ދިވެހި އަސްކަރިއްޔާއަށް ބޭރުގެ އެއްވެސް ނުފޫޒެއް މިހާރު ނޯންނާނެ: ވަޒީރު ޣައްސާން

ދިވެހި އަސްކަރިއްޔާއަށް ބޭރުގެ އެއްވެސް ޤައުމެއްގެ ނުފޫޒެއް މިހާރު ނޯންނާނެ ކަމަށް ދިފާޢީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ. 

ރައީސުލްޖިުމްހޫރިއްޔާ ޑރ މުޙައްމަދު މުޢިއްޒުގެ އަރިހުގައި އަވަށްޓެރި އިންޑިއާ އަށް ކުރެއްވެވި ދަތުރުފުޅުގެ ތެރެއިން މީޑިއާ ތަކަށް ދެއްވި އިންޓަރވިއުއެއްގައިި ދިފާއީ ވަޒީރު ޣައްސާން ވިދާޅުވީ މިހާރު ރާއްޖޭގެ އަސްކަރީ ދާއިރާއިން ހިނގާ ހުރިހާ ހަރަކާތެއްގެވެސް ބާރު އޮންނާނީ ދިވެހިންގެ އަތުގައި ކަމަށެވެ. އަދި ބޭރުގެ އެއްވެސް ޤައުމަކަށް އަސްކަރީ ގޮތުންވެސް ދިފާއީ ގޮތުންވެސް އެއްވެސް ނުފޫޒެއް އެކަން ކަމަށް ނުފޯރުވޭނެ ކަމަށް ވަޒީރު ޣައްސާން ވިދާޅުވިއެވެ. 

ރައީސްގެ ދަތުުރުފުޅާ މެދު ވާހަކަދައްކަވަމުން ޣައްސާން ވިދާޅުވީ ރައީސްގެ މި ދަތުރުފުޅު ވަރަށް ކާމިޔާބު ކަމަށެވެ. އަދި ދިވެހި  ރައްޔިތުންނަށް ފައިދާވާނެ ވަރަށް ގިނަ ކަންކަން، އެމަނިކުފާނުގެ ބުރަ މަސައްކަތްޕުޅުން ހާސިލްކޮށްދެއްވާފައިވާ ކަމަށްެވެސް ޣައްސާން ވިދާޅުވިއެވެ.

އެގޮތުން ރާއްޖޭގެ މިނިވަންކަމާއި، ސިޔާދަތާއި، އިސްތިޤްލާލަށް ޒައްރެއްގެ މިންވަރުވެސް ބުރޫ އަރާފާނެ ކަމެއް މި ދަތުރުފުޅުގައި ވެސް އަދި އެހެން ދަތުރުފުޅެއްގައިވެސް ރައީސް މުޢިއްޒު ކުރައްވާފައި ނުވާ ކަމަށް ޣައްސާން ވިދާޅުވިއެވެ.

ދިފާއީ ވުޒާރާގެ ދަށުން ހިންގާ އެމްއެންޑީއެފްގެ ޤާބިލިއްޔަތުކަން އިތުރު ކުރުމުގެ މަސައްކަތް ރައީސް ކުރައްވަމުން ގެންދަވާއިރު، މި ދަތުރުފުޅުގައި ވެވުނު އެއްބަސްވުންތަކުގައިވެސް އޮތީ ރާއްޖެއިން އެދޭ ހާލަތްތަކުގައި އެެދޭ ގޮތަކަށް، ދިވެހި އަސްކަރިއްޔާގެ ޤާބިލިއްޔަތުކަން އިތުރު ކުރެވޭނެ ގޮތަށް ކަމަށް ވަޒީރު ވިދާޅުވިއެވެ.

އަދި އެއްވެސް ވަރަކަށް، އެމްއެންޑީއެފްގެ ޒިންމާތައް އެހެން އެއްވެސް ޤައުމަކާއި ހަވާލު ކުރާ ވާހަކައެއް ދެކެވިފައި ނުވާ ކަމަށްވެސް ދިފާއީ ވަޒީރު ވިދާޅުވެފައި ވެއެވެ.

"ރައީސުލްޖުމްހޫރިއްޔާ އިންޑިއާގެ ބޮޑުވަޒީރާއި އެއްކޮށް ބޭއްވެވި ބަސްދީގަތުމުގައި ހާމަކުރެއްވި ޑޮކިއުމެންޓަކީ ވާހަކަ ދެކެވުނު އެއްބަސްވެވުނު ކަންތައްތައް، އެއްވެސް ސިއްރެއް، ރައީސުލްޖުމްހޫރިއްޔާއެއް ދިވެހި ރައްޔިތުންގެ ކިބަޔަކުން ނުހިފަހައްޓަވާނެ” ޣައްސާން ވިދާޅުވިއެވެ.

މިހާރު ރާއްޖޭގައި ބޭރުގެ އަސްކަރީ ބަޔަކު ނުތިބޭނެ ކަމަށާއި، މިހާރު ރާއްޖޭގައި ތިބީ ބޭރުގެ މަދަނި މީހުން ކަަަމަށްވެސް ޣައްސާން ވިދާޅުވެފައި ވެއެވެ.

އަދި މިހާރު މަސައްކަތް ކުރާނީ ހުރިހާ ޤައުމުތަކާއި އެެކީގައި އެ މީހުންނަށް ބަރޯސާ ވެގެން ނޫން ކަމަށްވެސް ވަޒީރު ވިދާޅުވެފައި ވެއެވެ.