ރާއްޖެއަށް އިންޑިއާގެ ރުޕޭ ކާޑު ތަޢާރަފުކޮށްފި

ރާއްޖެއަށް އިންޑިއާގެ ރުޕޭ ކާޑު ތަޢާރަފުކޮށްފިއެވެ. 

މިކާޑު ރާއްޖޭގައި ބޭނުންކުރެވޭ ގޮތައް ތަޢާރަފުކޮށްފައިވަނީ ރައީސުލްޖުމްހޫރިއްޔާ އިންޑިއާއަށް ކުރައްވަމުން ގެންދަވާ ރަސްމީދަތުރުފުޅުގެ ތެރެއިންނެވެ. ރުޕޭ ކާޑު ރާއްޖޭގައި ބޭނުންކުރެވޭހެންތަޢާރަފުކޮށްފައިވަނީ ދެ ޤައުމުގެ ދެމެދުގައި ބޭއްވުނު ރަސްމީ މަޝްވަރާތަކަށް ފަހު ބޭއްވި ޚާއްޞަ ރަސްމިއްޔާތެއްގައެވެ. އެ ރަސްމިއްޔާތު ކުރިއަށް ދިޔައީ އިންޑިޔާގެ ބޮޑުވަޒީރު މޯދީގެ ރަސްމީ ގެކޮޅު ހައިދްރައާބާދު ހައުސްގައެވެ.

ރައީސް ޑރ. މުއިއްޒު އާއި މޯދީގެ ބައްދަލުކުރެއްވުމަށްފަހު، ދެ ބޭފުޅުން އެކުގައި ދެއްވި މީޑިއާ ސްޓޭޓްމަންޓް ފެއްޓެވުމުގެ ކުރިން ވަނީ ރާއްޖޭގައި، ރުޕޭ ކާޑުގެ ފުރަތަމަ ޓްރާންސެކްޝަން ހެދި މަންޒަރު ލައިވްކޮށް ދައްކާލައިފައިވެއެވެ. އެއީ މާލޭގެ ފިހާރައެއްގައި ހެދި ޓްރާންސެކްޝަނެކެވެ.

ރުޕޭއަކީ އެކި ޤައުމުތަކުގައި ބޭނުން ކުރެވޭ ގޮތަށް ރިޒާވް ބޭންކުން 2016 ވަނަ އަހަރު ތަޢާރަފް ކުރި ކާޑެކެވެ.

ރުޕޭ ކާޑުގެ ޚިދުމަތް ރާއްޖޭގައި ދެވޭ ގޮތަށް ހެދުމުގެ މަސައްކަތް ފެށީ މިދިޔަ އޮގަސްޓް މަހުގެ ތެރޭގައި އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމަނިއަމް ޖައިޝަންކަރު ރާއްޖެއަށް ކުރެއްވި ދަތުރުފުޅުގެ ތެރެއިން ސޮއި ކުރި އެމްއޯޔޫއެއްގެ ދަށުންނެވެ. ރުޕޭ ކާޑު ރާއްޖޭގައި ތަޢާރަފުކުރުމާ އެކު ބީއެމްއެލްގެ އޭޓީއެމްތަކާއި ޕީއޯއެސް މެޝިންތަކުން ވެސް ރުޕޭ ކާޑު ބޭނުންކުރެވޭނެއެވެ.

ރާއްޖޭގައި ރުޕޭ ކާޑު ބޭނުން ކުރަން ފެށުމުން ރާއްޖޭގައި އުޅޭ އިންޑިއާގެ ރައްޔިތުންނަށް ވެސް ފައިސާގެ މުޢާމަލާތް ކުރުމުގައި އިތުރަށް ފަސޭހަވާނެއެވެ. އަދި އިންޑިއާ އަށް ގޮސް އުޅޭ ދިވެހިން ވެސް ރުޕޭ ކާޑް ބޭނުންކޮށްގެން ވިޔަފާރި ކުރުމުގެ ފުރުޞަތު ފަހިވާނެއެވެ.

މި ޚިދުމަތް މިހާރު ދުނިޔޭގެ 185 ގައުމެއްގައި ދެއެވެ.