ކުނިގިނަ ކޯރުތަކުން ޕްލާސްޓިކް ކާ ބެކްޓީރިއާ ފެނިއްޖެ

ދިރާސާވެރިން ގިނަ ދުވަސްތަކެއް ވަންދެން ފާހަގަކޮށްފައިވާ ގޮތުގައި، ތިމާވެށީގެ ބެކްޓީރިއާގެ އާންމު އާއިލާއެއް ކަމުގައިވާ "ކޮމަމޮނަޑޭސިއޭ" އުފެދެނީ ކޯރުތަކާއި ނަރުދަމާ ނިޒާމުތަކުގައި އުކާލެވިފައިވާ ޕްލާސްޓިކްތަކުގެ މައްޗަށެވެ. ނަމަވެސް، މި ކޮމަމޮނާސް ބެކްޓީރިއާތަކުން ކުރަމުންދާ ވަކި މަސައްކަތެއް މިހާތަނަށް ހާމަވެފައި ނުވެއެވެ.

ނޯތްވެސްޓަން ޔުނިވަރސިޓީގެ އިސްނެގުމުގެ ދަށުން، ދިރާސާވެރިން ވަނީ "ކޮމަމޮނާސް" ބެކްޓީރިއާގެ ސެލްތަކުން ކާނާއަށް ޕްލާސްޓިކް ބޭނުންކުރާ ގޮތް ދެނެގަނެފައެވެ. އެންމެ ފުރަތަމަ، އެ ތަކެތިން ޕްލާސްޓިކް ކުދިކުދި އެތިކޮޅުތަކަށް ބައިބައިކޮށް، "ނޭނޯޕްލާސްޓިކްސް" އުފައްދައެވެ. ދެން، އިތުރަށް ޕްލާސްޓިކް ކުދިކުރުމުން ޚާއްޞަ އެންޒައިމެއް އުފެދެއެވެ. އެންމެ ފަހުން، މި ބެކްޓީރިއާ ކާނާގެ މަޞްދަރެއްގެ ގޮތުގައި ބޭނުންކުރަނީ ޕްލާސްޓިކުން ނެގޭ ކާބަން އެޓަމްތަކުގެ ރިންގެއް ކަމަށް ދިރާސާވެރިން ބަޔާންކުރެއެވެ.

މި ހޯދުމުގެ ސަބަބުން، ބޯފެން ތަޣައްޔަރުކޮށް، ތިމާވެއްޓަށް ގެއްލުންދޭ އަދި ނައްތާލުމަށް އުނދަގޫ ޕްލާސްޓިކް ކުނި ސާފުކުރުމަށް އެހީތެރިވެދޭ ބެކްޓީރިއާއަށް ބިނާކޮށް އިންޖިނިއަރިންގ ޙައްލުތައް ތަރައްޤީކުރުމުގެ އައު ފުރުޞަތުތަކެއް ހުޅުވިގެންދެއެވެ.

ސީ. ޓެސްޓޮސްޓެރޯނީ ޕްލާސްޓިކް މެދުވެރިކޮށް ކާނާ ހޯދާ ގޮތް ފުރިހަމައަށް ދެނެގަތުމަށްޓަކައި، އަރިސްޓިލްޑޭ އާއި އޭނާގެ ޓީމުން ވަނީ ގިނަގުނަ ސައިންޓިފިކް އަދި އެކްސްޕެރިމެންޓަލް އުކުޅުތަކެއް ބޭނުންކޮށްފައެވެ. އެންމެ ފުރަތަމަ، އެ ބެކްޓީރިއާ ކުނިފެނުން އެކަހެރިކޮށް، "ޕޮލިއެތިލީން ޓެރެފްތަލޭޓް (ޕީއީޓީ)" ފިލްމުތަކާއި ޕެލެޓްތަކުގައި ކަލްޗަރ ކުރެވުނެވެ. ދެވަނަ ފިޔަވަޅެއްގެ ގޮތުން، އެޑްވާންސްޑް މައިކްރޯސްކޯޕީ އުކުޅުތައް ބޭނުންކޮށްގެން، ވަގުތު ފާއިތުވަމުންދިޔަ ވަރަކަށް ޕްލާސްޓިކް މެޓީރިއަލްގެ ސަތަހަށް އަންނަ ބަދަލުތައް ދިރާސާކުރެވުނެވެ. އޭގެ އިތުރުން، ބެކްޓީރިއާގެ ވަށައިގެންވާ ދިޔާ ތަކެތި ތަޙުލީލުކުރުމުން، ޕްލާސްޓިކް ނެނޯ-ސްކޭލް ޕާޓިކަލްތަކަށް ބެހިފައިވާކަމުގެ ހެކި ފެނުނެވެ. އެންމެ ފަހު މަރުޙަލާގައި، ދިރާސާވެރިން ވަނީ ބެކްޓީރިއާގެ އިންޓަރނަލް ސްޓްރަކްޗަރ ދިރާސާކޮށް، ޕީއީޓީ ޑިގްރޭޑޭޝަނަށް މަގުފަހިކުރުމަށް ބެކްޓީރިއާ ބޭނުންކުރާ މެކޭނިޒަމްތައް ފާހަގަކޮށްފައެވެ.

މި ހޯދުންތައް ތިމާވެށި ރައްކާތެރިކުރުމުގެ ޙައްލުތަކަށް ބޭނުންކުރެވިދާނެކަމަށް އަރިސްޓިލްޑޭ އުންމީދުކުރައްވާ ، މި އައު ޢިލްމަކީ ކުނިފެނުގައި ޕްލާސްޓިކް އުފެދިފައިވާ ގޮތް ފުންކޮށް ދެނެގަތުމަށް އެހީތެރިވެދޭނެ މުހިންމު ވަސީލަތެއް ކަމުގައި ވެސް އޭނާ ފާހަގަކުރެއްވިއެވެ.