އިންޑިޔާ އާއި ރާއްޖެއާއި ދެމެދު ކަރަންސީ ސްވޮޕް އެއްބަސްވުމެއްގައި ސޮއިކޮށްފި!

އިންޑިޔާ އާއި ރާއްޖެއާއި ދެމެދު ކަރަންސީ ސްވޮޕް އެއްބަސްވުމެއްގައި ސޮއިކޮށްފިއެވެ.

އިންޑިޔާއާއި ރާއްޖެއާއި ދެެމެދު ސޮއިކޮށްފައިވަނީ 400 މިލިއަން ޑޮލަރުގެ ކަރަންސީ ސްވޮޕެއްގައެވެ. 

ރައީސް ޑރ މުޙައްމަދު މުއިއްޒު މިހާރު އިންޑިޔާއަށް ކުރައްވަމުން ގެންދަވާ ރަސްމީ ދަތުރުފުޅުގައި ސޮއި ކުރެވުނު މި އެއްބަސްވުމުގައި ރާއްޖޭގެ ފަރާތުން ސޮއި ކުރައްވައިފައިވަނީ ދިވެހިރާއްޖެގެ ގަވަރުނަރު އަހުމަދު މުނައްވަރެވެ. އިންޑިޔާ ސަރުކާރުގެ ފަރާތުން ސޮއިކުރައްވައިފައިވަނީ އިންޑިޔާގެ މިނިސްޓްރީ އޮފް ފިނޭންސްގެ ޑިޕާޓްމަންޓްއޮފް އިކޮނަމިކް އެފެއާޒްގެ ސެކެރެޓަރީ ޝްރީ އަޖޭ ސޭތް އެވެ.

މި އެއްބަސްވުމުގެ ދަށުން ދެ ކަރަންސީ ވިންޑޯއަކުން އެމްއެމްއޭއަށް ސްވޮޕް ނެގުމަށް މަގުފަހި ވެގެންދާނެކަމަށް ސަރުކާރުން ބުނެފައިވެއެވެ.

މިގޮތުން، 'ފްރޭމްވަރކް އޮން ކަރަންސީ ސްވޮޕް އެރޭންޖްމަންޓް ފޯ ސާކް ކަންޓްރީސް 2027 – 2024'ގެ ދަށުން އެމްއެމްއޭއަށް 400 މިލިޔަން އެމެރިކާ ޑޮލަރުގެ އިތުރުން 30 ބިލިޔަން އިންޑިއަން ރުޕީސްގެ އަދަދާ ހަމައަށް އެކި ފަހަރު މަތިން ސްވޮޕް ނެގޭނެކަމަށް ވެސް ސަރުކާރުން ބުނެއެވެ.

މި ކަރަންސީ ސްވެޕް އެއްބަސްވުމުގެ ސަބަބުން އިންޑިޔާގެ ސެންޓްރަލް ބޭންކުން ދިވެހި ރުފިޔާ ބަހައްޓާނެ އެވެ. އަދި އެ އަދަދުގެ އިންޑިއާ ރުޕީސް އެ ގައުމުން ރާއްޖޭ މަރުކަޒީ ބޭންކުގައި ވެސް ބަހައްޓާނެ އެވެ. މި ފަދަ އެއްބަސްވުންތައް އޮންނަ ގޮތުން ފަހުން އެއްބަސްވާ ތާރީހެއްގައި ދެ ގައުމުން ފައިސާ ބަދަލު ކުރާނެ އެވެ.

މީގެ ސަބަބުން ބޭރު ފައިސާއަށް އޮންނަ ޑިމާންޑު ކުޑަވެ، ރާއްޖެ އިން އިންޑިއާއަށް ދައްކަން ޖެހޭ ފައިސާ ދިވެހި ރުފިޔާ އިން ދެއްކުމަށް މަގު ފަހިވެގެންދެ އެވެ.

ކަރަންސީ ސްވެޕް އެއްބަސްވުމަކީ ދެ ޤައުމެއްގެ ފައިސާ ބަދަލު ކުރަން ހަދާ އެއްބަސްވުމެކެވެ.

މި އެއްބަސްވުން ޤާއިމުކުރާނީ ދެ ޤައުމުގެ މަރުކަޒީ ބޭންކުގެ ދެމެދުގަ އެވެ. 

ރާއްޖެއިން މީގެ ކުރިންވެސް އިންޑިޔާއާއެކު ކަރަންސީ ސްވެޕް އެއްބަސްވުން ހަދާފައި ވެއެވެ.  ނިމިދިޔަ ސަރުކާރުން ވަނީ އިންޑިޔާއާއެކު 400 މިލިއަން ޑޮލަރުގެ އެއްބަސްވުމެއް ޤާއިމުކޮށްފަ އެވެ.