ކުރިއަށް އޮތް ފަސްދުވަހު މޫސުމަށް ސަމާލުވުމަށް އިލްތިމާސް ކޮށްފި!

ރާއްޖެ ސަރަހައްދުގައި ހުޅަނގު މޫސުމުގެ ބާރުގަދަވެފައިވާތީ ކުރިއަށްއޮތް ފަސްދުވަހު ރާއްޖެއަށް މޫސުން ގޯސްވާނެ ކަމަށް ލަފާކޮށް މޫސުމަށް ސަމާލުވުމަށް މެޓް އޮފީހުން އިލްތިމާސްކޮށްފިއެވެ. 

މެޓް އޮފީހުން މިކަމާ ގުޅިގެން ނެރެފައިވާ ބަޔާނެއްގައި ބުނެފައިވަނީ ރާއްޖޭގެ ސަރަހައްދުގައި ހުޅަނގު މޫސުމުގެ ބާރުގަދަވެފައިވާ ކަމަށާއި، އެކަމާ ގުޅިގެން ކުރިއަށް އޮތް ފަސްދުވަހު އުތުރާ މެދު ރާއްޖެތެރޭގެ ސަރަހައްދުގައި އާއްމުވައި ގަޑިއަކު 15 މޭލާއި 25 މޭލު ބާރުމިނުގައި އަދި ދެކުނުގެ ސަރަހައްދުގައި 13 މޭލާއި 23 މޭލު ބާރުމިނުގައި ވައިޖެހޭނެ ކަމަށެވެ.

އަދި ވިލާގަނޑުގައި ގާތްގަނޑަކަށް ގަޑިއަކު 45 މޭލާއި 55 މޭލަށް ވައިގަދަވެގެން ދިޔުން އެކަށީގެންވާ ކަމަށްވެސް ބުނެފައިވެއެވެ. އެހެންކަމުން ރާއްޖޭގެ ހުރިހާ އަތޮޅެއްގެ ކަނޑު ގަދަވާނެ ކަމަށް މެޓް އޮފީހުން ވަނީ ބުނެފައެވެ. 

މީގެއިތުރުން ގަދަވަޔާއެކު ބޯކޮށް ވާރޭވެހި ގުގުރާނެ ކަަމަށް ބެލެވޭކަމަށާއި، ދިޔަވަރު ބޮޑުވާ ގަޑިތަކުގައި އުދައިގެ އަސަރުކުރުމަކީ އެކަށީގެންވާ ކަމެއް ކަމަށްވެސް މެޓް އޮފީހުން ބުނެއެވެ. 

“ގަދަވަޔާއެކު ކަނޑުތައް ގަދަވެ، ބޯކޮށް ވާރޭވެހޭނެކަމަށް ލަފާކުރެވޭތީ ހުރިހާ ފަރާތްތަކުން މޫސުމަށް ސަމާލުވުމަށް އިލްތިމާސް ކުރަން، އަދި ކަނޑުދަތުރުކުރަށްވާ ފަރާތްތަކުން، ދަތުރުތަކަށް ފެއްޓޭވުމުގެ ކުރިން އެންމެ ފަހުގެ މޫސުމީ މަޢުލޫމާތު ހޯދުމަށް ދަންނަވަން” މެޓް އޮފީހުން ބުނެފައިވެއެވެ. 

https://twitter.com/MetMaldives/status/1842804582852002186

މި ނޯޓިސްގެ އިތުރުން މިއަދުގެ 11:00 އިން 15:00 އަށް ހއ.އަތޮޅުން ފެށިގެން ލ.އަތޮޅަށް ރީނދޫ ސަމާލުވެސް ނެރެފައިވެއެވެ.