ކޮރަޕްޝަން ނައްތާލުމަކީ ކޮންމެ ރައްޔިތެއްގެ ފަރުދީ ޒިންމާއެއް: ވަޒީރު ހައިދަރު

ކޮރަޕްޝަން ނައްތާލުމަކީ ކޮންމެ ރައްޔިތެއްގެ ފަރުދީ ޒިންމާއެެއް ކަމަށް ގެދޮރުވެރިކަމާއި ބިމާއި ޢުމްރާނީ ތަރައްްޤީއާ ބެހޭ ވަޒީރު ޑރ ޢަލީ ޙައިދަރު އަޙްމަދު ވިދާޅުވެއްޖެއެވެ. 

ވަޒީރު ޑރ ޙައިދަރު މިހެން ވިދާޅުވީ ރާއްޖޭގެ ޞިއްޙީ ވެލްފެއަރ ނިޒާމުގެ ކޮރަޕްޝަން ހިރާސްގެ ދިރާސާ އާންމުކުރުމަށް ބޭއްވި ރަސްމިއްޔާތު ގައި ވާހަކަދައްކަވަމުންނެވެ.

ވަޒީރު ޙައިދަރު ވިދާޅުވީ ކޮރަޕްޝަން ނައްތާލުމަކީ ހަމައެކަނި އެކުލަވާލާ ސިޔާސަތަކުން ކުރެވޭނެ ކަމެއް ނޫން ކަމަށާއި އެއީ ކޮންމެ ރައްޔިތެއްގެ ފަރުދީ ޒިންމާއެއް ކަމަށެވެ. 

މީގެއިތުރުން އިޖުތިމާއީ ރައްކާތެރިކަމުގެ ނިޒާމުގެ ތެރެއިން އަސާސީ ޚިދުމަތްތައް ދޭންޖެހޭނީ ކޮރަޕްޝަނާއި ނާޖާއިޒު ފައިދާ ނުނެގޭނެފަދަ ގޮތްތަކަކަށް ކަމަށް ވަޒީރު ޙައިދަރު ވިދާޅުވިއެވެ.

ނާޖާއިޒު ފައިދާ ނެގޭ ގޮތަށް އެކަން އޮވެއްޖެނަމަ، އެ ޚިދުމަތްތަކަށް އެންމެ ބޮޑަށް ބޭނުންވާ ފަރާތްތައް އެކަހެރިވުމާއި، އެ ނިޒާމުގެ މައްޗަށް ރައްޔިތުންގެ މެދުގައި އޮންނަ އިތުބާރު ގެއްލި ނިޒާމުގެ ބޭނުންނެތި ދާނެ ކަމަށް ވަޒީރު ވިދާޅުވިއެވެ.

މީގެއިތުރުން ވަޒީރު ވިދާޅުވީ އިޖުތިމާއީ ނިޒާމުގެތެރެއިން ކޮރަޕްޝަންގެ އަމުލުތައް އެކި ގޮތްގޮތަށް ހިންގައިފައި ހުރިއިރު، ކަންކަމުގެ ސަބަބުން ދައުލަތަށް ބޮޑެތި ގެންލުންތަކެއް ލިބި، އާންމު ގިނަ ރައްޔިތުންގެ ފުރާނައަށް ނުރައްކާވާ ހިސާބަށް ވެސް ކަންކަން ގޮސްފައިވާ ކަމަށެވެ. އެހެންކަމުން ކޮރަޕްޝަނަށް މަގުފަހިވާ ކަންކަމުން މުޅިން އެއްކިބާވެފައި އޮންނަ ނިޒާމަކަށް އިޖުތިމާއީ ރައްކާތެރިކަމުގެ ނިޒާމު ހަދަން ޖެހޭ ކަމަށް ވަޒީރުގެ ވާހަކަފުޅުގައި ފާހަގަކުރެއްވިއެވެ.

ވަޒީރު ވިދާޅުވީ އިޖުތިމާއީ ރައްކާތެރިކަމުގެ ނިޒާމު ހަރުދަނާކުރުމަށް އެންމެ ފުރަތަމަ ކުރަންޖެހޭކަމަކީ ދެފުށް ފެންނަ ނިޒާމެއް ގާއިމުކޮށް އެ ނިޒާމު ހިންގާ ފަރާތްތައް ޖަވާބުދާރީ ކުރެވޭނެ ގޮތް ހަދަން ޖެހޭ ކަމަށެވެ.