ކުރިއަށް އޮތް ހަތަރުދުވަހުވެސް ރާއްޖޭގެ މޫސުން ގޯސް، ސަމާލުވޭ!

ކުރިއަށް އޮތް ހަތަރުދުވަހުވެސް ރާއްޖޭގެ މޫސުން ގޯސްވާނެ ކަމަށް މޫސުމާއި ބެހޭ ޤައުމީ އިދާރާއިން ބުނެފިއެވެ. 

މެޓް އޮފީހުން ބުނެފައިވަނީ ރާއްޖޭގެ ސަރަހައްދުގައި ހުޅަނގު މޫސުމުގެ ބާރުގަދަވެ، ރާއްޖެ އާ ދުރުން އުތުރާއި ދެކުނުގައި ދެ ކޮޅިގަނޑު އުފެދިފައިވާ ކަމަަށެވެ. 

އަދި ވޭތުވެދިޔަ 4 ދުވަހު އުތުރާއި މެދު ރާއްޖެތެރޭގެ ސަަރަހައްދަށް އާއްމުވައި ގަދަވެ، ވިލާގަނޑުގައި ވައި ވަރަށް ގަދަވެފައިވާ ކަމަށް މެޓުން ވަނީ ބުނެފައެވެ.

އެގޮތުން ވިލާގަނޑުގައި އެންމެ ވައިގަދަވިކަމަށް ރެކޯޑް ކުރެެވުނީ ބ. ދަރަވަންދޫ އާއި ހުޅުލެއަށް ކަމަށާއި، އެއީ ރޭ 23:10 ހާއިރު ގަޑިއަކު 55 މޭލު ބާރުމިނަށް، އަދި ހުޅުލެއަަށް މިއަދު 5:40ގައި ގަޑިއަކު 58 މޭލަށް އަދި 10:46 ހާއިރު 61 މޭލު ބާރުމިނުގައި ކަމަށް މެޓް އޮފީހުން ވަނީ ބުނެފައެވެ. 

 އަދި މި މުއްދަތުގައި އެންމެ ބޯކޮށް ވާރޭ ވެހިފައިވާ ކަމަށް ރެކޯޑް ކުރެވިފައި ވަނީ މިދިޔަ އަންގާރަ ދުވަހު ފުވައްމުލަށް ސީޓީއަށް ކަމަށާއި، އެއީ 120 މިލިމީޓަރުގެ ވާރޭ ކަމަށްވެސް މެޓުން ބުނެއެވެ.

މެޓުން ބުނެފައިވަނީ، މޫސުން ކުރިއަށް ލަފާ ކުރާގޮތުގައި ރާއްޖޭގެ ހުރިހާ ސަރަހައްދަކަށްވެސް ހޯމަ ދުވަހާއި ހަމައަށް އާއްމު ވައި ގަދަކޮށް ހިފަހައްްޓާނެ ކަމަށް ލަފާ ކުރެވޭ ކަމަށެވެ. އެގޮތުން އުުތުރާއި މެދު ރާއްޖެތެރޭގެ އަތޮޅުތަކުގައި އެވްރޭޖްކޮށް ގަޑިއަކު 15 މޭލާއި 20 މޭލާއި ދެމެދު ވައިޖެހި، ބޮޑުބަޔަކަށް ގަދަވަޔާއެކު ވިއްސާރަކޮށް ގުގުރާނެ ކަަމަށްވެސް ލަފާ ކުރެވޭ ކަމަށްވެސް އެއިދާރާއިން ބުނެފައިވެއެވެ.

 މީގެއިތުރުން ދެކުނުގެ އަތޮޅުތަކުގައި އެވްރެޖްކޮށް ގަޑިއަކު 10 މޭލާއި 20 މޭލާ ދެމެދު ބާރުމިނުގައި ވައިޖެހޭނެ ކަމަށް ބެލެވޭ ކަމަށާއި، ބައެއް އަތޮޅުތަކަށް ގަދަވަޔާއެކު ވިއްސާރަކޮށް، ގުގުރާނެ ކަމަށް ލަފާ ކުރެވޭ ކަމަށްވެސް މެޓް އޮފީހުން ބުނެފައިވެއެވެ.

މޫސުމާ ބެހޭ ޤައުމީ އިދާރާއިން ބުނެފައިވަނީ، ވިލާގަނޑުގައި ހުރިހާ ހިސާބަކަށްވެސް ގަޑިއަކު 45 މޭލާއި 55 މޭލަށް ވައިގަދަވެ، ރާއްޖޭގެ ބަޮޑުބަޔަކަށް ގަދަވަޔާއެކު ވިއްސާރަކޮށް ގުގުރާނެ ކަމަަށް ލަފާ ކުރެވޭ ކަމަށެވެ. އަދި އާއްމުކޮށް އުދައަރާ ސަރަހައްދުތަކަށް ދިޔަވަރު ބޮޑުވާ ގަޑިތަކުގައި އުދައިގެ އަސަރު ކުރުން އެކަށީގެންވާ ކަމަަށްވެސް އެއިދާރާއިން ބުނެފައިވެއެވެ.

"ގަދަވަޔާއެކު ކަނޑުތައް ގަދަވެ، ބޯކޮށް ވާރޭވެހޭނެ ކަމަށް ލަފާ ކުރެވޭތީ ހުރިހާ ފަރާތްތަކުން މޫސުމަށް ސަމާލުވުމަށް އިލްތިމާސް ކުރަން، އަދި ކަނޑުދަތުރުކުރައްވާ ފަރާތްތަކުން، ދަތުރުތަކަށް ފެއްޓެވުމުގެ ކުރިން އެންމެ ފަހުގެ މައުލޫމާތު ހޯއްދެވުމަށް ދަންނަވަން” މެޓް އޮފީހުން ބުނެފައިވެއެވެ. 

މޫސުން ގޯސްވާނެ ކަމަށް ލަފާކޮށް މިއަދުވެސް ވަރަށް ގިނަ ފަހަރަށް ހުދު ސަމާލު ނެރެފައިވެއެވެ.