މާބަނޑު މީހުންނަށް ކުރިއެކޭ އެއްގޮތައް ލުއިތައް ދެމުންދާނެ: އައިޖީއެމްޗް

އައިޖީއެމްއެޗްގައި މަސައްކަތްކުރާ މާބަނޑު މީހުންނަށް ކުރިއެކޭ އެއްގޮތަށް ޑިއުޓީ ކުރުމުގައި ލުއިތައް ދެމުންދާނެ ކަމަށް އިންދިރާ ގާންދީ މެމޯރިއަލް ހޮސްޕިޓަލުން ބުނެފިއެވެ. 

އައިޖީއެމްއެޗުން މިހެން ބުނެފައިވަނީ އެހޮސްޕިޓަލުން “މާބަނޑު އަންހެނުންނާއި ޅަދަރިމައިންނަށް ފްލެކްސިބަލް ޑިއުޓީ ހަމަޖައްސައިދިނުން ހުއްޓާލުމާ ގުޅޭ” އެ މައުޟޫގެ ދަށުން ނެރެފައިވާ އިންޓާނަލް މެމޯއާއި ގުޅިގެން ނުތަނަވަސް ކަމާ ބެހޭ ގޮތުން ނެރެފައިވާ ނޫސްބަޔާނެއްގައެވެ. 

އެބަޔާނުގައި ބުނެފައިވަނީ ފްލެކްސިބަލްކޮށް ޑިއުޓީ ހަމަޖައްސައިދިނުން ހުއްޓާލުމޭ އެމެމޯގައި ބުނެފައިވީނަމަވެސް މާބަނޑު މީހުންނަށް މިހާރުވެސް ދެމުންގެންދާ ލުއިތަކަށް އެއްވެސް ބަދަލެއް ގެނެވިފައިނުވާނެ ކަމަށެވެ.

“މިހޮސްޕިޓަލަކީ 24ގަޑިއިރު ޚިދުމަތްދޭންޖެހޭ ސަރުކާރުގެ މައިހޮސްޕިޓަލަށް ވެފައި، ޝިފްޓު ޑިއުޓީގައި މަސައްކަތްކުރާ މުވައްޒަފުންގެ މަސައްކަތުގަޑި ފްލެކްސިބަލް ޑިއުޓީގެ ގޮތުގައި ކުރުކުރުމުން ހޮސްޕިޓަލުން ޚިދުމަތް ހޯދާ ބަލިމީހުންނަށް އެކަށީގެންވާ ގޮތެއްގައި ޚިދުމަތް ދިނުމަށް ދަތިވާތީ، މެނޭޖްމަންޓުން އުސޫލަށް ބަދަލުގެނެސްފައިވަނީ ފްލެކްސިބަލް ޑިއުޓީ ދިގުމުއްދަތަކަށް ދޭ ދިނުމަށް ކޮންމެވެސް ވަރެއްގެ ހަރުދަނާކަމެއް ގެނައުމަށްޓަކައި ފްލެކްސިބަލް ޑިއުޓީ ބޭނުންވާ މުވައްޒަފުން ހުށައަޅުއްވާ ޙާލަތައް ރިޢާޔަތް ކޮށް އެޙާލަތަކާ އެކަށީގެންވާ މުއްދަތަކަށް ފްލެކްސިބަލް ޑިއުޓީ ހަމަޖައްސައިދިނުން”އައިޖީއެމްއެޗުން ބުނެފައިވެއެވެ.

މީގެއިތުރުން ޅަދަރިމައިންނަށް މަސައްކަތްކުރުމުގައި ލުއިގޮތްތަކެއް ހަމަޖައްސައިދިނުމުގެ ގޮތުން ޝިފްޓު ޑިއުޓީތަކުގައި ލުއިވާނެ ގޮތަށް ޝިފްޓު ހަމަޖެއްސުމާއި، މަސައްކަތް ލުއި ޑިޕާޓްމެންޓްތަކަށް ވަގުތީ ގޮތުން ބަދަލުވުމަށް އެދޭ ޅަދަރިމައިންނަށް މަސައްކަތަށް ދަތިނުވާނެހެން މިބަދަލުތައް މިހާރުވެސް ގެނެސްދޭ ކަމަށް އައިޖީއެމްއެޗްގެ ބަޔާނުގައި ބުނެފައިވެއެވެ. 

“ނަމަވެސް، މެނޭޖްމަންޓުން ގެނައި ބަދަލުގެ ސަބަބުން ހޮސްޕިޓަލުގައި މަސައްކަތްކުރާ ގިނަ މުވައްޒަފުންގެ ކަންބޮޑުވުންތައް ހުރިކަމަށް މެނޭޖްމަންޓާ ހިއްސާކޮށްފައިވާތީ، އެކަންބޮޑުވުންތަކަށް ރިޢާޔަތްކޮށް މިއުސޫލު ކުރިންވެސް އޮތްގޮތައް ބަދަލުކުރަން ނިންމާފައިވާ ވާހަކަ ދަންނަވަން” އައިޖީއެމްއެޗުން ބުނެފައިވެއެވެ.

އަދި ރައްޔިތުންނަށް އެހޮސްޕިޓަލުން ދޭ ޚިދުމަތްތަކަށް ދަތިނުވާނެހެން، މުވައްޒަފުން މަސައްކަތްކުރުމުގައި ފަސޭހަގޮތްތައް ހަމަޖައްސައިދީ އެކަށީގެންވާ މާހައުލެއް ގާއިމްކޮށްދިނުމަށް އަބަދުވެސް އެހޮސްޕިޓަލުން އިސަކަން ދޭނެ ކަމަށްވެސް އައިޖީއެމްއެޗުން ބުނެއެވެ.