ރައީސް ޑރ މުޢިއްޒު އިންޑިޔާގެ ބޮޑުވަޒީރު މޯދީ އާއި ބައްދަލުކުރައްވައިފި!

ރައީސުލްޖުމްހޫރިއްޔާ ޑރ މުޙައްމަދު މުޢިއްޒު އިންޑިޔާގެ ބޮޑުވަޒީރު ނަރެންދްރަ މޯދީ އާއި ބައްދަލުކުރައްވައިފިއެވެ. 

ރައީސް މުއިއްޒުގެ ދެކަނބަލުން އިންޑިޔާއަށް ކުރައްވަމުން ގެންދަވާ ރަސްމީ ދަތުުރުފުޅުގައި މިއަދު އިންޑިޔާގެ ބޮޑުވަޒީރު މޯދީ އާއި ބައްދަލުކުރައްވައިފައިވާއިރު މިބައްދަލުވުމުގައި ދެޤައުމުގެ ދެމެދުގައި ރަސްމީ ވާހަކަތައް ވަނީ ބާއްވައިފައެވެ. 

ރައީސް މުޢިއްޒު ބޮޑުވަޒީރު މޯދީ އާއި އެކު ބޭއްވެވި ބައްދަލުވުމުގައި ރާއްޖޭގައި އިންޑިޔާގެ ކޮންސިއުލޭޓް ގާއިމުކުރުމާގުޅޭގޮތުން މަޝްވަރާކޮށްފައިވެއެވެ. ދެޤައުމުގެ ދެމެދުގައި ބޭއްވި މަޝްވަރާ ތަކުގައި ވާހަކަދެކެވިފައިވަނީ މި ކޮންސިއުލޭޓް އައްޑޫ ސިޓީގައި ގާއިމްކުރުމަށެވެ. 

ރައީސް ޑރ މުއިއްޒުގެ ދެކަނބަލުން އިންޑިޔާއަށް ކުރައްވަމުން މިގެންދަވާ ރަސްމީ ދަތުރުފުޅުގައި ދިވެހި ސަރުކާރުގެ އިސްވެރިންގެ ވަފުދެއް ދަނީ ބައިވެރިވަމުންނެވެ. 

ރައީސްގެ ރަސްމީ މިދަތުރުފުޅުގައި އެންމެ ފުރަތަމަ އެމަނިކުފާނު ބައްދަލުކުރައްވައިފައިވަނީ އިންޑިޔާގެ އެކްސްޓާނަލް އެފެއަރޒް މިނިސްޓަރ ޑރ ސުބްރަމާނިއަމް ޖައިޝަންކަރާއެވެ. 

ރައީސްގެ ދެކަނބަލުން ވަނީ ނިއުދިއްލީގައި ދިރިއުޅޭ ދިވެހިންނާއިވެސް ބައްދަލުކުރައްވައިފައެވެ.