ރައީސް މުޢިއްޒުގެ ދެކަނބަލުން އިންޑިޔާއަށް ވަޑައިގެންފި!

ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ދެކަނބަލުން އިންޑިޔާއަށް ކުރައްވަވާ ފުރަމާނަ ދަތުރުފުޅުގައި އެޤައުމަށް ވަޑައިގެންފިއެވެ. 

ރައީސް ޑރ މުއިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު އިންޑިޔާ އަށް ވަޑައިގެންފައިވަނީ މިއަދުއެވެ. 

އެމަނިކުފާނު އިންޑިޔާއަށް މިކުރައްވާ ދަތުރުފުޅަކީ އިންޑިޔާގެ ރައީސް ދްރްޕަތީ މުރުމޫގެ ޚާއްސަ ދައުވަތަކަށް ކުރައްވަވާ ދަތުރުފުޅެކެވެ. މިއީ އެމަނިކުފާނު ވެރިކަމާއި ހަވާލުވެވަޑައިގެންނެވި ފަހުން އިންޑިޔާއަށް ކުރައްވާ ފުރަތަމަ ރަސްމީ ދަތުރުފުޅެވެ. 

މިދަތުރުފުޅުގައި ރައީސް މުޢިއްޒު އިންޑިޔާގެ ބޮޑުވަޒީރު ނަރެންދްރް މޯދީ އާއި ބައްދަލުކުރެއްވުމަށް ވަނީ ހަމަޖެހިފައެވެ. އަދި މިބައްދަލުވުމުގައި ދެ ޤައުމުގެ ދެމެދުގައި އޮތް ގުޅުން އިތުރަށް ހަރުދަނާކުރެއްވުމަށް މަޝްވަރާކުރައްވާނެ ކަމަށް ބެލެވެއެވެ. މީގެ އިތުރުން، އިޤްތިޞާދީ އަދި ވިޔަފާރީގެ ދާއިރާއިން ގިނަ އެއްބަސްވުންތަކެއްގައި ސޮއިކުރެއްވުމަށް ހަމަޖެހިފައިވާ ކަމަށް ރައީސް އޮފީހުން މަޢުލޫމާތު ދީފައިވެއެެވެ.

އިންޑިޔާގެ މިނިސްޓްރީ އޮފް އެކްސްޓަރނަލް އެފެއާޒުން ބުނެފައިވާ ގޮތުގައި، ރައީސް މުއިއްޒު އިންޑިއާގެ ރައީސް ދްރަޕަތީ މުރުމޫއާވެސް ބައްދަލުކުރައްވާނެއެވެ. އަދި ބައިލެޓަރަލް، ސަރަޙައްދީ އަދި ބައިނަލްއަޤްވާމީ ދެފަރާތުގެ މަޞްލަޙަތު ހިމެނޭ މައްސަލަތަކާ ގުޅޭގޮތުން ބޮޑުވަޒީރު މޯދީއާއެކު މަޝްވަރާކުރައްވާނެ ކަމަށްވެސް އެ މިނިސްޓްރީން ހާމަކޮށްފައިވެއެވެ.

ރައީސް މުއިއްޒު މުންބާއީ އަދި ބެންގަލޫރުއަށްވެސް ޒިޔާރަތްކުރައްވާ، އެތަންތާނގައި ވިޔަފާރީގެ ހަރަކާތްތަކުގައި ބައިވެރިވެވަޑައިގަންނަވާނެ ކަމަށް އިންޑިޔާ ސަރުކާރުން ބުނެފައިވެއެވެ. އިންޑިޔާއިން ފާހަގަކޮށްފައިވާ ގޮތުގޮތުގައި ދިވެހިރާއްޖެއަކީ އިންޑިއަން އޯޝަން ރީޖަންގައި އިންޑިއާގެ މުހިންމު ކަނޑުގެ އަވައްޓެރިއެކެވެ. އަދި ބޮޑުވަޒީރުގެ 'ސާގަރ' (ސެކިއުރިޓީ އެންޑް ގްރޯތް ފޯރ އޯލް އިން ދަ ރީޖަން) އަދި އިންޑިއާގެ 'ނޭބަރހުޑް ފަސްޓް ޕޮލިސީ' ގައި ޚާއްޞަ މަޤާމެއް ލިބިފައިވާ ޤައުމެކެވެ.

ރައީސް މުޢިއްޒުގެ ދެކަނބަލުން މިހާރު އިންޑިޔާއަށް ވަޑައިގެންފައިވާއިރު އެމަނިކުފާނަށް ރަސްމީކޮށް މަރުޙަބާ ދެންނެވުން އޮންނާނީ މާދަމާ ކަމަށް ރައީސް އޮފީހުން ވަނީ ހާމަކޮށްފައެވެ.

މިދަތުރުފުޅުގައި ރައީސްގެ ދެކަނބަލުންގެ އަރިހުގައި ދައުލަތުގެ ބައެއް އިސްވެރިންވެސް ބައިވެރިވެވަޑައިގަންނަވައެވެ.