތުރު ކުރި ލޯންޗުތަކެއް ކަމަށް ފުލުހުން ބުނެފައިވެއެވެ.މިފަދަ ކަންކަމަކީ ކަނޑުމަތީގެ ނުރައްކާތެރި ހާދިސާތައް ހިނގުމަށް މެދުވެރިވެދާނެ ފަދަ ސަބަބެކެވެ. މިފަދަ ކަންކަމުން ރައްކާތެރިވުމަކީ އެންމެންގެ ސަލާމަތާއި ރައްކާތެރިކަމަށް އެޅޭނެ ފިޔަވަޅެކެވެ.