ޒިނޭއަށް އަރައިގަތުމަށް ދަތުރެއް ދާއިރު އެދަތުރުން އެނބުރި އާދެވޭނެ ކަމުގެ ޔަޤީންކަމެއް ވޭތޯ؟ ﷲ އަށް ބިރުވެތިވޭ!

ބައެއް މީހުން ޒިނޭ ކުރުމުގެ މަޤްޞަދުގައި ދަތުރު ކޮށްހަދާ ކަމަށާއި، އެދަތުރުތަކަށް ދާއިރު އެދަތުރުތަކުން އެނބުރި އާދެވޭނެ ކަމުގެ ޔަޤީން ކަމެއް ވޭތޯ މިއަދުގެ ހުކުރު ޚުޠުބާގައި ސުވާލު ކޮށްފިއެވެ. 

“ޒިނޭ ކުރުމާއި ފާޚިޝް ޢަމަލު ތަކުގެ ނުބައިކަން” މިމައުޟޫއަށް މިއަދު އިއްވި ހުކުުރު ޚުޠުބާގައި ބުނެފައިވަނީ އިސްލާމްދީނަކީ ޢިއްފަތްތެރިކަމާއި ޠާހިރުކަމުގެ ދީން ކަމަށެވެ. އަދި ﷲ تعالى ވަނީ މުސްލިމުންގެ މައްޗަށް ހުރިހައި ބާވަތެއްގެ ބަދުއަޚްލާޤީ ޢަމަލުތަކާއި ފާޙިޝް ޢަމަލުތައް ޙަރާމްކުރައްވައިފައި ކަމަށާއި، އެންމެ ނުރައްކާތެރި ފާޙިޝް ޢަމަލަކީ ޒިނޭކަމަށް ޚުޠުބާގައި ބުނެފައިވެއެވެ.

ޒިނޭއަކީ އެ ކަމުގައި ހަލާކާއި ބަލިމަޑުކަން ހިމެނޭ ހަޑިމުޑުދާރު ޢަމަލެއް ކަމަށާއި، އެއް ޖިންސުން ގުޅުން ހިންގުމާއި ޒިނޭކުރުން ޢާއްމުވެއްޖެ ތަނެއް މާތް ﷲ ހަލާކުކުރައްވާ ކަމަށް ޚުޠުބާގައި ބުނެފައިވެއެވެ.

މީގެއިތުރުން މި ޒަމާނުގައި މި ޢަމަލުތަކަށް އަރައިގަންނަނީ އެއްވެސް ޖެހިލުމެއް ނެތިކަމަން ޚުޠުބާގައި ފާހަގަކޮށްފައިވެއެވެ. 

ޒިނޭގެ ސަބަބުން ނުރައްކާތެރި ބަލިތައް ފެތުރުމުގެ އިތުރަށް މުޖުތަމަޢުގެ އިޖުތިމާޢީ ފޭރާން ހަލާކުވެދާ ކަމަށާއި، ޢާއިލާތައް ރޫޅި، ނަސްލު އޮޅި، ރަށްމެދަށް ވިހާ ކުދިން ގިނަވެގެން ދާކަމަށް ޚުޠުބާގައި ބުނެފައިވެއެވެ.

ހައްޔަރުން ނައްޓުވައިލައިގެން ދަރި ވައްޓައިލުން ފަދަ ދީނުގައި ޙަރާމް އެތައް ފާފަތަކަކަށް ޒިނޭގެ ސަބަބުން އަރައިގަންނަ ކަމަށް ޚުޠުބާގައި ބުނެފައިވެއެވެ.

ޒިނޭއަކީ ޙައްދު ކަނޑައެޅިފައިވާ ކުށެއް ކަމަށާއި، ޒިނޭކުރުމަކީ ނުބައިވެގެންވާ ޢަމަލަކަށްވީ ހިނދު، އެ ކަމާ މެދު ވިސްނުމެއް ނެތި، ކައިވެނި ހެޔޮނުވާ މީހުންނާއި އަވައްޓެރީންނާއި އެކުވެރީންގެ ޢާއިލާތައް ފަސާދަކޮށް އެ މީހުންގެ އަނބިދަރީންނާ އެކު ޒިނޭކުރާ މީހުންވެސް އުޅޭ ކަމަށް މިއަދުގެ ހުކުރު ޚުޠުބާގައި ބުނެފައިވެއެވެ.

“އެ މީހުން އެ ފާހިޝު ޢަމަލުގައި ވަނިކޮށް މަރުގެންނެވުމަކީ ވެސް ހަމަ ވެދާނެކަމެއް، މާތް ﷲ އަނިޔާވެރިއާއަށް މުހުލަތު ދެއްވަނީ އިޞްލާޙުވުމަށް، އިޞްލާޙުނުވެ، ފާފަތަކަށް އަރައިގަތުމުގައި ދެމިހުރެއްޖެ ނަމަ ގަދަފަދަ ހިއްޕެވުމަކުން ހިއްޕަވާ” ހުކުރު ޚުޠުބާގައި ބުނެފައިވެއެވެ.

ފާޙިޝު ޢަމަލުތަކުގެ ސަބަބުން ފެތުރެމުންދާ ބަލިތައް ވަރަށް ގިނަ ކަމަށާއި،، އެއީ ނުރައްކާތެރި ބަލިތަކެއް ކަމަށް ޚުޠުބާގައި ބުނެފައިވެއެވެ. ޒިނޭއާއި ފާހިޝު ޢަމަލުތަކުގެ ސަބަބުން ފެތުރެމުންދާ ބަލިތަކުގެ ތެރޭގައި ކިހުނުބަލީގެ ތަފާތު ބާވަތްތަކާއި ހާޕިސް ބައްޔާއި އެއިޑްސް ބައްޔާއި މަކުނުވިދުރި ހިމެނޭ ކަމަށާއި، ޢިލްމުވެރީން ސިފަކުރައްވާ ގޮތުގައި މިއީ ބިމުގެ އަހުލުވެރިންގެ ބަދުއަޚްލާޤީ ޢަމަލުތަކަށް ﷲ ދެއްވި ދުންޔަވީ ސަޒާއެއް ކަމުގައި ޚުޠުބާގައި ބުނެފައިވެއެވެ.

“ޖިންސީ ފާޙިޝު ޢަމަލުތަކުގެ ސަބަބުން ޖެހޭ ބަލިތަކުން ރައްކައުތެރިވެވޭނީ އިސްލާމީ އުޞޫލުތަކަށް ތަބަޢަވެގެން، ކާވެނީން ބޭރުގައި ޖިންސީ ޢަމަލުތައް ހިންގުމާ މުޅީން ދުރުހެލިވެގެން” ހުކުރު ޚުޠުބާގައި ބުނެފައިވެއެވެ.