އާގްރާއަށް ކުރެއްވެވި ޒިޔާރަތަށްފަހު ރައީސް މުޢިއްޒު މުމްބާއީއަށް!

އިންޑިއާގެ އާގްރާއަށް ރައީސުލްޖުމްހޫރިއްޔާ ޑރ މުޙައްމަދު މުޢީއްޒުގެ ދެކަނބަލުން ކުރެއްވެވި ޒިޔާރަތަށްފަހު އިންޑިއާގެ ވިޔަފާރީގެ މައިސިޓީ މުމްބާއީއަށް ވަޑައިގެންފިއެވެ. 

އާގްރާގެ ޒިޔާރަތައް ފަހު ރައީސް މުޢިއްޒާއި އަނބިކަނބަލުން ސާޖިދާ މުމްބާއީއަށް ވަޑައިގަތުމުން އެދެކަނބަލުންނަށް ޗަތުރަޕަތީ ޝިވާޖީ މަހަރާޖު އިންޓަރނޭޝަނަލް އެއަރޕޯޓުން ވަނީ ހޫނު މަރުހަބާއެއް ދަންނަވާފައެވެ.

ރައީސް މުޢިއްޒު މުމްބާއީއަށް މިވަޑައިގަތީ އެސިޓީގައި ބާއްވާ ޚާއްޞަ ވިޔަފާރީގެ ހަރަކާތެއްގައި ބައިވެރިވެވަޑައިގަތުމަށެވެ. އެ ހަރަކާތުގައި މުމްބާއީގެ ބޮޑެތި ވިޔަފާރިތަކާއި އިންވެސްޓްމަންޓު ކުންފުނިތަކުން ބައިވެރިވާނެއެވެ. އަދި އިންޑިއާގެ ބައެއް ސެލެބްރިޓީންވެސް ބައިވެރިވާނެއެވެ.

ވިޔަފާރީގެ މި ޚާއްޞަ ހަރަކާތުގައި ރައީސް މުޢިއްޒު ވާހަކަފުޅު ދެއްކެވުމަށް ވަނީ ހަމަޖެހިފައެވެ. ނިއުދިއްލީގައިވެސް އިއްޔެވަނީ ވިޔަފާރީގެ ޚާއްޞަ ހަރަކާތެއް ބާއްވާފައެވެ.

އިންޑިއާ މޯލްޑިވްސް ބިޒްނަސް ފޯރަމްގެ ނަމުގައި ބޭއްވި ހަރަކާތުގައި ރައީސުލްޖުމްހޫރިއްޔާ ވަނީ ރާއްޖޭގައި އިންވެސްޓްކުރުމަށް ހުރި ފުރުޞަތުތައް ތަފްސީލްކޮށްދެއްވާފައެވެ. ޚާއްޞަކޮށް ޑިޖިޓަލް އިކޮނޮމީއާއި، މާލީ ދާއިރާގެ ފުރުޞަތުތަކުގެ ވާހަކަތަކާއި އިއާދަކުރަނިވި ހަކަތައިގެ ދާއިރާ އެމަނިކުފާނު ފާހަގަކުރެއްވިއެވެ.

މުމްބާއީގައި ބާއްވާ ވިޔަފާރިއާއި ޓޫރިޒަމްގެ ޚާއްޞަ ހަރަކާތުގައި ރައީސުލްޖުމްހޫރިއްޔާގެ އިތުރުން ފަތުރުވެރިކަމާބެހޭ ވަޒީރު އިބްރާހީމް ފައިސަލާއި، ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީންވެސް ވާހަކަފުޅު ދައްކަވާނެއެވެ. ރައީސުލްޖުމްހޫރިއްޔާގެ މި ދަތުރުފުޅުގައި މިއަދު މަހަރާސްޓްރާގެ ގަވަރުނަރާއިވެސް ބައްދަލުކުރައްވާނެއެވެ.

ރައީސުލްޖުމްހޫރިއްޔާ މާދަމާ ވަޑައިގަންނަވާނީ ބެގަލޫރަށެވެ.