ކުނިއުކާލާ ގަޑިތަކާއި މުދާ އުފުލާ ގަޑިތަކަށް ބަދަލުގެންނަނީ!

މާލެ ސަރަހައްދުގައި ކުނި އުކާލާ ގަޑިތަކާއި މުދާ އުފުލާ ގަޑިތަކަށް ބަދަލު ގެނައުމަށް ދަތުރުފަތުރާއި މަދަނީ އުދުހުންތަކާއި ބެހޭ ވުޒާރާއިން ނިންމައިފިއެވެ.

މިކަމާ ގުޅިގެން އެވުޒާރާއިން ބުނެފައިވަނީ އެވުޒާރާއިން ގެނައުމަށް ނިންމައިފައިވާ ބަދަލާއިއެކު ކުނި އުކާލުމުގެ ވަގުތު ރޭގަނޑު 10:00 އިން ފެށިގެން ފަތިހު 5:00 އަށް ބަދަލުކުރެވޭނެކަމަށެވެ.

މާލެފަހި ޕްރޮގްރާމްގައި ހިމަނައިގެން ގެންނަ މި ބަދަލަކީ މަގުމަތީގެ ތޮއްޖެހުން ކުޑަކުރުމަށްޓަކައި މިވަގުތު ގެންނަން ޖެހިފައިވާ މުހިންމު ބަދަލެއް ކަމުގައިވާތީކަމަށާއި، މާލޭގެ މަގުތަކުގައި ދުވާލުގެ ވަގުތުތަކުގައި އުޅަނދުފަހަރުގެ ދަތުރުފަތުރު އިތުރުވެފައިވާތީ، ކުނި އުކާލުމުގެ މަސައްކަތް ރޭގަނޑުގެ ވަގުތުތަކަށް ބަދަލުކުރުމަކީ އެންމެ އެކަށީގެންވާ ގޮތް ކަމުގައި ޤަބޫލުކުރާކަމަށް އެ ދަތުރުފަތުރާ ބެހޭ ވުޒާރާއިން ވަނީ ބުނެފައެވެ.

މި އައު އުސޫލު ތަންފީޒުކުރުމުގައި ތިމާވެއްޓާ ބެހޭ ވުޒާރާއާއި، ކަމާ ގުޅުންހުރި އެހެނިހެން މުއައްސަސާތައް ވެސް ބައިވެރިވާނެކަމަށް ދަތުރުފަތުރާބެހޭ ވުޒާރާއިން ވަނީ ބުނެފައެވެ.

މީގެ ތެރޭގައި މާލެ ސިޓީ ކައުންސިލް އަދި ވޭސްޓް މެނޭޖްމަންޓް ކޯޕަރޭޝަން (ވެމްކޯ) ހިމެނޭކަމަށް ދަތުރުފަތުރާއި ބެހޭ ވުޒާރާއިން ބުނެއެވެ.

ހަމަމިއާއެކު، މި ޕްރޮގްރާމްގެ ދަށުން، ވަކި ސައިޒަކަށްވުރެ ބޮޑެތި އުޅަނދުފަހަރުން މުދާ އުފުލުމުގެ ގަޑިތައް ރޭގަނޑު 8:00 އިން ފެށިގެން ފަތިހު 5:00 އަށް ބަދަލުކުރުމަށް ނިންމާފައިވާއިރު، މި ގޮތަށް ބަދަލުކުރުމަށް ނިންމާފައިވަނީ މި ބަދަލަކީ މަގުމަތީގެ ތޮއްޖެހުން ކުޑަކުރުމަށް މިވަގުތު ގެންނަން ޖެހިފައިވާ މުހިންމު ބަދަލެއް ކަމަށް ވާތީ ކަމަށް އެ ވުޒާރާއިން ހާމަކުރެއެވެ.

މި ބަދަލު ގެނައުމުން މާލެ ސަރަހައްދުގެ ޓްރެފިކް މައްސަލައަށް ފާހަގަކުރެވޭ ލުޔެއް ލިބޭނެކަމަށް އުންމީދުކުރާކަމަށާއި، ދުވާލުގެ ވަގުތުތަކުގައި މަގުމަތީގައި ދުއްވާ ބޮޑެތި އުޅަނދުފަހަރުގެ އަދަދު މަދުވުމުން، އާންމު ރައްޔިތުންނަށް ފަސޭހަ ކަމާއިއެކު ހިނގާބިނގާވެ ދަތުރުފަތުރު ކުރެވޭނެކަމަށް އެ ވުޒާރާއިން ހާމަކުރެއެވެ.

ދަތުރުފަތުރާ ބެހޭ ވުޒާރާއިން ހާމަކުރިގޮތުގައި، މި މަސައްކަތް ކުރިއަށް ގެންދާނީ ވިޔަފާރިއާ ބެހޭ ވުޒާރާ އާއި، ކަމާ ގުޅުންހުރި އެހެނިހެން ސަރުކާރުގެ އިދާރާތަކާ ގުޅިގެން، މި ބަދަލު ގެނައުމުގެ ކުރިން ހުރިހާ ފަރާތްތަކާ މަޝްވަރާ ކުރުމަށްފަހުގައި ކަމަށް ދަތުރުފަތުރާ ބެހޭ ވުޒާރާއިން ބުނެއެވެ.