މުރައިދޫގޭގެ ކަންކަމާއި ގުޅޭ ބައްދަލުވުން ސިއްރުކޮށް ކުރިއަށް ގެންގޮސްފި!

ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ދިރިއުޅުއްވާ ގެކޮޅު މުރައިދޫގޭގެ މުވައްޒިފުންގެ ޢަދަދާއި މުސާރަތަކާއި ގުޅޭ ބައްދަލުވުން ސިއްރުން ކުރިއަށް ގެންގޮސްފިއެވެ. 

މަޖިލީހުގެ 241 ކޮމިޓީގެ މިއަދުގެ ބައްދަލުވުން ފައްޓަވަމުން އެ މައްސަލަ ހުށަހަޅާފައިވާކަން ކޮމިޓީގެ މުގައްރިރު، އޭދަފުށި ދާއިރާގެ މެންބަރު އަހުމަދު ސަލީމް ވަނީ ވިދާޅުވެފައެވެ. 

އަދި ކޮމިޓީ ކުރިއަށް ގެންދާނީ ސިއްރުކޮށްގެންތޯ ނުވަތަ ނޫންތޯ އޭނާ ވަނީ ސުވާލުކުރައްވާފައެވެ.

އެއާއެކު ވެރިކަންކުރާ ޕީއެންސީގެ ޕާލިމެންޓްރީ ގްރޫޕުގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާޙު ވަނީ ބައްދަލުވުން ސިއްރުކުރަން ހުށަހަޅާފައެވެ.

އެ ހުށަހެޅުމަށް މާމިގިލީ ދާއިރާގެ މެންބަރު ޤާސިމް އިބްރާހިމް ވަނީ ތާއީދުކުރައްވައިފައެވެ. އަދި މެމްބަރު ޤާސިމްގެ ތާއިދާއިއެކު ބައްދަލުވުން ވަނީ ސިއްރުކޮށްފައެވެ.

ރައްޔިތުން މަޖިލީހުގެ ރައީސް ޢަބްދުއްރަޙީމް މ. މުރައިދޫގެ އަށް ދިރިއުޅުއްވުން ބަދަލުކުރައްވާފައި ވަނީ ޖުލައި މަހުގެ 26 ވަނަ ދުވަހުއެވެ. ޢަބްދުއްރަޙީމް އެގެއަށް ބަދަލުވެވަޑައިގެންނެވީ، މަރާމާތަށްފަހުގައެވެ.

މުރައިދޫގޭގެ އެންމެ އިސް ވެރިޔަކީ ތަޖުރިބާކާރު ނޫސްވެރިޔާ މުންޑޫ އާދަމް ޙަލީމެވެ. އޭނާއަކީ މުރައިދޫގޭގެ ޗީފް އޮފް ސްޓާފެވެ. އެއީ އެ ގެކޮޅުގެ އެންމެ އިސް މަޤާމެވެ. ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާޤް (ދަގަނޑޭ) ވެސް ވަނީ އެ ގެކޮޅުގެ ޑިރެކްޓަ ޖެނެރަލަކަށް އައްޔަން ކުރައްވައިފަ އެވެ.

މަޖިލީހުގެ ރައީސްކަން ކުރައްވާ ބޭފުޅުންނަށް މުރައިދޫގެ ހަމަޖެއްސެވީ 2021 ވަނަ އަހަރު, ކުރީގެ ރައީސް މުހައްމަދު ނަޝީދު މަޖިލީސް ރައީސްކަމުގައި ހުންނެވިއިރު އެ މަނިކުފާނަށް ދިން ބޮމުގެ ހަމަލާއަށް ފަހު ޤާނޫނަށް ގެނައި އިސްލާހާ އެކުއެވެ.

އެ އިސްލާހާއެކު ތިން ބާރުގެ ވެރިން ތިއްބެވުމަށް ރަސްމީ ގެކޮޅު ވަނީ ހަމަޖައްސަން ކަނޑައަޅާފައެވެ.

މަޖިލީހުގެ ރައީސްގެ ގެކޮޅާއި ބެހޭ ބައްދަލުވުން ސިއްރުން ކުރިއަށް ގެންގޮސްފައިވާ އިރު، އެބައްދަލުވުން އަލުން ބޭއްވުމަށް ތާވަލުކޮށްފައިވާ ކަމަށް ބައެއް މީޑިއާތަކުން އަންނަނީ ރިޕޯޓު ކުރަމުންނެވެ. 

މިބައްދަލުވުން އަލުން ބޭއްވުމަށް ތާވަލުކޮށްފައިވަނީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒު އެމަޢުލޫމާތުތައް ހާމަކުރުމަށް އެންގެވުމުން ކަމަށްވެސް ރިޕޯޓު ކޮށްފައިވެއެވެ.