ޤަވާޢިދާ ޚިލާފަށް ގެންނަ ދިރޭތަކެތި ނައްތާލުމަށް ހޭދަވާ ޚަރަދު އެތެރެކުރާ މީހުން އަތުން އަތުލަނީ!

ރާއްޖެއަށް ޤަވާޢިދާ ޚިލާފަށް އެތެރެކުރާ ދިރޭތަކެތި ނައްތާލުމަށް ހޭދަވާ ޚަރަދު އެއެއްޗެހި އެތެރެކުރާ މީހުން އަތުން ނެގުމަށް ނިންމައިފިއެވެ. 

ކުރިން ޤަވާޢިދުގައި އޮންނަ ގޮތުން ވެރިފަރާތުން ޒިންމާވާން ޖެހެނީ އެހެން ޤައުމަކަށް ފޮނުވާލުމުގެ ޚަރަދަށެވެ.

އެހެންނަމަވެސް، "ނެތި ދިއުމުގެ ބިރު ހީވެފައިވާ ދިރޭ ތަކެތީގެ ބައިނަލްއަޤްވާމީ ވިޔަފާރި ކޮންޓްރޯލް ކުރުމުގެ ޤާނޫނާ ޚިލާފަށް ވިޔަފާރި ކުރެވޭ ތަކެއްޗާއި ގެންގުޅޭ ތަކެތި ނެގުމާއި ނައްތާލުމާ ގުޅޭ" ޤަވާޢިދަށް ގެނައި ފުރަތަމަ އިސްލާޙުގައިވާގޮތުން، އެންމެހާ ޚަރަދުތަކަށް ޒިންމާވާން ޖެހޭނީ އެތަކެތި ގެންނަ ފަރާތެވެ. 

މި އިސްލާޙު ސަރުކާރުގެ ގެޒެޓްގައި އިއްޔެ ވަނީ ޝާއިއުކޮށްފައެވެ. މި އިސްލާޙުގަައިވާގޮތުން، ޤަވާޢިދާއި ޚިލާފަށް ރާއްޖެއަށް ގެންނަ ދިރޭ ތަކެތި ގެނައި ޤައުމަކަށް ނުވަތަ ރެސްކިއު ސެންޓަރަކަށް ނުވަތަ އެކަށީގެންވާ ފެސިލިޓީ އަކަށް ފޮނުވާލުމަށް މެނޭޖްމަންޓް އޮތޯރިޓީން ނިންމައިފިނަމަ، އެކަމަށް ބޭނުންވާ އިންތިޒާމުތައް އެ އެއްޗެއް ގެނައި ފަރާތްތަކުން އެ ދިރޭ އެއްޗެއް ނެގިތާ 7 ދުވަހުގެ ތެރޭގައި ހަމަޖައްސަން ޖެހެއެވެ. 

ހަމައެއާއިއެކު، އެ އެއްޗެއް އިންސާނިއްޔަތު ކަމާއި އެކު މަރާލުމަށް މެނޭޖްމަންޓް އޮތޯރިޓީން ނިންމައިފިނަމަ، އެ ތަކެތި އެތެރެކުރި ފަރާތުން އެކަމަށް ހިނގާ ޚަރަދުތަކަށް ވެސް ޒިންމާވާން ޖެހޭނެކަމަށް އައު އިސްލާޙާއި އެކު ޤާނޫނުގައި ބުނެއެވެ.

މީގެ ކުރިން ޢަމަލުކުރަމުންދިޔަ އުޞޫލުގެ ދަށުން އެ ހުރިހާ އިންތިޒާމުތަކެއް ހަމަޖެއްސުމަށް ވެރި ފަރާތަށް ދެނީ ދެ ދުވަހެވެ.