އެއްފަހަރާ 100 މީހުންނަށް ތަމްރީނު ދެވޭ މެކޭނިކަލް ޓްރެއިނިންގ ސެންޓަރެއް ސްޓެލްކޯއިން ގާއިމްކުރަނީ!

އެއްފަހަރާ 100 މީހުންނަށް ތަމްރީނު ދެވޭ މެކޭނިކަލް ޓްރެއިނިންގ ސެންޓަރެއް ގާއިމްކުރުމަށް ނިންމައިފައިވާ ކަމަށް ސްޓެލްކޯއިން ހާމަކޮށްފިއެވެ. 

މެކްނިކަލް ޓްރެއިނިންގ ސެންޓަރ ގާއިމްކުރުމަށް ހަމަޖެހިފައިވަނީ ކ.ތުލުސްދޫގައެވެ. 

އެގޮތުން މި ސެންޓަރު ގާއިމް ކުރުމުގެ މަސައްކަތް މިދިޔަ ޖޫން މަހު ވަނީ ފަށައިފައެވެ.

މި މަސައްކަތާ ގުޅިގެން ސްޓެލްކޯގެ ރީޖަނަލް ޑިޕާޓްމަންޓްގެ ޖެނެރަލް މެނޭޖަރު މުހައްމަދު ޔާސިރު މީޑިއާ އަށް ވިދާޅުވީ އެ ކުންފުނިން ރާއްޖެއިން ބޭރަށް އަހަރަކު ހަތަރު ވަރަކަށް މުވައްޒަފުން ފޮނުވާ ކަމަށެވެ.

އަދި ހަތަރު މުވައްޒަފުން 15 ދުވަހުގެ ޓްރެއިނިންއަކަށް ފޮނުވުމަށް ހަތަރު ލައްކައަށް ވުރެ ގިނަ ރުފިޔާ އަހަރަކު ހަރަދުވާ ކަމަށާއި އެޓްރޭނިންގ ސެންޓަރު އެޅުމަށް ނިންމީ ސްޓްރެސް ފްރީ މާހައުލެއްގައި ރާއްޖޭގައި ތިބެގެން ހަރަދު ކުޑަކޮށް ކިޔެވޭނެ އިންތިޒާމު ހަޖެއްސުމަށް ކަމަށެެވެ. 

"މި ޓްރެއިނިން ސެންޓަރުގައި އަޅުގަނޑުމެން މިހާރު ބޭނުންކުރާ ހުރިހާ ސީރީޒެއްގެ ޖަނަރޭޓަރުތައް ހުންނާނެ، ކިޔަވައި ދޭނީ ސްޓެލްކޯގެ މުވައްޒަފުންނާއި އެ ދާއިރާއިން ކިޔަވައިގެން ތިބި ބޭފުޅުން" ޔާސިރު ވިދާޅުވެފައިވެއެވެ. 

އެ ތަނުގައި ތަމްރީނާއި ތަޖްރިބާ ހޯދާ މީހުންނަށް އެކޮމޮޑޭޝަނާއެކު ގާއިމް ކުރާ އެ ސެންޓަރުގައި ޓްރެއިނިން ރޫމާއި އިލެކްޓްރިކަލް ޓްރެއިނިން ރޫމުތަކާއި ކޮންޓްރޯލް ޓްރެއިނިން ރޫމުތަކާއި މެކޭނިކަލް ޓްރެއިނިން ރޫމުތަކާއި ބޭނުންވެއްޖެ ހާލަތެއްގައި ބޭނުން ކުރުމަށް އެމްވީއެޗްވީ ރޫމުތައް ވެސް ހުންނާނެ ކަމަށް ޔާސިރު ވިދާޅުވި އެވެ.

ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ މިކަމާ ގުޅިގެން މީޑިއާ އަށް ވިދާޅުވެފައިވަނީ ތުލުސްދޫގައި އެ ސެންޓަރު އެޅުމަށް ނިންމީ އެ ރަށު ކައުންސިލުން އެކަމަށް ލިބުނު އެއްބާރުލުމުގެ ސަބަބުން ކަމަށެވެ.

އެ ސެންޓަރުގެ އެންމެ ބޮޑު ބޭނުމަކީ މެކޭނިކަލް އިންޖިނިއަރިންގެ ދާއިރާއިން ޒުވާނުން ތަމްރީންކޮށް، ކުންފުނީގައި މިވަގުތު މަސައްކަތް ކުރަމުން އަންނަ މުވައްޒަފުންނަށް ވެސް ޓްރެއިނިން ދީ އެ ދާއިރާއިން ސަނަދެއް ލިބޭނެ ގޮތް ހެދުމަށް ކަމަށް ފަހުމީ ވިދާޅުވި އެވެ.

ފަހުމީ ވިދާޅުވީ ސްޓެލްކޯގައި އިކުއިޕްމެންޓް އެބަހުރިކަމަށާއި، ސްޓެލްކޯއަށް އެދާއިރާއިން ކިޔަވައި ދެވޭނެކަމަށެވެ. އަދި އެކުންފުނީގައި ކިޔަވައިގެން ތިއްބެވި ކިޔަވައިގެން ތިބި އިންޖިނިއަރުން އެބަ ތިއްބެވި ކަމަށެވެ. އެހެންކަމުން އެކުންފުނިން އެ ދާއިރާއަށް ޝައުޤުވެރިވާ މީހުންނަށް މި ފުރުސަތު ފަހިކޮށް ނުދޭންވީ އެއްވެސް ސަބަބެއް ނެތް ކަމަށް ފަހުމީ ވިދާޅުވިއެވެ.

ފަހުމީ ވިދާޅުވީ ސްޓެލްކޯއިން ނިންމާފައި ވަނީ ޓްރެއިނިންގެ ވަކި ލެވަލްއެއް ފުރިހަމަ ކޮށްގެން ނޫނީ އެ ކުންފުނީގައި އިންޖިނިއަރިން ދާއިރާގައި މަސައްކަތް ނުކުރެވޭ ގޮތަށް ހެދުމަށް ކަމަށެވެ.

އެ ސެންޓަރުގައި ކިޔަވަން ބޭނުންވާ ފަރާތްތަކުން އެކަމަށް އެދި ހުށައަޅަން ޖެހެނީ ސްޓެލްކޯއަށެވެ. އަދި ސްޓެލްކޯއިން ނިންމާފައި ވަނީ ޤައުމީ ޔުނިވާސިޓީ (އެމްއެންޔޫ) އާ އެކު ކުރިއަށް ދިއުމަށެވެ. ފަހުމީ ވިދާޅުވީ ކޯހަށް ވަނުމަށް އެދެން ޖެހޭނީ ޔުނިވާސިޓީގައި ކަމަށެވެ.

އަދި އެގޮތައް ނިންމައިފައިވަނީ އެގޮތަށް ނިންމީ އެ ލިބޭ ސަނަދަކީ ސްޓެލްކޯއިން ދޭ ސަނަދަކަށް ވެގެން އެ “ވެލިޑް” އެއްޗަކަށް ނުވާނެތީ ކަމަށެވެ. އަދި ކަރިކިއުލަމްގެ ތެރެއިން ހިމެނިގެން، އެމްއެންޔޫ ކަހަލަ އެމްކިޔުއޭއިން ޤަބޫލުކުރާ ސަނަދެއް ދެވޭ ތަނަކަށް އެތަން ވެގެން ދާނެ ކަަމަށް ފަހުމީ ވިދާޅުވިއެވެ.

އެކުންފުނީގެ އަމާޒަކީ އަހަރަކު 300 މީހުން އެދާއިރާއިން ތަމްރީނު ކުރުމެއެވެ.