ތިން ރަށެއްގައި އައިސްޕްލާންޓް ހެދުމަށް އީއައިއޭ ހަދައިދޭނެ ފަރާތެއް ހޯދަނީ!

ތިން ރަށެއްގައި އެޅުމަށް ހަމަޖެހިފައިވާ އައިސްޕްލާޓުގެ އެންވަޔަރަމެންޓަލް އިމްޕެކްޓު އެސެސްމަންޓު (އީއައިއޭ) ހަދައިދޭނެ ފަރާތެއް ހޯދުމަށް މިފްކޯއިން އިޢުލާނުކޮށްފިއެވެ.

މިކަމާގުޅިގެން މިފްކޯއިން އިޢުލާނުކޮށްފައިވަނީ  ދ. މީދޫ، ދ. ބަނޑިދޫ އަދި ށ. ފުނަދޫގައި އައިސްޕްލާންޓް އެޅުމަށް ބޭނުންވާ އީއައިއޭ ހެދުމަށެވެ.

މިފްކޯއިން ވަކިވަކިން ކުރި އިޢުލާނުތަކުގައި ބުނެފައިވަނީ، މި ތިން ރަށުގައި އަލަށް ގާއިމްކުރާ އައިސް ޕްލާންޓުތަކުގައި 30 ޓަނު އަދި އައިސް ސްޓޯރޭޖްގައި 50 ޓަނު ހުންނާނެކަމަށެވެ.

އެހެންކަމުން މި މަސައްކަތަށްޓަކައި އީއައިއޭ ހަދައިދޭނެ ފަރާތްތަކުން ޕްރޮޕޯސަލް ހުށަހެޅުމުގެ ފުރުޞަތު މިފްކޯއިން ވަނީ ހުޅުވާލާފައެވެ.

ޕްރޮޕޯސަލް ހުށަހެޅުމުގެ ސުންގަޑިއަކީ މިމަހުގެ 14 ވަނަ ދުވަހުގެ 13:00 ގެ ކުރިންނެވެ. ބިޑު ހުޅުވުން އޮންނާނީ 14 ވަނަ ދުވަހުގެ 14:00 ގައި ކަމަށް މިފްކޯގެ އިޢުލާނުގައިވެއެވެ.