ރަމަޟާން މަހަށް ވާ ތައްޔާރީތަކުގެ ދަށުން ފެނަކައަށް 39 ޖެނެރޭޓަރެއް ހޯދަނީ!

ކުރިއަށް އޮތް ރަމަޟާން މަހަށް ވާ ތައްޔާރީތަކުގެ ދަށުން ފެނަކައަށް 39 ޖެނެރޭޓަރެއް ހޯދަމުން ދާ ކަމަށް އެކުންފުނިން ހާމަކޮށްފިއެވެ. 

ފެނަކައިން ބުނެފައިވަނީ މިހާރު ޖެނެރޭޓަރުތައް ފޯރުކޮށްދޭނެ ބަޔަކު ހޯދުމަށް ހުޅުވައިލައިފައިވާ ކަމަށެވެ. 

އެގޮތުން އެކި ރަށްރަށުގެ ކަރަންޓު ޚިދުމަތް ދިނުމަށް އިތުރަށް ބޭނުންވާ 39 ޖެނެރޭޓަރު ހޯދުމަށް، ޖެނެރޭޓަރު ވިއްކާ ރާއްޖެއާއި ރާއްޖެއިން ބޭރުގެ ފަރާތްތަކަށް މިތަކެތި ފެނަކައަށް ފޯރުކޮށްދިނުމަށް ހުޅުވާލާފައިވާ ކަމަށް ފެނަކައިން ބުނެފައިވެއެވެ.

މި ޖެނެރޭޓަރުތައް ހޯދުމުގެ ބޭނުމަކީ، އަންނަ އަހަރުގެ ރަމަޟާން މަހަށާއި ހޫނުގަދަ ދުވަސްވަރަށް ތައްޔާރުވުން ކަމަށް ފެނަކައިން ބުނެފައިވެއެވެ. އަންނަ އަހަރުގެ ރަމަޟާން މަސް ދިމާވަނީ އަހަރުގެ އެންމެ ހޫނު ދުވަސްވަރާކަމުން، އެދުވަސްތަކުގެ ކަރަންޓަށް އޮންނަ ޑިމާންޑު ވަރަށް ބޮޑުތަނުން އިތުރުވެގެން ދާނެ ކަމަށާއި، އެހެން ކަމުން ކަރަންޓު ކެޕޭސިޓީ އިތުރުކުރުމަށް، ދުރާލާ ތައްޔާރު ވަމުންދާ ކަމަށް ރާއްޖޭގެ ގިނަ ރަށްތަކަކަށް ކަރަންޓުގެ ޚިދުމަތް ދެމުންދާ ފެނަކައިން ބުނެފައިވެއެވެ. 

ފެނަކައިން ހޯދާ ޖެނެރޭޓަރުތަކާއި އޭގެ ކެޕޭސިޓީ:

• 250 ކީލޯވަޓުގެ 7 ޖެނެރޭޓަރު

• 400 ކިލޯވަޓުގެ 6 ޖެނެރޭޓަރު

• 600 ކިލޯވަޓުގެ 8 ޖެނެރޭޓަރު

• 800 ކިލޯވަޓުގެ 5 ޖެނެރޭޓަރު

• 1000 ކިލޯވަޓުގެ 6 ޖެނެރޭޓަރު

• 1200 ކިލޯވަޓުގެ 5 ޖެނެރޭޓަރު

• 1600 ކިލޯވަޓުގެ 2 ޖެނެރޭޓަރު

ފެނަކައިން މި ޖެނެރޭޓަރުތައް ހޯދުމަށް މިހާރު ހުޅުވާލާފައިވާއިރު، މިމަހުގެ 7 އިން 14 އަށް ބީލަމަށް ކުރިމަތިލުމަށް ވަނީ ހުޅުވާލާފައެވެ. އަދި މި ޖެންސެޓްތައް ވިއްކުމަށް ޝައުޤުވެރިވާ ފަރާތްތަކަށް އޮކްޓޫބަރު މަހުގެ 14 ގެ ނިޔަލަށް ބީލަމަށް ރަޖިސްޓްރީވެވޭނެ ކަމަށް ފެނަކައިން ބުނެއެވެ.