ހޮންގްކޮންގުގައި ހިނގި އަލިފާނުގެ ހާދިސާއާއި ގުޅިގެން ރައީސް ތަޢުޒިޔާ ފޮނުއްވައިފި

ހޮންގްކޮންގުގައި ހިނގި އަލިފާނުގެ ހާދިސާއެއްގައި ގިނަ ބަޔަކު މަރުވުމާއި ގުޅިގެން، ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ޗައިނާގެ ރައީސް ޝީ ޖިންޕިންގ އަށާއި، އެ ޤައުމުގެ ސަރުކާރަށާއި، ހާދިސާގައި ގެއްލުންވި ފަރާތްތަކުގެ އާއިލާތަކަށް ތަޢުޒިޔާ ފޮނުއްވައިފިއެވެ.

 ރައީސް މުޢިއްޒު ތަޢުޒިޔާ ފޮނުއްވަވައިފައިވަނީ އެކްސްގައި ކުރެއްވެވި ޕޯސްޓެއްގައެވެ. 

ރައީސް މުޢިއްޒު ވަނީ ހޮންގްކޮންގުގައި ހިނގި މި ހިތާމަވެރި އަލިފާނުގެ ހާދިސާގައި ގިނަ ބަޔަކު މަރުވުމަކީ ވަރަށް ބޮޑު ހިތާމައެއް ކަމުގައި ވިދާޅުވެފައެވެ. އަދި ދިވެހިރާއްޖޭގެ ރައްޔިތުންގެ ނަމުގައި، ޗައިނާގެ ރައީސްއަށާއި ސަރުކާރަށް އަދި ހާދިސާގައި ގެއްލުންވި ފަރާތްތަކުގެ އާއިލާތަކަށް އެ މަނިކުފާނު ވަނީ ހިތުގެ ފުންމިނުން ތަޢުޒިޔާ ފޮނުއްވާފައެވެ.

މީގެ އިތުރުން، ދެކުނު އިރުމަތީ އޭޝިޔާގެ ޤައުމުތަކަށް ދިމާވެފައިވާ މޫސުމީ ހާލަތު ގޯސްވުމުގެ ސަބަބުން ގެއްލުންތައް ލިބި، މީހުން މަރުވަމުންދާކަން ފާހަގަކުރައްވައި، ރައީސް ވަނީ ތައިލެންޑް، އިންޑޮނޭޝިއާ އަދި ވިއެޓްނާމްގައި ހިނގާފައިވާ ހާދިސާތަކަށް ވެސް ހިތާމަ ފާޅުކުރައްވާފައެވެ. އެމަނިކުފާނު ވިދާޅުވީ، މިފަދަ ހާދިސާތަކަކީ މޫސުމަށް އަންނަ ބަދަލުތަކުގެ ސަބަބުން ދިމާވާ ނޭދެވޭ އަސަރުތައް އިތުރުވަމުންދާކަމުގެ ހިތާމަވެރި އަދި ބިރުވެރި ހަނދާންކޮށްދިނުން ތަކެއްކަމަށެވެ.

ރައީސް މުޢިއްޒު ވަނީ މި ހާދިސާތަކުގައި ގެއްލުންވި ހުރިހާ ފަރާތްތަކާއި އެކުގައި ދިވެހިން ތިބިކަމަށް ވިދާޅުވެފައެވެ. އަދި ހާއްސަކޮށް، ހޮންގްކޮންގުގެ އަލިފާނުގެ ހާދިސާގައި އެހީތެރިކަން ފޯރުކޮށްދިނުމުގައި ހަރަކާތްތެރިވި ސަލާމަތީ ޓީމުތަކުގެ ހިތްވަރަށް އެމަނިކުފާނު ވަނީ ތަޢުރީފު ކުރައްވާފައެވެ.