ބްރިޖާއި ހައިވޭގައި ދުއްވާއިރު ރައްކާތެރިކަމަށް ބަލައިގެން ދުއްވަން އިލްތިމާސްކޮށްފި!

ސިނަމާލެ ބްރިޖާއި ހައިވޭގައި ދަތުރުކުރާއިރު ރައްކާތެރިކަމަށް ބަލައިގެން ދުއްވުމަށް ދިވެހި ފުލުހުންގެ ޚިދުމަތުން އިލްތިމާސްކޮށްފިއެވެ.

ފުލުހުން އެކްސްގައި ކޮށްފައިވާ ޕޯސްޓެއްގައި ބުނެފައިވަނީ މި ދުވަސްވަރަކީ ވައިގަދަ، ވިއްސާރަ ދުވަސްވަރަކަށް ވުމާއެކު، ސިނަމާލެ ބްރިޖު އަދި ހައިވޭއިން ދަތުރުކުރައްވާއިރު ތިމާއާއި އަނެކުންގެ ސަލާމަތާއި ރައްކާތެރިކަމަށް ބަލައިގެން އުޅަނދު ދުއްވުމަށް އިލްތިމާސްކުރާ ކަމަށެވެ.

މީގެއިތުރުން ސައިކަލު ދުއްވާއިރު ކުޑަނަގައިގެން ނުދުއްވުމަށާއި ފަސޭހައިން ހަލާކުވެ ވަޔާދާ ފަދަ ކޯޓު ބޭނުންނުކުރުމަށާއި އަދި ހެލްމެޓު ވެސް ވަޔާ ނުދާނޭހެން ރަނގަޅަށް އެޅުމަށް އިލްތިމާސްކުރާކަމަށް ފުލުހުން ބުނެފައިވެއެވެ. 

ހަމަމިއާއިއެކު އުޅަނދުގެ ލައިޓުތައް ދިއްލޭތޯ ބަލައި ސަލާމަތާއި ރައްކާތެރިކަން ކަށަވަރު ކުރައްވައިގެން އުޅަނދު ދުއްވުމަށް ވެސް ފުލުހުން އިލްތިމާސް ކޮށްފައިވެއެވެ.

މިދުވަސް ވަރަކީ މޫސުން ގޯސް ދުވަސްވަރެއް ކަމުން ކަމާއި ބެހޭ އެކި އެކި އިދާރާތަކުން އަންނަނީ ރައްކާތެރިކަމުގެ ފިޔަޅުތައް އެޅުމަށް އިލްތިމާސް ކުރަމުންނެވެ.

މޫސުމާއި ބެހޭ ޤައުމީ އިދާރާއިން ވަނީ މިއަންނަ ހަފްތާގެ ހޯމަ ދުވަހާއި ހަަމައަށްވެސް މޫސުން ގޯސްވާނެ ކަމަށް ލަފާކޮށްފައެވެ.