މާލޭގެ ގެއަކަށް މީހަކު ވައްދައި ފޭރުނު މައްސަލައެއްގައި ތިން މީހަކަށް ދައުވާކުރަން ފޮނުވައިފި!

މާލޭގެ ގެެއަކަށް މީހަކު ވައްދައި އޭނާއަށް އަނިޔާކޮށް ފޭރުނު މައްސަލައެއްގައި ތިން މީހަކަށް ދައުވާކުރުމަށް ފޮނުވައިފިއެވެ.

މިމައްސަލައަކީ 24 ޖުލައި 2024 ދުވަހުގެ ވަގުތެއްގައި ދިލްބަހާރުމަގު މއ. މަސްފަން ގެ ކައިރީގައި ހުރި މީހަކަށް ގޮވައި އޭނާ އެގެއަށް ވައްދައި ވަޅިން ބިރު ދައްކާ އޮރިޔާންކޮށް އަނިޔާކޮށް އޭނާގެ ފޯނު އަތުލައި އޭނާގެ އެކައުންޓުން ފައިސާ ޓްރާންސްފަރކޮށް އަދި އޭނާގެ ކޭޝް ކާރޑް ބޭނުންކޮށްގެން އޭޓީއެމްއިން ފައިސާ ނަގާފައިވާ މައްސަލައެއް ކަމަށް ޕީޖީ އޮފީހުން ބުނެފައިވެއެވެ.

މީގެއިތުރުން އެމީހުންގެ މައްޗަށް ދަޢުވާ ކުރުމަށް 23 ސެޕްޓެންބަރު 2024 ގައި ކްރިމިނަލް ކޯޓަށް ހުށަހަޅައިފައިވާ ކަމަށްވެސް ޕީޖީ އޮފީހުން ބުނެފައިވެއެވެ.

މިމައްސަލާގައި ދައުވާ ލިބޭ ފަރާތްތަކަކީ:-

1. ސ. ހިތަދޫ، ސޯމާ، ޝަފީޤު އިބްރާހީމް

2. މއ. މަސްފެން، މުޙައްމަދު ރީހާން

3. މއ. މަސްފެން، ޢާއިޝަތު

އެމީހުންގެ މައްޗަށް ކުރާ ދައުވާތަކަކީ:-

1. ދިވެހިރާއްޖޭގެ ޤާނޫނުލްޢުޤޫބާތު ގެ 120 ވަނަ މާއްދާގެ ދަށުން އަނިޔާއެއް ދިނުން

2. ދިވެހިރާއްޖޭގެ ޤާނޫނުލްޢުޤޫބާތު ގެ 232 ވަނަ މާއްދާގެ ދަށުން އެނގިހުރެ ހުއްދަނޫން ގޮތެއްގައި މަޢުލޫމާތު ހޯދުން

3. ދިވެހިރާއްޖޭގެ ޤާނޫނުލްޢުޤޫބާތު ގެ 213 ވަނަ މާއްދާގެ ދަށުން ފޭރުން

ފޭރުމުގެ މިފަދަ މައްސަލަތައް މިދޭތެރެއަކުން މާލެ ތެރޭގައި ވަރަށް ބޮޑަށް އިތުރުވެގެންދިޔައެވެ. އެގޮތުން ގެސްޓުހައުސް ތަކަށް މީހުން ގެންގޮސް އަނިޔާކޮށް ފޭރިފައިއެބަހުއްޓެެވެ.