އެއަރޕޯޓްސް ކޮމްޕެނީއިން 2024 ވަނަ އަހަރު ރެކޯޑް އަދަދެއްގެ ފައިދާ ހޯދައިފި

މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން 2024 ވަނަ އަހަރު ރެކޯޑް އަދަދެއްގެ ފައިދާ ހޯދައިފިއެވެ. މި ކުންފުނިން 2024 ވަނަ އަހަރު ސާފު ފައިދާގެ ގޮތުގައި 1.1 ބިލިއަން ރުފިޔާ ހޯދާފައިވާކަމަށް އޮޑިޓަރ ޖެނެރަލްގެ އޮފީހުން ކުރި އޮޑިޓުން ދައްކައެވެ.
މިއީ 2023 ވަނަ އަހަރާ އަޅާބަލާއިރު 21.3 އިންސައްތައިގެ ކުރިއެރުމެކެވެ. އަދި މިއީ ރާއްޖޭގެ އޭވިއޭޝަން އަދި އިންފްރާސްޓްރަކްޗަރ ދާއިރާގެ ކުރިއެރުން ދައްކުވައިދޭ ނަތީޖާއެކެވެ.

އެމްއޭސީއެލްގެ ޖުމްލަ އާމްދަނީ 13.1 އިންސައްތަ އިތުރުވެ، 8.6 ބިލިއަން ރުފިޔާއަށް އަރާފައިވާއިރު، ހިންގުމުގެ ފައިދާ 1.58 ބިލިއަން ރުފިޔާއަށް އަރާފައިވެއެވެ. މި ކުރިއެރުން ހޯދިފައިވަނީ ވެލާނާ އިންޓަރނޭޝަނަލް އެއަރޕޯޓާއި އެހެނިހެން އެއަރޕޯޓުތަކުގެ ޓްރެފިކް އިތުރުވެ، އޭވިއޭޝަން ޚިދުމަތްތައް ފުޅާވެ، ތެލާއި، ކާގޯ އަދި ޓާމިނަލް ޚިދުމަތްތަކަށް އޮތް ޑިމާންޑް އިތުރުވުމުގެ ސަބަބުންނެވެ.
އެމްއޭސީއެލްއިން 2024 ވަނަ އަހަރު 1.69 ބިލިއަން ރުފިޔާގެ އައު އިންފްރާސްޓްރަކްޗަރ ގާއިމްކޮށްފައިވާކަން އޮޑިޓް ރިޕޯޓުން ފާހަގަކޮށްފައިވެއެވެ. 2024 ވަނަ އަހަރު ނިމުނުއިރު ކުންފުނީގެ ޖުމްލަ އެސެޓްސް 34.3 ބިލިއަން ރުފިޔާއަށް އަރާފައިވާއިރު، މީގެ ތެރެއިން 20.4 ބިލިއަން ރުފިޔާ ހޭދަކޮށްފައިވަނީ ދިގު މުއްދަތުގެ އިންފްރާސްޓްރަކްޗަރ އަދި އެއަރޕޯޓް ތަރައްގީކުރުމުގެ މަޝްރޫޢުތަކަށެވެ.

އެމްއޭސީއެލްއިން 2024 ވަނަ އަހަރު ހިއްސާއަކަށް 50 ރުފިޔާގެ ޑިވިޑެންޑެއް އިޢުލާންކޮށްފައިވެއެވެ. މިއީ ސަރުކާރަށް ރަނގަޅު ނަފާއެއް ލިބޭނެ އަދަދެކެވެ. އަދި ކުންފުނީގެ ޖުމްލަ އިކުއިޓީ 9.72 ބިލިއަން ރުފިޔާއަށް އަރާފައިވެއެވެ.2024 ވަނަ އަހަރުގެ އޮޑިޓުން ދައްކާގޮތުގައި އެމްއޭސީއެލްއަކީ ގައުމީ އިގްތިސާދުގެ މުހިންމު ބައެއްގެ ގޮތުގައި ކުރިއަރަމުންދާ ކުންފުންޏެކެވެ. އަދި ސަރަހައްދީ ޓްރާންސްޕޯޓް ހަބެއްގެ ގޮތުގައިވެސް ކުރިއަރަމުން އަންނަ ކުންފުންޏެކެވެ.