ނުރައްކާތެރިކޮށް ލޯންޗު ދުއްވި މީހުންގެ ލައިސެންސް ހިފަހައްޓައިފި!

ނުރައްކާތެރިކޮށް ކަނޑުމަތީގައި ލޯންޗު ދުއްވި ތިން މީހުންގެ ލައިސެންސް ވަގުތީ ގޮތުން ހިފަހައްޓައިފި ކަމަށް ދިވެހި ފުލުހުންގެ ޚިދުމަތުން ބުނެފިއެވެ. 

ފުލުހުން ބުނެފައިވަނީ ނުރައްކާތެރިކޮށް ލޯންޗު ދުއްވި ތިން މީހުންގެ ލައިސެންސް ހިފަހައްޓައިފައިވަނީ މި އޮކްޓޫބަރު މަހުގެ ފަސްވަނަ ދުވަހު ކަމަށެވެ. 

އަދި މައްސަލައާއި ގުޅޭ ލިޔެކިޔުންތައް ދަތުރުފަތުރާ ބެހޭ ވުޒާރާއަށް ފޮނުވުމުގެ މަސައްކަތް ފުލުހުން ކުރަމުންދާ ކަމަށްވެސް ބުނެފައިވެއެވެ. މީގެއިތުރުން މިމައްސަލާގައި އެތިން މީހުންގެ މައްޗަށް އަޅާނެ ދާއިމީ ފިޔަވަޅެއް ނިންމާނީ އެވުޒާރާއިން ކަމަށްވެސް ފުލުހުން ވަނީ ބުނެފައެވެ. 

ފުލުހުން މިމައްސަލަ ތަހުޤީޤުކުރަން ފަށާފައިވަނީ ރަށެއްގެ ފަޅުތެރެއަށް ނުރައްކާތެރިގޮތަކަށް 3 ލޯންޗެއް ދުއްވާފައި ވަންނަ ވީޑިއޯއެއް ސޯޝަލް މީޑިއާގައި ދައުރުވާން ފެށުމާއެކުއެވެ. މި ވިޑީއޯއާ ގުޅިގެން ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ.

ސޯޝަލް މީޑިއާގައި ދައުރުވާ މި ވީޑިއޯގައި ފެންނަ ލޯންޗުތަކަކީ މިދިޔަ އޮގަސްޓް މަހުގެ 13 ވަނަ ދުވަހު އއ. އަތޮޅަށް ދަތުރު ކުރި ލޯންޗުތަކެއް ކަމަށް ފުލުހުން ބުނެފައިވެއެވެ