ބޯކޮށް ވާރޭ ވެހި ފެންބޮޑުވެދާނެތީ، ރައްކާތެރިވުމަށް އެންޑީއެމްއޭ އިން އިލްތިމާސްކޮށްފި!

މިއަދުން ފެށިގެން ރާއްޖޭގެ މޫސުން ގޯސްވެ ބޯކޮށް ވާރޭވެހޭނެކަމަށް ލަފާކޮށްފައިވާތީ ފެންބޮޑުވުމުގެ ހާދިސާއެއް ހިނގައިފާނެތީ ރައްކާތެރިކަމުގެ ފިޔަވަޅު އެޅުމަށް ނޭޝަނަލް ޑިޒާސްޓަަރ މެނޭޖްމަންޓް އޮތޯރިޓީ އިން އިލްތިމާސްކޮށްފިއެވެ. 

އެންޑީއެމްއޭ އިން ނެރުނު ބަޔާނެއްގައި ބުނެފައިވަނީ މިއަދުން ފެށިގެން ރާއްޖޭގެ ސަރަހައްދުގައި ހުޅަނގު މޫސުމުގެ ބާރުގަދަވެފައިވާތީ، ކުރިއަށް އޮތް ފަސްދުވަހު އުތުރާއި މެދުރާއްޖެތެރޭގެ ސަރަހައްދުގައި އާއްމުވައި ގަޑިއަކު 15 މޭލާއި 25 މޭލު ބާރުމިނުގައި އަދި ދެކުނުގެ ސަރަހައްދުގައި 13 މޭލާއި 23 މޭލު ބާރުމިނުގައި ވައިޖެހޭނެ ކަމަށެވެ.

އަދި ވިލާގަނޑުގައި ގާތްގަނޑަކަށް ގަޑިއަކު 45 މޭލާއި 55 މޭލަށް ވައިގަދަވެގެން ދިޔުން އެކަށީގެންވާ ކަމަށްވެސް ބުނެފައިވެއެވެ. އެހެންކަމުން ރާއްޖޭގެ ހުރިހާ އަތޮޅެއްގެ ކަނޑު ގަދަވާނެ ކަމަށް ލަފާކޮށްފައިވާކަމަށެވެ.

މޫސުން ގޯސްވެފައިވާތީ އާންމު ރައްޔިތުންގެ މުދަލަށާއި ގެދޮރަށް ލިބިދާނެ ގެއްލުމަކުން ރައްކާތެރިވުމަށް ދުރާލާ މަސައްކަތް ކުރުމަށް އިލްތީމާސް ކުރާކަމަށް އެންޑީއެމްއޭ އިން ބުނެއެވެ. 

އެގޮތުން ރައްކާތެރިވުމުގެ ގޮތުން ވާރޭވެހި ފެންބޮޑުވެދާނެ ކަމަށް ތައްޔާރުވުމަށް އިލްތިމާސް ކޮށްފައިވެއެވެ. މީގެއިތުރުން ގެއަށް ފެން ނުވަންނާނެހެން ރައްކާތެރިކަމުގެ ފިޔަވަޅު އެޅުމަށާއި، ގޭގެއަށް ފެންވަދެއްޖެނަމަ ގެއްލުންވެދާނެ ފަދަ މުދާ ފެންނުޖެހޭނެ ފަދަ ރައްކާތެރި ތަނަކަށް ބަދަލުކުރުމަށް އިލްތިމާސްކޮށްފައިވެއެވެ. 

މީގެއިތުރުން ގަދަވައިގެ ސަބަބުން ފުރާޅު އެއްލައިލާފާނެ ކަމަށް ބެލެވޭނަމަ ކުރިޔާލާ ވައު ފަދަ އެއްޗަކުން ފުރާޅު އެެއްލާނުލާނެ ފަދަ ގޮތަކަށް ހެދުމާއި، ގަދަވައިގެ ސަބަބުން އެއްލާލައިފާނެ ތަކެތި ބަނދެފައި ބެހެއްޓުމަށް އިލްތިމާސްކޮށްފައިވެއެވެ. 

ކަނޑު ދަތުރު ކުރާ ފަރާތްތަކުން މޫސުމަށް ސަމާލުވުމަށާއި، ދަތުރަށް ފެށުުމުގެ ކުރިން އެންމެ ފަހުގެ މޫސުމީ އެންމެ ފަހުގެ މަޢުލޫމާތު ބެލުމާއި ދަތުރަށް ފެށުމުގެ ކުރިން މުވާސަލާތީ ވަޞީލަތްތައް ހަމައަށް ހުރިތޯ ބެލުމަށް އެންޑީއެމްއޭ އިން އެދިފައިވެއެވެ.