ޚަބަރު
އިންތިޚާބާއި ބެހޭ ހުރިހާ ޤާނުނެއް އެއްކޮށްލަނީ!
އީސީގެ ރައީސް ފުއާދު ތައުފީޤް. ފޮޓޯ: އީސީ
އިންތިޚާބުތަކާއި ބެހޭ ހުރިހާ ޤާނޫނެއް އެއްކޮށްލުމުގެ ވިސްނުން ގެންގުޅުއްވާ ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީޤް ވިދާޅުވެއްޖެއެވެ.
ދައުލަތުގެ މީޑިޔާއަށް މަޢުލޫމާތު ދެއްވަމުން އީސީގެ ރައީސް ފުއާދު ތައުފީޤް ވިދާޅުވީ އިންތިޚާބުތަކާ ބެހޭ ޢާންމު ޤާނޫނާއި، ރިޔާސީ އިންތިޚާބާ ބެހޭ ޤާނޫނާއި، ރައްޔިތުންގެ މަޖިލީހުގެ އިންތިޚާބާ ބެހޭ ޤާނޫނުގެ އިތުރުން ލޯކަލް ކައުންސިލްތަކުގެ އިންތިޚާބާ ބެހޭ ޤާނޫނު އެއްކޮށްލުމަކީ ވިސްނުމެއް ކަމަށެވެ.
ފުއާދު ވިދާޅުވީ އިންތިޚާބުތަކާ ބެހޭ ހުރިހާ ޤާނޫނެއް މުޠާލިއާ ކުރުމަށް ފަހު، އެ ހުރިހާ ޤާނޫނުތަކެއް އެއްކޮށްލަން ކޮމިޝަންގެ މެންބަރުންނާއި ޤާނޫނީ ޓީމާއެކު މަޝްވަރާތަކެއް ވެސް މިހާރު ކުރިއަށްދާ ކަމަށެވެ.
ފުއާދު އިތުރަށް ވިދާޅުވީ އިންތިޚާބުތަކާ ބެހޭ ޤާނޫނުތައް ވަކިން ހުރުމުގެ ސަބަބުން އާންމު ރައްޔިތުންނަށް ވެސް ބައެއް ކަންކަން އޮޅުން އަރާ ކަމަށެވެ.
އެހެންވެ އެއް ޤާނޫނަކުން ހުރިހާ ކަމެއް ފެންނަން ހުރުމުން އެއް ހަމައަކުން ކަންކަން ކުރުމަށް އީސީ އަށް ވެސް ފަސޭހަވާނެ ކަމަށް ފުއާދު ވިދާޅުވިއެވެ.
އީސީގެ ރައީސް ފުއާދު ވިދާޅުވީ 2026 ވަނަ އަހަރު ބާއްވަންޖެހޭ އިންތިޚާބުތަކުގެ ކުރިން މިހާރު ހުރި ޤާނޫނުތަކަށް އިސްލާޙެއް ގެންނަން ޖެހޭނަމަ އެކަންކޮށް، އަލަށް ޤާނޫނެއް ހަދަން ޖެހޭނަމަ އެ މަސައްކަތްތައް ކުރައްވާނެ ކަމަށެވެ.
ޤާނޫނުތައް އެއްކޮށްލުމުގެ ވިސްނުމާ އެކީ އީސީން މިހާރު ބައެއް ޤާނޫނުތައް އިސްލާޙު ކުރުމުގެ މަސައްކަތް ވެސް ކުރަމުންނެވެ.
އެގޮތުން ޕާޓީތަކަށް ފައިސާ ދޭ އުސޫލަށްވެސް ބަދަލު ގެނައުމަށް ވަނީ އީސީ އިން ނިންމައިފައެވެ.
