ސިޔާސީ ޕާޓީ ތަކަށް ފައިސާދޭ އުސޫލަށް ބަދަލުގެންނަން ޤާނޫނަށް އިސްލާޙު ހުށައަޅަނީ!

ރާއްޖޭގެ ސިޔާސީ ޕާޓީތަކަށް ފައިސާދޭ އުސޫލަށް ބަދަލުގެންނަން ޤާނޫނަށް އިސްލާޙު ހުށައެޅުމަށް އިލެކްޝަން ކޮމިޝަނުން ނިންމައިފިއެވެ. 

އީސީ އިން ބުނެފައިވަނީ ޤާނޫނަށް އިސްލާހު ގެނައުމަށް މިހާރު ވަނީ ބިލު ޑްރާފްޓްކޮށްފައި ވާކަމަށެވެ. މި ބިލާއި ގުޅޭގޮތުން އެ ކޮމިޝަނާއި ސިޔާސީ ޕާޓީތަކާމެދު 2020 ވަނަ އަހަރުން ފެށިގެން އަންނަނީ މަޝްވަރާތައް ކުރަމުންކަމަށް ވެސް އީސީ އިން ވަނީ ބުނެފައެވެ. އިލެކްޝަންސް ކޮމިޝަންގެ ރައީސް ފުވާދު ތައުފީޤާ ހަވާލާދީ ދައުލަތުގެ މީޑިއާގައި ބުނެފައިވަނީ، ސިޔާސީ ޕާޓީތަކާބެހޭ ޤާނޫނަށް މައިގަނޑު ދެ އިސްލާހެއް ހުށަހެޅުމަށް ނިންމަވާފައިވާ ކަމަށެވެ. 

އެގޮތުން، މިހާރު ޤާނޫނުގައި ސިޔާސީ ޕާޓީތަކުގެ ކޮންގްރެސް 5 އަހަރުތެރޭ ބާއްވަން ޖެހޭގޮތަށް އޮތްނަމަވެސް ދިމާވެދާނެ ހާލަތަކަށް ބަލައި އެކަށީގެންވާ ސަބަބަކާއެކު ކޮންގްރެސް ލަސްކުރެވިދާނެގޮތަށް އިސްލާހުގައި ހިމަނުއްވާފައިވާ ކަމަށެވެ.

މި އިސްލާހުގެ އިތުރުން ބަދަލު ގެނައުމަށް ނިންމާފައިވަނީ ސިޔާސީ ޕާޓީތަކަށް ފައިސާދޭ އުޞޫލަށެވެ. މިހާރު ޤާނޫނުގައި އޮންނަ ގޮތުން ސިޔާސީ ޕާޓީތަކުގެ ތެރެއިން އިލެކްޝަންސް ކޮމިޝަނުން ފައިސާ ދޫކުރަން ޖެހެނީ އެ ޕާޓީއެއްގައި 10،000 މެންބަރުން ހަމަވާ ޕާޓީތަކަށް އެކަންޏެވެ.

ނަމަވެސް މިއީ ސިޔާސީ ޕާޓީތަކަށް ފައިސާ ދިނުމުގައި އެންމެ އެކަށީގެންވާ ގޮތް ނޫން ކަމަށާއި އެ އުޞޫލު ބަދަލުވާންޖެހޭ ކަމަށް މީގެ ކުރިންވެސް ސިޔާސީ ޕާޓީތަކުން ވަނީ ބުނެފައެވެ. އިލެކްޝަންސް ކޮމިޝަނުން ޑްރާފްޓްކޮށްފައިވާ ބިލުގައިވާގޮތުން ސިޔާސީ ޕާޓީތަކަށް ޚާއްސަކޮށްފައިވާ ބަޖެޓު 4 ބަޔަކަށް ބަހާލެވޭނެއެވެ. އެއީ އިލެކްޝަންސް ކޮމިޝަނުގައި ރަޖިސްޓްރީވެފައިވާ 3،000 މެންބަރުން ހަމަވާ ހުރިހާ ޕާޓީތަކާއި، 10،000 މެންބަރުން ހަމަވާ ޕާޓީތަކާއި، މަޖިލިސް އިންތިޚާބާއި ލޯކަލް ކައުންސިލް އިންތިޚާބުގައި ޕާޓީތަކުގެ ކާމިޔާބީއެވެ.

ފުވާދުއާ ހަވާލާދީ އިތުރަށް ބުނެފައިވަނީ، ބަޖެޓުގެ %25 ހާއްސަ ކުރާނީ ހުރިހާ ސިޔާސީ ޕާޓީތަކަށެވެ. އޭގެ އިތުރުން %25، 10،000 މެންބަރުން ހަމަވާ ޕާޓީތަކަށް ޚާއްސަކުރާއިރު މަޖިލިސް އިންތިޚާބުގައި ޕާޓީތަކުން ހޯދާ ކާމިޔާބީއަށް %30 އަދި ލޯކަލް ކައުންސިލް އިންތިޚާބުގައި ހޯދާ ކާމިޔާބީއަށް %20 ޚާއްސަކުރަން ޑްރާފްޓް ބިލުގައި ހިމަނުއްވާފައިވާނެ ކަމަށް ވިދާޅުވިއެވެ.

މިބިލަކީ ސިޔާސީ ޕާޓީތަކާ މަޝްވަރާކުރުމަށްފަހު 4 އަހަރު ދުވަހުގެ ތެރޭގައި އިލެކްޝަންސް ކޮމިޝަނާއި ޕާޓީތަކަށް ފާހަގަކުރެވުނު ކަންކަމަށް ބަލައި އެކުލަވަލާފައިވާ ބިލެއް ކަމަށް ފުވާދު ވިދާޅުވިއެވެ. އިލެކްޝަންސް ކޮމިޝަނުން އެކުލަވާލާފައިވާ ޑްރާފްޓް ބިލު މި ހަފުތާގެ ތެރޭގައި ބަންޑާރަނައިބުގެ އޮފީހަށް ފޮނުވާނެއެވެ. އެއަށްފަހު ބަންޑާރަނައިބުގެ އޮފީހުން ފައިނަލް ޑްރާފްޓް ތައްޔާރުކޮށް ބިލުގެ މަސައްކަތް ކުރިއަށްގެންދިއުމަށް މަޖިލީހަށް ހުށަހަޅުއްވާނެއެވެ.