ބ. ކެންދޫގައި ފެނާއި ނަރުދަމާ ނިޒާމު ޤާއިމުކޮށް ނިމިއްޖެ

މާލޭ ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިޔުއެސްސީ) އިން ބ. ކެންދޫގައި ކުރިއަށް ގެންދިޔަ ފެނާއި ނަރުދަމާ ނިޒާމު ޤާއިމްކުރުމުގެ މަސައްކަތްތައް ނިންމައި ކޮމިޝަންކޮށްފިއެވެ. މި މަޝްރޫޢު ކޮމިޝަންކުރުމުގެ މަސައްކަތް ކުރިއަށް ގެންދިޔައީ އިމާރާތްކުރުމާއި ގެދޮރުވެރިކަމާއި ބިނާވެށި ބެހޭ ވުޒާރާއާއި، ފެނަކަ އަދި އެމްޑަބްލިޔުއެސްސީގެ އިސް ބޭފުޅުން ކެންދޫއަށް ވަޑައިގެންނެވެ.

މި މަޝްރޫޢުގެ ދަށުން، ކެންދޫގައި ފެނުގެ ނިޒާމު ޤާއިމްކުރުމަށްޓަކައި ފެން ޕްލާންޓް ބެހެއްޓުމަށް އިމާރާތްކުރެވުނު ފެސިލިޓީ ބިލްޑިންގ ޤާއިމްކޮށް، ފެނުގެ މައި ނެޓްވޯކް އަޅައި، އަދި ގޭގެއަށް ފެނުގެ ކަނެކްޝަން ގުޅައިދީފައިވެއެވެ. އަދި ފެން އުފެއްދުމަށްޓަކައި ފެން ޕްލާންޓް ބަހައްޓައި، ބައި، ބޯހޯލް ތޮރުފައި، ރިޖެކްޓް ލައިން އަޅައި، އަދި ފެން ރައްކާކުރުމަށް ފެންތާނގީ ބަހައްޓާފައިވާކަމަށް އެމްޑަބްލިޔުއެސްސީން މަޢުލޫމާތު ދެއެވެ.

ނަރުދަމާ ނިޒާމު ޤާއިމްކުރުމުގެ މަސައްކަތުގެ ދަށުން، ނަރުދަމާގެ މައި ނެޓްވޯކާއި ޕަމްޕިންގ ލައިން އަޅައި، ޕަންޕިންގ ސްޓޭޝަން ޤާއިމްކޮށް، ސީ އައުޓްފޯލް އަޅައި، އަދި ގޭގޭގައި ޖަންކްޝަން ބަހައްޓައި ނަރުދަމާގެ ކަނެކްޝަން ގުޅައިދީފައިވެއެވެ. މީގެ އިތުރުން، ފެން ތަޙުލީލުކުރުމަށް ބޭނުންވާ ސާމާނާއި ނަރުދަމާ ނިޒާމު ހިންގައި ބެލެހެއްޓުމަށް ބޭނުންވާ ވެހިކަލް ފޯރުކޮށްދޭނެ ކަމަށްވެސް އެމްޑަބްލިޔުއެސްސީން ބުނެފައިވެއެވެ.

MWSC has successfully completed the testing and commissioning of B. Kendhoo Water and Sewerage Project.#MWSCAsaasee #TeamMWSC pic.twitter.com/m3TopYMlZq

— Male' Water and Sewerage Company Pvt. Ltd. (@MWSC_Official) May 23, 2025

އިމާރާތްކުރުމާއި ގެދޮރުވެރިކަމާއި ބިނާވެށި ބެހޭ ވުޒާރާގެ ފަރާތުން އެމްޑަބްލިޔުއެސްސީއާ ހަވާލުކޮށްގެން ކުރިއަށް ގެންދިޔަ މި މަޝްރޫޢަށް 56.26 މިލިއަން ރުފިޔާ ޚަރަދުކޮށްފައިވެއެވެ. މި މަޝްރޫޢުގެ ސަބަބުން ކެންދޫގެ ރައްޔިތުންނަށް ސާފު ބޯފެނާއި ރައްކާތެރި ނަރުދަމާ ނިޒާމެއް ލިބިގެންދާނެ ކަމަށް އެމްޑަބްލިޔުއެސްސީން ފާހަގަކޮށްފައިވެއެވެ.