އިންޑިއާއި ރާއްޖެއާއި ދެމެދު މިހާރު އޮތް ގުޅުމުގައި ފޮރުވާނެ އެއްވެސް ކަމެއް ނެތް: ވަޒީރު ޚަލީލް

އިންޑިއާއި ރާއްޖެއާއި ދެމެދު މިހާރު އޮތް ގުޅުމުގައި ފޮރުވައި ސިއްރުކުރަންޖެހޭ އެއްވެސް ކަމެއް ނެތް ކަމަށް ޚާރިޖީ ވަޒީރު ޑރ ޢަބްދުﷲ ޚަލީލް ވިދާޅުވެއްޖެއެވެ. 

ވަޒީރު ޚަލީލް މިހެން ވިދާޅުވީ ރައީސުލްޖުމްހޫރިއްޔާގެ އަރިހުގައި އިންޑިޔާއަށް ކުރެއްވި ދަތުރުފުޅުގައި މީޑިއާތަކަށް ދެއްވި ބަސްދީގަތުމެއްގައެެވެ. ވަޒީރު ޚަލީލް ވިދާޅުވީ އިންޑިއާއަށް ކުރެއްވެވި ދަތުރުފުޅުގައި ކުރައްވަމުންގެންދަވާ އެއްވެސް ކަމެއްގައި ފޮރުވައި ސިއްރުކުރަން ޖެހޭ އެއްވެސް ކަމެއް ނޯންނާނެ ކަމަށެވެ.

ޚަލީލް ވިދާޅުވެފައިވަނީ ރައީސް މުޢިއްޒުގެ މިދަތުރުފުޅުގައި ދެކަމެއް ފާހަގަކުރެވިގެން ގޮސްފައިވާ ކަމަށެވެ. އޭގެ ތެރެއިން އެއްކަމަކީ ރިޔާސީ ކެމްޕެއިންތެރޭގައި އެމަނިކުފާނު ދެއްކެވިި ވާހަކަފުޅުތަކުގެ މަތީ ދެމިހުންނަވައިގެން އެ ވާހަކަތަކާ އެއްގޮތަށް ރައްޔިތުންނަށް ރަނގަޅުގޮތް ހޯދުމަށްޓަކައި މަސައްކަތް ކުރައްވަމުން ގެންދަވާ ކަން ކަމަށް ޚަލީލް ވިދާޅުވިއެވެ.

ޚަލީލު ވިދާޅުވީ ރައީސް މުއިއްޒުއަކީ އެމަނިކުފާނު ކަމެއް ކުރައްވާނެ ކަމަށް ވިދާޅުވެއްޖެނަމަ އެގޮތަކަށް ޢަމަލުކުރައްވާނެ ބޭފުޅެއްކަން އިންޑިއާގެ އިސްވެރިންނަށް އެނގި ވަޑައިގަންނަވާނެކަމަށެވެ.  އެހެންކަމުން ރައީސް މުއިއްޒުއަށް އިންޑިއާއިން އެހާ ހޫނު މަރުޙަބާއެއް ދެންނެވީ ދިވެހި ސަރުކާރަކީ ރައްޔިތުންގެ މަންފާއަށްޓަކައި ރައްޔިތުންނަށް ފައިދާކުރާ ގޮތަށް އަދި އިންޑިއާއަށްވެސް ފައިދާވާ ގޮތަށް ޢަމަލުކުރައްވާނޭ ސަރުކާރެއްކަން އިންޑިއާ ސަރުކާރުން ޤަބޫލުކުރައްވާތީ ކަމަށް ވަޒީރު ވަނީ ވިދާޅުވެފައެވެ.

"ފޮރުވާނެ އެއްވެސް ކަމެއް ނެތް މިގުޅުމުގެ ތެރޭގައި، އިންޑިއާއަކީ ޒަމާނުއްސުރެ ރާއްޖެއާ އެންމެ ގާތްކޮށް އަބަދުވެސް މަސައްކަތްކުރާ ޤައުމެއް. ރާއްޖެއަށް ދިމާވާ ކޮންމެ ހާލަތެއްގައި އެންމެ ބޮޑަށް އެހީތެރިވެދޭ އެއް ޤައުމު. ރާއްޖެއަށް ދިމާވާ ކޮންމެ ގޮންޖެހުމެއްގައި އެންމެ ކުރިޔަށް ނުކުންނަ ޤައުމު. އެ ޙަޤީޤަތް ބަދަލެއް ނުކުރެވޭނެ." ޚަލީލު ވިދާޅުވިއެވެ.

މީގެ ކުރީ ސަރުކާރުތަކުން ރައްޔިތުންނަށް ކަންތައްތައް ފޮރުވަން ހަދައިގެން ނުކިއްސަރު އެތައް ކަމެއް ކޮށްފައި ހުރި ކަމަށް ވަޒީރު ވިދާޅުވިއެވެ. 

ނަމަވެސް މި ސަރުކާރުން ބޭނުމީ ދެޤައުމު ގުޅިގެން އިޚުލާސްތެރި މަސައްކަތްތަކެއް ކުރަމުންދާކަން ރައްޔިތުންނަށް ދެއްކުން ކަމަށް ވަޒީރު ވަނީ ވިދާޅުވެފައެވެ.

އިންޑިއާ ސަރުކާރާއެކު ކުރެވުނު މަޝްވަރާތަކުގައި ވިޝަން ޑޮކިއުމަންޓު ކިޔާ ޑޮކިއުމެންޓެއް އުފެދިގެން ދިޔަކަން ފާހަގަކުރައްވަމުން ޙަލީލު ވިދާޅުވީ މިއީ ވަރަށް ބޮޑަށް ވާހަކަ ދެކެވިގެން ދެ ޤައުމުން އެއްބަސްވެގެން ކުރެވުނު މަސައްކަތެއް ކަމަށެވެ.