ކޮރަޕްޝަނާއި ދެކޮޅަށް މަސައްކަތް ކުރުމަށް އިންޑިއާއި ރާއްޖެއާއި ދެމެދު އެއްބަސްވުމެއްގައި ސޮއިކޮށްފި!

ކޮރަޕްޝަނާއި ދެކޮޅަށް މަސައްކަތް ކުރުމަށް ރާއްޖެއާއި އިންޑިއާ އާއި ދެމެދު އެއްބަސްވުމެއްގައި މިއަދު ސޮއިކޮށްފިއެވެ. 

ދެ ޤައުމުގެ ދެމެދުގައި ސޮއިކުރެވުނު މި އެއްބަސްވުމަކީ ކޮރަޕްޝަނުގެ ކުށް ތަޙުޤީޤުކުރުމާއި ދަޢުވާކުރުމާއި ގުޅޭ ފަންނީ އެހީތެރިކަން ބަދަލުކުރުމާއި ގުޅޭ އެއްބަސްވުމެކެވެ.

މިއެއްބަސްވުމުގެ ދަށުން 9 ދާއިރާއަކުން ދެޤައުމު ގުޅިގެން މަސައްކަތް ކުރުމަށް ވަނީ ނިންމައިފައެވެ.

އެންޓި-ކޮރަޕްޝަން ކޮމިޝަނާއި އިންޑިއާގެ ސެންޓްރަލް ބިއުރޯ އޮފް އިންވެޓިގޭޝަން (ސީ.ބީ.އައި) އާ ދެމެދު ޤާއިމުކޮށްފައިވާ އެއްބަސްވުމުގެ ދަށުން ކޮރަޕްޝަންގެ ޢަމަލުތައް ހިންގުމުގެ ފުރުސަތު ނުދިނުމަށްޓަކައި ނުވަތަ ޕްރިވެންޝަނަށް ބޭނުންވާ މަޢުލޫމާތު ދެ މުއައްސަސާގެ މެދުގައި ބަދަލުކުރުމަށްވަނީ ހަމަޖެހިފައެވެ.

އަދި ކޮރަޕްޝަނާއި ދެކޮޅަށް މަސައްކަތްކުރުމުގައި ބައިނައިލްއަޤުވާމީ "ބެސްޓް ޕްރެކްޓިސް"ތަކުގެ މަޢުލޫމާތު ބަދަލުކޮށް ދެ މުއައްސަސާ ގުޅިގެން ދިރާސާކުރުމާއި، ތަޢުލީމާއި ތަމްރީނު އަދި ދިރާސާ ހިމެނޭގޮތަށް ކޮރަޕްޝަން ހުއްޓުވުމަށް އެކުގައި މަޝްރޫޢުތަކާއި ޙަރަކާތްތައް ކުރިޔަށްގެންދިޔުމަށްވަނީ ހަމަޖެހިފައެވެ. 

މީގެއިތުރުން ކޮރަޕްޝަންގެ ޢަމަލުތައް ހިންގިޔަ ނުދިނުމަށްޓަކައި އެކަމާ ދެކޮޅަށް ހޭލުންތެރިކުރުމުގެ މަސައްކަތް ކުރުމާއި ކޮރަޕްޝަންގެ ކުށް ތަޙުޤީޤުކުރުމާއި ވިޔަނުދިނުމާއި ދަޢުވާކުރުމާއި ގުޅޭ ފަންނީ އެހީތެރިކަން ފޯރުކޮށްދިނުމާއި މުވައްޒަފުން ތަމްރީނުކުރުމުގެ މަސައްކަތްވެސް ކުރުމަށްވަނީ ނިންމާފައެވެ.

ހަމައެއާއެކު ދެފަރާތުން ގުޅިގެން ކޮރަޕްޝަނާއި ދެކޮޅަށް ފޯރަމްތަކާއި ސެމިނަރތަކާއި ކޮންފަރެންސްތައް ފަދަ ބައްދަލުވުންތައް ބޭއްވުމާއި ކޮރަޕްޝަންގެ ހިރާސް ކުޑަކުރުމަށް ކުރާ މަސައްކަތްތަކުގައި އެއްބާރުލުން ދިނުމާއި ކޮރަޕްޝަނާ ދެކޮޅަށް މަސައްކަތްކުރުމަށް އިންޓަރޕޯލް ފަދަ ބައިނަލްއަޤުވާމީ ނެޓްވަރކްތަކުގެ ބޭނުން އެންމެ ފުރިހަމަ ގޮތުގައި ހިފުމުގައި އެހީތެރިކަން ބަދަލުކުރުމަށް ވަނީ ހަމަޖެހިފައެވެ.

މި އެއްބަސްވުމުގެ ލިޔެކިޔުންތައް ރަސްމީކޮށް ބަދަލުކޮށްފައި މިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޑިއާއަށް ކުރައްވަމުންގެންދަވާ ފުރަމާނަ ދަތުރުފުޅުގެ ތެރޭގައި ބޭއްވެވި ފަހުނަމާ ބަދަލުކުރުމުގެ ރަސްމިއްޔާތުގައެވެ.