ރާއްޖެ ވަޑައިގަތުމުގެ ދައުވަތު މޯދީއަށް ރައީސް މުޢިއްޒު ދެއްވައިފި!

އިންޑިޔާގެ ބޮޑުވަޒީރު ނަރެންދްރަ މޯދީ ރާއްޖެ ވަޑައިގަތުމުގެ ރަސްމީ ދައުވަތު ރައީސުލްޖުމްހޫރިއްޔާ މުޙައްމަދު މުޢިއްޒު މޯދީ އަށް ދެއްވައިފިއެވެ. 

ރައީސް ޑރ. މުޢިއްޒު ބޮޑުވަޒީރު މޯދީ އަށް މިދައުވަތު ދެއްވީ އިންޑިޔާއަށް ކުރައްވަމުން ގެންދަވާ ދަތުރުފުޅުގެ ތެރެއިން ދެ ޤައުމުގެ ރަސްމީ މަޝްވަރާތަކަށް ފަހު ބޭއްވި ޚާއްޞަ ރަސްމިއްޔާތުގައެވެ.

 އެ ރަސްމިއްޔާތު ކުރިއަށް ދިޔައީ މޯދީގެ ރަސްމީ ގެކޮޅު ހައިދްރައާބާދު ހައުސްގައެވެ.

މި ބައްދަލުވުމުގައި ދެ ޤައުމުގެ ދެމެދުގައި އޮތް އެކުވެރިކަމާއި އެއްބާރުލުން އިތުރަށް ވަރުގަދަކުރުމާ ގުޅޭގޮތުން މަޝްވަރާކުރެވިގެން ގޮސްފައިިވެއެވެ. އަދި ޚާއްޞަކޮށް އިޤްތިޞާދީ، ވިޔަފާރި، އަދި ސަލާމަތީ ދާއިރާތަކުގައި އެއްބާރުލުން އިތުރުކުރުމަށް މަޝްވަރާ ކުރެވިފައިވެއެވެ. 

"އަޅުގަނޑު އުފަލާއެކު ބޮޑުވަޒީރު މޯދީއަށް ރާއްޖެ ވަޑައިގަތުމަށް ދަޢުވަތު އަރުވަން. އަޅުގަނޑުމެންގެ ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިކުރުމަށް މި ދަތުރުފުޅު މުހިންމު ދައުރެއް އަދާކުރާނެ ކަމަށް އަޅުގަނޑު ޔަޤީންކުރަން." ރައީސް މުއިއްޒު ވިދާޅުވެފައިވެއެވެ. 

މި ބައްދަލުވުމުގައި ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިކުރުމަށްޓަކައި ވިޝަން ޑޮކިއުމަންޓެއް އެކުލަވާލުމަށް އެއްބަސްވެވިފައިވެއެވެ. 

އިންޑިޔާ ސަރުކާރުން ރާއްޖެއަށް ފޯރުކޮށްދެއްވާ މާލީ އެހީތެރިކަމަށް ރައީސް މުޢިއްޒު ވަނީ ޚާއްޞަ ޝުކުރެއް އަދާކުރައްވާފައެވެ.