ޒިންމާދާރު ޤައުމަކުން ހަތިޔާރު ނެތް އާންމުންނާ ދެކޮޅަށް ހަނގުރާމައެއް ނުކުރާނެ: އިސްރާއީލުގެ ކުރީގެ ޑެޕިއުޓީ ޗީފް އޮފް ސްޓާފް

ޣައްޒާގައި އިސްރާއީލުން ހިންގަމުންދާ އަސްކަރީ ޙަމަލާތަކާ ގުޅޭގޮތުން އިސްރާއީލުގެ ކުރީގެ ޑެޕިއުޓީ ޗީފް އޮފް ސްޓާފް އަދި އިދިކޮޅު ލީޑަރު ޔައިރު ގޯލަން ވަނީ ސަރުކާރަށް ހަރުކަށި އިބާރާތުން ފާޑުކިޔައިފައެވެ. އޭނާ ބުނި ގޮތުގައި އިސްރާއީލުން ފަލަސްތީނުގެ ކުޑަކުދިން މަރަނީ މުނިފޫހިފިލުވުމުގެ ގޮތުންނެވެ.

ނޫސްވެރިންގެ ބައްދަލުވުމެއްގައި ގޯލަން ވަނީ އިސްރާއީލުގެ ވެރިންނަށް ފާޑުކިޔައި، ޣައްޒާގައި ވައިގެ ހަމަލާތައް އިތުރުވަމުން ދިޔުމާއެކު އާންމު ރައްޔިތުންގެ ފުރާނައަށް އަޅާނުލާކަމަށް ބުނެފައެވެ. އޭނާ ބުނި ގޮތުގައި ޒިންމާދާރު ޤައުމަކުން ހަތިޔާރު ނެތް އާންމުންނާ ދެކޮޅަށް ހަނގުރާމައެއް ނުކުރާނެއެވެ. އަދި ކުޅިވަރެއްގެ ގޮތުން ކުޑަކުދިން ނުމަރާނެއެވެ.

މި ބަސްތައް އައިސްފައިވަނީ ޣައްޒާގައި މަރުވާ މީހުންގެ އަދަދު އިތުރުވަމުންދާތީ ބައިނަލްއަޤްވާމީ ފެންވަރުގައި ކަންބޮޑުވުން ފާޅުކުރަމުންދާ ދަނޑިވަޅެއްގައެވެ. މިހާތަނަށް 10،000 އަށްވުރެ ގިނަ ފަލަސްތީނު ރައްޔިތުން މަރުވެފައިވާ ކަމަށާއި އަދި އެތައް  ހާހެއްގެ މީހުން ގޭދޮރު ދޫކޮށް ދާންޖެހިފައިވާ ކަމަށް ރިޕޯޓުތަކުން ދައްކައެވެ.

ގޯލަން އިންޒާރުދިން ގޮތުގައި އިސްރާއީލުގެ މި ޢަމަލުތަކުގެ ސަބަބުން އެޕާޓައިޑް ދުވަސްވަރުގެ ދެކުނު އެފްރިކާއެކޭ އެއްފަދައިން އިސްރާއީލު ދުނިޔޭގެ އެކަހެރިވެގެންދާނެއެވެ.
ވަކި އިންޓަވިއުއެއްގައި، މުސްކުޅި އިސްރާއީލްގެ ޖެނެރަލެއް ވެސް ވަނީ ގޯލަންގެ ކަންބޮޑުވުންތަކަށް އަޑުއުފުލައި، އަސްކަރީ އޮޕަރޭޝަންތަކުގައި އަޚްލާޤީ އަދި ސްޓްރެޓެޖިކް ޖަސްޓިފިކޭޝަނެއް ނެތް ކަމަށް ބުނެފައެވެ. "ގިނަ އަދަދެއްގެ މީހުން މެރުމާއި ގޭދޮރުން ނެރުމަކީ ޑިމޮކްރެޓިކް ދައުލަތެއްގެ މަސްލަހަތަށް ކުރެވޭ ކަމެއް ނޫން،" އޭނާ ބުންޏެވެ. "މި ޢަމަލުތަކުގެ ސަބަބުން ދުނިޔޭގެ ނަޒަރުގައި އިސްރާއީލު ފެންނާނީ ޤާނޫނާ ޚިލާފު ދައުލަތެއްގެ ގޮތުގައެވެ."

އާންމުންނަށް އަމާޒުކޮށް ހަމަލާދިނުމާއި ގިނަ އަދަދެއްގެ މީހުން ގޭދޮރުން ނެރުމަކީ ބައިނަލްއަޤްވާމީ އިންސާނީ ޤާނޫނުތަކާ ޚިލާފު ކަމެއްކަމަށް ޖެނެރަލް ބުންޏެވެ. އޭނާ އިތުރަށް ބުނި ގޮތުގައި ޑިމޮކްރެޓިކް އަދި ޤާނޫނީ ދައުލަތެއް ކަމަށް ބުނާ ޤައުމަކުން ކުޑަކުދިން މެރުމުގައި އަދި އާންމު ރައްޔިތުން ގަސްދުގައި ގެދޮރުން ނެރުމުގެ ސިޔާސަތުތަކުގައި ބައިވެރިވެގެން ނުވާނެއެވެ.

ގޯލަން އިތުރަށް އިންޒާރު ދިން ގޮތުގައި އިސްރާއީލުން މިހާރު މި ދާ މަގުން ކުރިއަށް ދާނަމަ، އަދި ހަނގުރާމަ ހުއްޓާލުމަށް އެއްބަސް ނުވާނަމަ، ދެކުނު އެފްރިކާގެ އެޕާޓައިޑް ވެރިކަމުގެ ދުވަސްވަރު އެ ޤައުމާ މެދު ގެންގުޅުނު ފަދަ ދުނިޔޭގެ ބޮއިކޮޓަކާ ކުރިމަތިލާން ޖެހިދާނެ ކަމަށެވެ. އޭނާ އިންޒާރު ދިން ގޮތުގައި ދުނިޔެ މި ކަންކަމަށް ބަލަމުންދަނީ ކެތްތެރިކަން ނެތެމުންދާ ހާލުގައެވެ.