ދިވެހިރާއްޖޭގެ ސޯޝިއޯއިކޮނޮމިކް އަދި އިންފްރާސްޓްރަކްޗަރ ތަރައްޤީގެ އެންމެ މުހިންމު އެއްބައިވެރިޔަކީ އިންޑިއާ!

ދިވެހިރާއްޖޭގެ ސޯޝިއޯއިކޮނޮމިކް އަދި އިންފްރާސްޓްރަކްޗަރ ގެ އެންމެ މުހިންމު އެއްބައިވެރިޔަކީ އަވަށްޓެރި އިންޑިއާ ކަމަސް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވިދާޅުވެއްޖެއެވެ. 

ރައީސް މުޢިއްޒު މިހެން ވިދާޅުވީ އެމަނިކުފާނު އިންޑިއާއަށް ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން ދެޤައުމުގެ ދެމެދުގައި ބޭއްވި ރަސްމީވާހަކަ ތަކަަށްފަހު ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. 

އިންޑިއާއަކީ ދިވެހިރާއްޖޭގެ ސޯޝިއޯއިކޮނޮމީ އަދި އިންފްރާސްޓްރަކްޗަރ ތަރައްޤީގެ އެންމެ މުހިއްމު އެއް ބައިވެރިޔާ ކަމަށް ވިދާޅުވެ ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، އެކި އެކި ދާއިރާތަކުން ދެޤައުމުގެ ދެމެދުގައި އެއްބާރުލުން ދެވެމުންދާ ކަންކަން ހަރުދަނާ ކުރުމަށް ވަޢުދުވެވަޑައިގަންނަވާކަމަށެވެ. 

 ރައީސް މުޢިއްޒުގެ ވާހަކަފުޅުގައި، ޚާއްޞަކޮށް ރާއްޖެއަށް އިޤްތިޞާދީ ގޮތުންނާއި އެހެން ގޮތްގޮތުން ދިމާވާ ގޮންޖެހުންތަކުގައި ބޮޑުވަޒީރު މޯދީ އާއި އިންޑިއާއިން ދެއްވާ އެއްބާރުލުމަށް ޓަކައި ޝުކުރު އަދާކުރައްވައިފައިވެއެވެ. 

 ރައީސް ޑރ މުޢިއްޒު ވަނީ އިންޑިއާއިން ރާއްޖެއަށް  ދެމުންދާ މާލީ އެހީތެރިކަމަށް ޚާއްޞަކޮށް ޝުކުރު އަދާކުރައްވާފައެވެ. 

"އަޅުގަނޑުމެން އިންތިޒާރު ކުރަނީ އިންޑިއާއާއެކު މިނިވަން ވިޔަފާރީގެ އެއްބަސްވުމެއް ވެވޭނެ ދުވަހަކަށް،  އެކަމުގެ ސަބަބުން އަޅުގަނޑުމެން ދެ ޤައުމުގެ ދެމެދުގައި އޮތް އިޤްތިޞާދީ ޤާބިލްކަން ފުރިހަމައަށް ބޭނުންކުރެވޭނެ، އަޅުގަނޑުމެންގެ ފަތުރުވެރިކަމާއި ތަރައްޤީގެ ދާއިރާގައި ވެސް އިންޑިއާގެ އިންވެސްޓްމަންޓްތައް އިތުރުކުރެވޭނެ،" ރައީސް މުޢިއްޒު ވިދާޅުވިއެވެ.

ފަތުރުވެރިކަމަކީ ރާއްޖެގެ އިޤްތިޞާދުގެ އެންމެ ބޮޑު އެއް މަސްދަރު ކަން ފާހަގަކުރައްވައި ރައީސް މުޢިއްޒު ވިދާޅުވީ، އިންޑިއާގެ އިތުރު ފަތުވެރިންނަށް މަރުޙަބާ ކިޔުމަށް އުންމީދު ކުރައްވާކަމަށެވެ.

 އިންޑީއާގެ ބޮޑުވަޒީރު މޯދީ އާއި ރައީސް މުޢިއްޒު އާއި ދެ ލީޑަރުން އެއްބަސްވެވަޑައިގަތީ ތަރައްޤީއާއި އިޤްތިޞާދީ އަދި ވިޔަފާރި، ޑިޖިޓަލް ޓްރާންސްފޯމަޝަން، އަދި ކަނޑުގެ ރައްކާތެރިކަމުގައި އެއްބާރުލުންދިނުމަށެވެ.

 އަންނަ އަހަރު އިންޑިއާއާއި ރާއްޖެއާއި ދެމެދުގައި ރަސްމީ ޑިޕްލޮމެޓިކް ގުޅުން ގާއިމްކުރިތާ 60 އަހަރު ފުރިހަމަވާނެއެވެ. މިކަމަށް އިޝާރާތް ކުރައްވައި ރައީސް ވަނީ އިންޑިއާގެ ބޮޑުވަޒީރަށް ރާއްޖެއަށް ވަޑައިގަތުމަށް ރަސްމީކޮށް ދައުވަތު އަރުވައިފައެވެ.

ރައީސުލްޖުމްހޫރިއްޔާ މިހާރު އިންޑިއާއަށް ކުރައްވަމުން ގެންދަވަނީ ފަސް ދުވަހުގެ ރަސްމީ ދަތުރުފުޅެކެވެ. މި ދަތުރުފުޅަކީ އިންޑިއާގެ ރައީސް ހަރ އެކްސެލެންސީ ދްރޯޕަތީ މުރުމު ދެއްވެވި ރަސްމީ ދަޢުވަތެއްގައި ކުރައްވާ ދަތުރުފުޅެކެވެ.  މިދަތުރުފުޅުގައި ފަސްޓް ލޭޑީ މެޑަމް ސާޖިދާ މުޙައްމަދާއި ދިވެހި ސަރުކާރުގެ މަތީ ފެންވަރުގެ ވަފުދެއް އެމަނިކުފާނާއެކު ބައިވެރިވަމުންދެއެވެ.