ވަގުޕާސްޕޯޓާއި އެކު މިއަހަރު ރާއްޖެއަށް އެތެރެވާން އުޅުނު 27 މީހަކު އަތުލައިގެންފައިވޭ!

ވަގުޕާސްޕޯޓުގައި ރާއްޖެ އެތެރެވާން އުޅުން 27 މީހަކު މިއަހަރުގެ މިހާތަނަށް އަތުލައިގެންފައިވާ ކަމަށް މޯލްޑިވްސް އިމިގްރޭޝަނުން ހާމަކޮށްފިއެވެ.

އިމިގްރޭޝަނުން ހާމަކޮށްފައިވާ ތަފާސްހިސާބު ތަކުގައި ބުނެފައިވަނީ ނިމިދިޔަ ސެޕްޓެންބަރުގެ ނިޔލަަށް 27 މީހަކު ވަނީ ވަގު ޕާސްޕޯޓް ބޭނުންކޮށްގެން ރާއްޖެ އެތެރެވާން މަސައްކަތްކޮށްފައި ކަމަށެވެ. 

އެގޮތުން ފުރަތަމަ ކުއާޓާގައި ކައުންޓާފީޓް ޕާސްޕޯޓުގެ 6 މައްސަލަ ރިކޯޑް ކުރެވުނުއިރު ދެވަނަ ކުއާޓާގައި 16 އަދި ތިންވަނަ ކުއާޓާގައި 5 މައްސަލަ ވަނީ ރިކޯޑްކޮށްފައެވެ.

މި މުއްދަތުގައި އަތުލައިގަނެވުނު މީހުންގެ ތެރޭގައި ހިމެނެނީ ކައުންޓަފީޓް ޕާސްޕޯޓް ބޭނުންކުރި 27 މީހަކާއި، ކައުންޓަފީޓް އައިޑީ ބޭނުންކުރި ދެ މީހުން، ކައުންޓަފީޓް ބަޔޯ ޕޭޖް ބޭނުންކުރި 3 މީހަކާއި، ފެންޓަސީ ޕާސްޕޯޓް ބޭނުންކުރި އެކަކެވެ. މީގެ އިތުރުން އިމްޕޯސްޓަރުންގެ ގޮތުގައި 5 މީހަކު ވެސް ހިމެނެއެވެ.

ހަމަމިއާއި އެކު މިމުއްދަތުގައި ކައުންޓަފީޓް ވިސާ ބޭނުންކުރި 2 މީހަކާއި، ކައުންޓަފީޓް ސްޓޭމްޕް ބޭނުންކުރި 4 މީހަކު ވެސް އަތުލައިގަނެވުނެވެ.

އިމިގްރޭޝަނުން އިތުރަށް ބުނެފައިވަނީ، އެކި ގޮތްގޮތަށް އޮޅުވާލައިގެން ރާއްޖެއަށް އެތެރެވާން ގިނައިން މަސައްކަތް ކޮށްފައިވަނީ މެދުއިރުމަތިން އައި މީހުންކަމަށެވެ. އަދި އެމީހުން ޔޫރަޕަށް އެތެރެވުމަށް ރާއްޖެ ބޭނުންކުރަނީ ޓްރާންސިޓްވާ ޤައުމެއްގެ ގޮތުގައި ކަމަށްެވެސް ވަނީ ބުނެފައެވެ.

އިމިގްރޭޝަނުން އިތުރަށް ބުނީ، އެކި ގޮތްގޮތަށް ރާއްޖެއަށް އެތެރެވާން އުޅުނު މި 45 މީހުން، ރާއްޖެއަށް އައި ފްލައިޓްތަކުން އަނބުރާ އެ ޤައުމުތަކަށް ފޮނުވާލާފައިވާ ކަމަށެވެ.

މީގެއިތުރުން 2023 ވަނަ އަހަރު ފަހު ކުއާޓާގައި ކައުންޓާފީޓް 4 ޕާސްޕޯޓާއި ކައުންޓާފީޓް ރެސިޑެންޓު ކާޑެއް ގެންގުޅުނު މީހަކު ވަނީ އަތުލައިގެންފައެވެ. އެމީހުންވެސް އަނބުރާ ޤައުމަށް ފޮނުވާލެވުނެވެ.