މަޖިލިހުގެ ތިންވަނަ ދައުރުގެ ފެށުން ލަސްކޮށްފި!

ރައްޔިތުންގެ މަޖިލީހުގެ ތިންވަނަ ދައުރުގެ ފެށުން ހަފްތާއެއްގެ މުއްދަތަށް ލަސްކޮށްފިކަމަށް މަޖިލީހުގެ އިދާރާއިން ހާމަކޮށްފިއެވެ. 

ރައްޔިތުންގެ މަޖިލީހުގެ 3 ވަނަ ދައުރު ފެށުން ފަސްކުރުމާއި ގުޅިގެން މަޖިލީހުގެ ރައީސް ޢަބްދުއްރަޙީމް ޢަބްދުﷲ މެންބަރުންނަށް ފޮނުއްވި މެސެޖުގައި ވިދާޅުވެފައިވަނީ، މަޖިލީހުގެ ޖަލްސާތައް ބްރޯޑްކާސްޓް ކުރުމަށް އައު ވީޑިއޯ ރޫމެއް ޤާއިމްކުރުމުގެ މަސައްކަތް ކުރަމުންދާ ކަމަށެވެ.

އެހެންކަމުން ޖަލްސާތައް ބްރޯޑްކާސްޓް ކުރުމަށް ދަތިތަކެއް ހުރުމުން، މި ދައުރުގެ ޖަލްސާތައް ފެށުން އަންނަ ހަފްތާގެ ހޯމަ ދުވަހަށް ފަސްކޮށްފައިވާ ކަމަށް މަޖިލީހުން ބުނެއެވެ.

ރައްޔިތުންގެ މަޖިލީހުގެ މިދިޔަ ދައުރުގެ މަސައްކަތްތައް ނިންމާ މެންބަރުން ޗުއްޓީއަށް ވަޑައިގެންނެވީ މިދިޔަ އޮގަސްޓް މަހުގެ 22 ވަނަ ދުވަހުއެވެ. އަދި މިއަހަރުގެ ފަހު ދައުރުގެ ޖަލްސާ ފެށުމަށް ކުރިން ތާވަލުކޮށްފައި އޮތީ މިމަހުގެ 7 ވަނަ ދުވަހަށެވެ.

މިދިޔަ ދައުރުގައި މަޖިލީހުން ގިނަ މަސައްކަތްތަކެއް ވަނީ ކޮށްފައެވެ. އެގޮތުން 11 ބިލެއްގެ މަސައްކަތް މަޖިލީހުން ވަނީ ނިންމައިފައެވެ.