އެފްއޭއެމް ޚިޔާނާތުގެ މައްސަލަ: އެޕާޓްމެންޓްތައް ހަވާލުކުރަންދިން މުއްދަތު އިތުރުކޮށްދިނުމަށް ބައްސާމް އެދެފި!

ފުޓްބޯޅަ އެސޯސިއޭޝަން އޮފް މޯލްޑިވްސް އެސޯސިއޭޝަންގެ ޚިޔާނަތުގެ މައްސަލާގައި އެއެސޯސިއޭޝަންގެ ކުރީގެ ރައީސް ބައްސާމް ޢަދީލް ޖަލީލްގެ މައްޗަށް އެނާގެ މިލްކިއްޔާތުގައިވާ އެޕާޓްމެންޓްތައް ފުލުހުންނާއި ހަވާލުކުރުމަށް ދިން މުއްދަތު އިތުރުކޮށްދިނުމަށް ބައްސާމުގެ ފަރާތުން އެދެފިއެވެ. 

ބައްސާމުގެ މައްޗަށް ކޯޓުން އަމުރުކޮށްފައިވަނީ އޭނާ އަމީން އެވެނިއު އިން ގަނެފައިވާ ދެ އެޕާޓްމެންގެ މި އޮކްޓޫބަރ މަހުގެ 6 ވަނަ ދުވަހުގެ ކުރިން ފުލުހުންނާއި ހަވާލުކުރުމަށެވެ. މިއަމުރު އެނާގެ މައްޗަށް ނެރެފައިވަނީ ސެޕްޓެމްބަރު 24 2024 ގައެވެ. 

ނަމަވެސް ބައްސާމުގެ ވަކީލު ވަނީ މިމުއްދަތު 31 އޮކްޓޫބަރ 2024 އަށް އިތުރުކޮށްދިނުން އެދި ސިޓީ އެއް ފޮނުވައިފައެވެ. 

މިމައްސަލައާއި ގުޅިގެން ފުލުހުން ބުނެފައިވަނީ ބައްސާމުގެ މި ސިޓީއަށް ޖަވާބެއް ދިނުމަށް މަސައްކަތް ކުރަމުންދާ ކަމަަށެވެ. 

މިމައްސަލައާއި ގުޅިގެން މީގެ ކުރިން ފުލުހުން ބުނެފައިވަނީ 

 ކޮވިޑްގެ ހާލަތުގައި ފީފާ މެދުވެރިކޮށް އެފްއޭއެމުން ނެގި ލޯނުގެ ފައިސާއިން އޭރު އެފްއޭއެމްގެ ރައީސް ކަމުގައި ހުރި ބައްސާމް, ހުޅުމާލޭގައި ހުންނަ އަމީން އެވެނިއު އިން 2 އެޕާޓްމަންޓް ގަނެފައިވާ ކަމަށެވެ. 

އެގޮތުން އެކަމަށް އެފްއޭއެމްގެ 3 މިލިއަނަށްވުރެ ގިނަ ރުފިޔާ ހަރަދުކޮށްފައިވާ ކަމަށް ފުލުހުން ބުނެފައިވެއެވެ. އަދި މި ފައިސާ އަކީ އެފްއޭއެމުން ޑޮލަރު މާރުކުރުމުގެ ނަމުގައި އެކި ކުންފުނިތަކަށް ދޫކޮށްފައިވާ ޑޮލަރަށް، ލިބުނު ދިވެހި ރުފިޔާ ކަން އެނގިފައިވާ ކަމަށް ވެސް ފުލުހުން ބުނެފައިވެއެވެ.

މީގެ އިތުރުން އެފްއޭއެމުން އަމީން ކޮންސްޓްރަކްޝަންސްއަށް އޭޕްރީލް 14، 2021 ގައި އެއް މިލިއަން ޑޮލަރު ޖަމާކުރިކަން ވެސް ފާހަގަކުރެވިފައިވާ ކަމަށް ފުލުހުން ބުނެފައިވެއެވެ. އަދި މިއީ ކޮވިޑު ރިލީފް ލޯނެއްގެ ގޮތުގައި ފީފާ އިން އެފްއޭއެމް އަށް ދޫކޮށްފައިވާ 1.9 މިލިއަން ޑޮލަރުގެ ތެރެއިން ބައެއް ކަމަށްވެސް ބުނެފައިވެއެވެ.

މީގެ އިތުރުން މި ޑޮލަރަށްވާ ފައިސާ އެފްއޭއެމްއަށް ލިބިފައި ނުވާ ކަމަށާއި, މި ފައިސާ އެފްއޭއެމްްއަށް ލިބުނުކަން ދެއްކުމަށް ލިޔެކިޔުމެއްވެސް ތައްޔާރުކޮށްފައިވާ ކަމަށް ފުލުހުން ވަނީ ބުނެފައެވެ.