ދަތުރު ފަތުރު ފެށުމުގެ ކުރިން ރައްކާތެރިކަމުގެ ފިޔަވަޅު އެޅުމަށް ފުލުހުން އިލްތިމާސްކޮއްފި

ކަނޑުއުޅަނދު ދުއްވާ ފަރާތްތަކުން ކަނޑު ދަތުރުތައް ފެށުމުގެކުރިން މޫސުމާބެހޭ އެންމެ ފަހުގެ މައުލޫމާތު ހޯދައި، ރައްކާތެރިކަމުގެ ފިޔަވަޅު އެޅުމަށް ފުލުހުން ވަނީ ރޭގައި އިލްތިމާސްކޮށްފައެވެ. ފުލުހުން ބުނެފައިވަނީ ރާއްޖޭގެ އެކި ހިސާބުތަކަށް ބޯކޮށްވާރޭވެހި ކަނޑުގަދަވެ، ކަނޑުމަތީގެ ހާދިސާތައް ހިނގަން މެދުވެރިވެދާނެކަމަށެވެ.

އެހެންކަމުން މޫސުމާބެހޭ އެންމެ ފަހުގެ މައުލޫމާތު ހޯދައި، އުޅަނދުގައި ސަލާމަތީ ގޮތުން ފުރިހަމަ ކުރަންޖެހޭ ކަންކަން ހުރީ ފުރިހަމަ ވެފައިތޯބެލުމާއި އުޅަނދަށް އެކަށޭނަ ވަރަށް މީހުން އެރުވުމާއި، މުދާ އެރުވުން ފަދަ ކަންކަމަށްވެސް ސަމާލުވުމަށް ފުލުހުން ވަނީ ބުނެފައެވެ.

މިދުވަސްވަރަކީ ރާއްޖެއަށް ވިއްސާރަ ދުވަސް ވަރަކަށް ވާތީވެ ކުރިއަށް އޮތް ދެތިން ދުވަހު ރާއްޖޭގެ ހުރިހާ އަތޮޅަކަށްވެސް ވިއްސާރަވެ ކަނޑުގަދަވާނެކަމަށް މޯލްޑިވްސް މީޓިއޮރްޖިކްލް ސަރވިސްއިން ވަނީ ލަފާކޮށްފައެވެ. އަދި ގަދަ ވަޔާއެކު ބޯކޮށް ވާރޭވެހި، ގުގުރާނެކަމަށާއި، އުދައިގެ އަސަރުވެސް ކުރުމަކީ އެކަށީގެންވާ ކަމެއްކަމަށް އެ އިދާރާއިން ވަނީ ލަފާކޮށްފައެވެ.