ހައްޖު ކޯޕަރޭޝަންގެ އެމްޑީގެ ނަމުގައި ސްކޭމް ކޯލްތަކެއް ކުރާތީ ސަމާލުވާން އެދިއްޖެ

މޯލްޑިވްސް ހައްޖު ކޯޕަރޭޝަންގެ މެނޭޖިން ޑިރެކްޓަރު މުޙައްމަދު ޝަކީލްގެ ނަމުގައި ފައިސާ ހޯދަން ސްކޭމް ކޯލްތަކެއް ކުރަމުންދާތީ ސަމާލު ވުމަށް އެދިވަޑައިގެންފިއެވެ.

ޝަކީލް ވިދާޅުވީ އޭނާގެ ފަރާތުން ކަމަށް ބުނެ، އަބްދު الله ރަޝީދު ނަމަކަށް ކިޔާ މިހަކު އެކި މީހުންނަށް ގުޅައި ފައިސާ ހޯދަމުންދާ ކަމުގެ މަޢުލޫމާތު ލިބިފައިވާ ކަމަށެވެ. ޝަކީލް ވަނީ އެމީހާގެ ފޯން ނަންބަރާއި ވަނަވަރު ވެސް އާންމު ކުރައްވައިފައެވެ.

އަޅުގަނޑުގެ ފަރާތުން ކަމަށް ބުނެ އަބްދު الله ރަޝީދު، ގ.ދަލާސްޓް (ފޯން ނަންބަރު 7610117) ކިޔާ މީހަކު އެކި ފަރާތްތަކަށް ގުޅައި ފައިސާ ހޯދަމުން ދާކަމަށް އަޅުގަނޑަށް ވަނީ މަޢުލޫމާތު ލިބިފައެވެ. -  ޝަކީލް ވިދާޅުވެފައިވެއެވެ.

މިގޮތުން އެކި ފަރާތްތަކުގެ އަތުން ބޮޑެތި އަދަދުތަކުން ފައިސާ ހޯދުމަށް ސްކޭމް ކޯލްތަކެއް ކުރަމުން ދާތީ ސަމާލު ވުމަށް ދަންނަވާ ކަމަށާއި، ޝަކީލްގެ ނަމުގައި އެއްވެސް ފަރާތަކުން ފައިސާ ހޯދުމަށް ކުރާ ފޯން ކޯލްތަކަށް އިޖާބަ ނުދިނުމަށް އެދިފައިވެއެވެ. އަދި މި މައްސަލަ ބަލައިދިނުމަށް މޯލްޑިވްސް ޕޮލިސް ސާރވިސްއަށް ހުށަހަޅާފައިވާ ކަމަށް ޝަކީލް ވިދާޅުވެފައި ވެއެވެ.

ފަހަކަށް އައިސް ސްކޭމް ކޯލްތަކުގެ މައްސަލަތައް ވަނީ ވަރަށް ބޮޑަށް އިތުރުވެފައެވެ. އެގޮތުން ސަރުކާރު އިދާރާ ތަކާއި ކުންފުނިތަކުގެ އިތުރުން އިސްވެރިންގެ ނަމުގައި ސްކޭމްކޯލް ކުރުން ވަނީ އިތުރުވެފައެވެ. މިކަމަށް ސަމާލުވުމަށް ފުލުހުންވެސް ވަނީ އެދިފައެވެ.