ގައިދީންގެ ނުރުހުމުގައި ބޮލާއި ތުނބުޅި ނުބޭލޭނެ ގޮތަށް ޤާނޫނަށް ބަދަލު ގެންނަން އެޗްއާރުސީއެމުން ހުށަހަޅައިފި

ރާއްޖޭގެ ޖަލުތަކުގައި ތިބޭ ފިރިހެން ގައިދީންގެ ބޮލާއި ތުނބުޅި އެމީހެއްގެ ނުރުހުމުގައި ނުބޭލޭނެ ގޮތަށް ޤާނޫނަށް ބަދަލުގެންނަން ހިއުމަން ރައިޓްސް ކޮމިޝަނުން ނިންމައިފިއެވެ.
އަދި އެކޮމިޝަނުން ޤަވާއިދަށް ގެންނަން ބޭނުންވާ ބަދަލުތައް ވަނީ މޯލްޑިވްސް ކަރެކްޝަނަލްސް ސާވިސަސް އަށް ފޮނުވައިފައެވެ. 
އެޗްއާރުސީއެމުން ވަނީ ގައިދީންގެ ބޯކޮށުމާ ގުޅޭ ޤަވާޢިދުތަކަށް އިސްލާހުތަކެއް ހުށަަހަޅައިފައެވެ.
ފިރިހެން ގައިދީންނާއި ޖަލުގައި ބަންދުކުރާ މީހުންގެ ބޯކޮށުމާ ގުޅޭ ޕޮލިސީ ރިވިއު ކަރުދާހުގައި ބުނެފައިވާ ގޮތުގައި އެޗްއާރުސީއެމްގެ މައިގަނޑު ހުށަހެޅުންތަކުގެ ތެރޭގައި ހިމެނެނީ ބޯކޮށުމާއި ތުނބުޅި ބޭލުން ސުލޫކީ މިންގަނޑުގެ ތެރެއިން އުނިކުރުމާއި، މިކަންކަމަކީ ގައިދީންގެ އަމިއްލަ އިހްތިޔާރުގައި ކުރާ ކަމަކަށް ހެދުމެވެ.
 އަދި ރިހެބިލިޓޭޝަން ޕްރޮގްރާމްތަކާއި ޕެރޯލްގެ ފުރުސަތު ދިނުމުގައި އަޚުލާޤީ މިންގަނޑަށް ރިއާޔަތްކުރުމަށް ވެސް ހުށަހަޅާފައިވެއެވެ.

މީގެއިތުރުން، ޞިއްޙީ ސަބަބުތަކަށްޓަކައި މެނުވީ ގައިދީންގެ ނުރުހުމުގައި ބޯކޮށުން މަނާކުރުމަށާއި، ދީނީ ގޮތުން ގަބޫލުކުރާ ކަންކަމަށް އިޙުތިރާމްކޮށް، އެފަދަ ސަބަބުތަކަށްޓަކައި ބޯކޮށުމަށް މަޖުބޫރު ނުކުރުމަށް ހުށަހަޅާފައިވެއެވެ.
އެޗްއާރުސީއެމްގެ މައިގަނޑު ހުށަހެޅުންތަކުގެ ތެރޭގައި ހިމެނެނީ:
·    ބޯކޮށުމާއި ތުނބުޅި ބޭލުން ސުލޫކީ މިންގަނޑުގެ ތެރެއިން އުނިކުރުން.
·    ބޯކޮށުމާއި ތުނބުޅި ބޭލުމަކީ ގައިދީންގެ އަމިއްލަ އިހުތިޔާރުގައި ކުރާ ކަމަކަށް ހެދުން.
·    ރިހެބިލިޓޭޝަން ޕްރޮގްރާމްތަކާއި ޕެރޯލްގެ ފުރުސަތު ދިނުމުގައި އަޙުލާޤީ މިންގަނޑަށް ރިއާޔަތްކުރުން.
·    ޞިއްޙީ ސަބަބުތަކަށްޓަކައި މެނުވީ ގައިދީންގެ ނުރުހުމުގައި ބޯކޮށުން މަނާކުރުން.
·    ދީނީ ގޮތުން ގަބޫލުކުރާ ކަންކަމަށް އިޙުތިރާމްކޮށް، އެފަދަ ސަބަބުތަކަށްޓަކައި ބޯކޮށުމަށް މަޖުބޫރު ނުކުރުން
ހަމައެއާއެކު ޖަލުތަކާއި ޕެރޯލްގެ ޤާނޫނުގެ ދަށުން ގައިދީންގެ ބޯކޮށައި ފިރިހެން ގައިދީންގެ ތުނބުޅި ބޭލުމުގެ އިންތިޒާމު ޖަލުގައި ހަމަޖައްސައިދީފައި ހުންނަންވާނެ ކަމަށް ބަޔާންކުރިޔަސް ބޯކޮށުން އެ ޤާނޫނޫގައި މަޖުބޫރުނުކުރެއެވެ. 
އެކަމަކު، ގައިދީންގެ ސުލޫކީ މިންގަނޑުގައިވާ ގޮތުން ފިރިހެން ގައިދީންނާއި ބަންދުކޮށްފައިވާ މީހުންގެ ބޮލުގެ އިސްތަށިގަނޑު ހުންނަން ވާނީ ދެ ސެންޓިމީޓަރަށް ވުރެ ތުނިކޮށް ކޮށައި އަދި ތުނބުޅިއާ މަތިމަސް ބަހައްޓަން ޖެހޭނީ ބާލާފައި ނުވަތަ ދެ އިންޗިއަށް ވުރެ ދިގުނުވާ ގޮތަށް ކޮށައިފައެވެ.
އެއާ ހިލާފުވާ މީހުންނާ މެދު ޑިސިޕްލިނަރީ ނިޒާމުގެ ތެރެއިން ފިޔަވަޅު އަޅާކަމަށް އެޗްއާރުސީއެމްގެ ކަރުދާހުގައި ބުނެފައިވެއެވެ.