ރާއްޖޭގެ މޫސުން ގޯސް، ރ.އިން ވ.އަތޮޅަށް ރީނދޫ ސަމާލު!

މޫސުން ގޯސްވާނެ ކަމަށް ލަފާކޮށް ރ.އަތޮޅުން ފެށިގެން ވ.އަތޮޅަށް ރީނދޫ ސަމާލު ނެރެފިއެވެ.

މިއަދުގެ 15:00 އިން ފެށިގެން މިރޭގެ އިރުއޮއްސި 19:00 އަށް ނެރެފައިވާ ރީނދޫ ސަމާލުގައި ބުނެފައިވަނީ ގަޑިއަކު 28 މޭލާއި 35 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކުރެވޭ ކަމަށެވެ. އަދި ވިލާގަނޑުގައި ގަޑިއަކު 55 މޭލަށް ވައިގަދަވާނެ ކަމަށާއި ކަނޑުތައް ވަރަށް ގަދަވާނެ ކަމަށް ލަފާކުރެވޭ ކަމަށެވެ. 

https://twitter.com/MetMaldives/status/1844673517255791063

މިރީނދޫ ސަމާލުގެ އިތުުރުން މިއަދު ވަނީ ހއ.އަތޮޅުން ލ.އަތޮޅަށް ހުދު ސަމާލުވެސް ނެރެފައެވެ. 

މިއަދުގެ 15:00 ން ފެށިގެން މިރޭގެ 21:00 އަށް ނެރެފައިވާ މިސަމާލުގައި ބުނެފައިވަނީ ބޯކޮށް ވާރޭ ވެހުމާއި އެކު ގުގުރާނެ ކަމަށް ލަފާކުރެވޭ ކަމަށެވެ. އަދި ގަޑިއަކު 19 މޭލާއި 24 މޭލާއި ދެމެދުގެ ބާރުމިނުގައި ވައިޖެހޭނެ ކަމަށް ލަފާކޮށްފައިވެއެވެ. 

ހަމަމިއާއި އެކު މެޓުން ބުނެފައިވަނީ މިވަގުތުތަކުގައި އެސަރަހައްދަށް ވިލާގަނޑުގައި ގަޑިއަކު 45 މޭލަށް ވައިގަދަވެ ކަނޑުތައް ގަދަވާނެ ކަމަށް ލަފާކުރެވޭ ކަމަށެވެ.

https://twitter.com/MetMaldives/status/1844673232160649512

މޫސުން ގޯސްވެފައިވާ މިފަދަ ދުވަސްވަރެެއްގައި ސަލާމަތީ ގޮތުން އަޅަން ޖެހޭ ފިޔަވަޅުތައް އެޅުމާއި އެކު ކަނޑުދަތުުރުތައް ފެށުމަށް ކަމާއިބެހޭ އިދާރާތަކުން އަންނަނީ އިރުޝާދުދެމުންނެވެ. 

އަދި ބޯކޮށް ވާރޭ ވެހި ފެންބޮޑުވުމުގެ ހާދިސާއެއް ހިނގާފާނެކަމަށް ސަލާމަތީ ފިޔަވަޅުތައް އެޅުމަށްވެސް އިރުޝާދު ދީފައިވެއެވެ.