އެމިރޭޓްސް އެއަރލައިނުން ސީ-ޓު-އެއަރގެ ޚިދުމަތާއި ގުޅިއްޖެ!

އެމިރޭޓްސް އެއަރލައިނުން ސީ-ޓު-އެއަރގެ ޚިދުމަތާއި ގުޅިއްޖެއެވެ. 

މި ޚިދުމަތަކީ މޯލްޑިވްސް ޕޯޓްސް ލިމިޓެޑް، މޯލްޑިވްސް ސްޓޭޓް ޝިޕިން، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އަދި ބައިނަލްއަޤްވާމީ އެއަރލައިންތަކާ ގުޅިގެން ފަށާފައިވާ ޚިދުމަތެކެވެ.

އެގޮތުން މިހާތަނަށް ޓާކިޝް އެއަރލައިން އަދި ޤަތަރު އެއަރލައިނުންވަނީ މި ޚިދުމަތްތާއި ގުޅިފައިވެއެވެ.

އެމްއޭސީއެލުން ބުނެފައިވަނީ އެމިރޭޓްސް އެއަރލައިނުން ވަނީ 12 ޔުނިޓް ލޯޑު ޑިވައިސް، ޔޫ.އެލް.ޑީގެ މުދާ ފޮނުވާފައެވެ. މިއީ ބަންގްލަދޭޝުން ކަނޑުމަގުން ރާއްޖެއަށް އައިސްފައިވާ މުދާ ކަމަށާއި، މި މުދާ އެމިރޭޓްސް އެއަރލައިންގައި ފޮނުވާފައިވަނީ އިޓަލީގެ މިލާންއަށް ކަމަށް އެމްއޭސީއެލުން ބުނެއެވެ. އެމިރޭޓްސްއިން ރާއްޖެއަށް ދަތުރުތައް ބާއްވަނީ ދުބާއީއާއި ރާއްޖެއާ ދެމެދުއެވެ. މި ދަތުރުތަކާއެކު ޔޫރަޕްގެ ގިނަ ޤައުމުތަކާއި ރާއްޖެއާ ދަނީ ގުޅުވާލަމުންނެވެ.

މި އަހަރުގެ މާޗުމަހު އެމް.ޕީ.އެލުން ތަޢާރަފްކުރި ސީ-ޓު-އެއަރ ޓްރާންސްޝިޕްމަންޓް ކާގޯގެ ޚިދުމަތުގެ ފުރަތަމަ ޝިޕްމަންޓް ރާއްޖެއިން ފޮނުވީ މި އަހަރުގެ މެއިމަހުގެ ތެރޭގައެވެ. ފުރަތަމަ ޝިޕްމަންޓަކީ ބަންގްލަދޭޝްއިން ރާއްޖެއަށް ކަނޑުމަގުން ގެނައި ގާމެންޓް ޝިޕްމަންޓެކެވެ. ރާއްޖެއިން ޓާކިޝް އެއާލައިންސް މެދުވެރިކޮށް މި ޝިޕްމަންޓް ވައިގެ މަގުން ފޮނުވާލީ ޖަރުމަންވިލާތަށެވެ.

ސީ-ޓު-އެއަރ ކާގޯ ޚިދުމަތަކީ ވައިގެ މަގު އަދި ކަނޑު މަގު ބޭނުންކޮށްގެން، މުދާ އެއްތަނުން އަނެއް ތަނަށް ފޯރުކޮށްދިނުމަށް ތަޢާރަފްކުރާ ފަސޭހަ އަދި އަވަސް ޚިދުމަތެކެވެ.