މިމަސް ނިމުމުގެ ކުރިން 4000 ފްލެޓް ލިބޭ މީހުންގެ ލިސްޓު އިޢުލާނު ކުރަނީ!

މި ހިނގާ އޮކްޓޯބަރު މަސް ނިމުމުގެ ކުރިން 4000 ފްލެޓް ލިބޭ މީހުންގެ ލިސްޓު އިޢުލާނު ކުރާނެ ކަމަށް ގެދޮރުވެރިކަމާއި ބިމާ ޢުމްރާނީ ތަރައްޤީއާ ބެހޭ ވަޒީރު ޑރ ޢަލީ ޙައިދަރު ވިދާޅުވެއްޖެއެވެ. 

ޑރ ޢަލީ ޙައިދަރު މިކަމާ ގުޅިގެން ވިދާޅުވެފައިވަނީ 4000 ފްލެޓް ލިބޭ މީހުންގެ ލިސްޓު މިމަސް ނިމުމުގެ ކުރިން އިޢުލާނު ކުރުމަށް މަސައްކަތް ކުރައްވަމުންދާ ކަމަށެވެ. 

މި ފްލެޓް ތަކަކީ ގެދޮރުވެރިޔާ ސްކީމްގެ ދަށުން ކުރީގެ ރައީސް އިބްރާހިމް މުޙައްމަދު ޞާލިޙުގެ ސަރުކާރުނ ްއަޅަން ފެށި ފްލެޓް ތަކެކެވެ. އަދި ކުރީ ސަރުކާރުގައި ފުލެޓް ލިބޭ މީހުންގެ ލިސްޓެއް ވަނީ އާންމުކޮށްފައެވެ.

 އެހެން ނަމަވެސް އެލިސްޓާއި ގުޅިގެން ބަޔަކު ކުރި ޝަކުވާތަކާ ގުޅިގެން އެމައްސަލަ އޭސީސީން ބަލަން ފެށުމާއި ގުޅިގެން ފުލެޓް ދޫކުރުމުގެ މަސައްކަތް އޮތީ ހުއްޓިފައެވެ.

 އެމައްސަލަތަށް ބެލުމަށްފަހު އޭސީސީން ބުނީ ކުރީގެ ސަރުކާރުން ދޫކުރި 4000 ފްލެޓް ދީފައިވާ މީހުންގެ ތެރެއިން 60 ޕަސެންޓް މީހުންނަކީ ޝަރުތު ހަމަނުވާ މީހުން ކަމަށެވެ. 

އެހެންނަމަވެސް، ފްލެޓަށް ޝަރުތު ހަމަވާ ކަމަށް ރަނގަޅަށް ޕޮއިންޓު ދީފައިވާ މީހުންނަށް ފްލެޓު ދޭން ފަށަން އޭސީސީން ވަނީ ގެދޮރުވެރިކަމާ ބެހޖޭ ވުޒާރާއަށް އަންގާފައެވެ.

އެވުޒާރާ އިން މިކަމާ ގުޅިގެން ބުނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް މިހިނގާ އޮކްޓޫބަރު މަަސް ނިމުމުގެ ކުރިން ލިސްޓު އިޢުލާން ކުރުމަށް ކުރުމަށް ކުރަންޖެހޭ މަސައްކަތްތައް ކުރަމުންދާ ކަމަށެވެ."ގެދޮރުވެރިޔާ" ސްކީމްގެ ދަށުން ދޫކުރަން ނިންމާފައިވާ 4،000 ފްލެޓްތަކަކީ އިންޑިއާގެ އެގްޒިމް ބޭންކުން 227 މިލިއަން ޑޮލަރުގެ ސޮވެރިން ގެރެންޓީއެއް ދިވެހި ސަރުކާރަށް ދީގެން އަޅަމުންދާ ފުލެޓްތަކެކެެވެ. 

އިންޑިއާގެ ޖޭއެމްސީ ޕްރޮޖެކްޓްސް ލިމިޓެޑާއި ނެޝަނަލް ބިލްޑިންސް ކޮންސްޓްރަކްޝަން ކޮމްޕެނީ (އެންބީސީސީ) އިން ކުރިއަށްގެންދާ މަޝްރޫއުގައި ހިމެނޭ 32 ޓަވަރުގެ ތެރެއިން 16 ޓަވަރު އެންބީސީސީން ކުރާ އިރު، އަނެއް 16 ޓަވަރުގެ މަސައްކަތް ޖޭއެމްސީން ކުރާގޮތަށް ވަނީ ނިއްމާފައެވެ.