މުރައިދޫގެޔާއި ބެހޭ ކަންކަން ސިއްރުކުރަން ނިންމި ނިންމުން ބަދަލުކޮށްފި!

ރައްޔިތުންގެ މަޖިލީހުގެ ރައީސަށް ދައުލަތުން ޚާއްޞަކުރެވިފައިވާ ގެކޮޅު ކަމަށްވާ މުރައިދޫގޭގެ ސެކިޔުރިޓީ އާއި އެހެން ކަންކަން ސިއްރުކުރަން ނިންމި ނިންމުން ބަދަލުކޮށް އެކަންކަން ހާމަކުރަން ރައްޔިތުންގެ މަޖިލީހުގެ 241 ކޮމިޓީއިން ނިންމައިފިއެވެ. 

މިއަދު ފުރަތަމަ މިކަމާއި ގުޅިގެން ބޭއްވި 241 ކޮމިޓީގެ ބައްދަލުވުން ކުރިއަށް ގެންގޮސްފައިވަނީ ސިއްރުކޮށްގެންނެވެ. އެކޮމިޓީގައި ނިންމައިފައިވަނީ އެގެކޮޅުގެ ސެކިޔުރިޓީއާއި އެގެކޮޅުގައި ތިބޭ މުވައްޒަފުންގެ ޢަދަދު ހާމަނުކުރުމަށެވެ.

މަޖިލީހުގެ 241 ކޮމިޓީގެ މިއަދުގެ ބައްދަލުވުން ފައްޓަވަމުން އެ މައްސަލަ ހުށަހަޅާފައިވާކަން ކޮމިޓީގެ މުގައްރިރު، އޭދަފުށި ދާއިރާގެ މެންބަރު އަހުމަދު ސަލީމް ވަނީ ވިދާޅުވެފައެވެ. އަދި ކޮމިޓީ ކުރިއަށް ގެންދާނީ ސިއްރުކޮށްގެންތޯ ނުވަތަ ނޫންތޯ އޭނާ ވަނީ ސުވާލުކުރައްވާފައެވެ.

އެއާއެކު ވެރިކަންކުރާ ޕީއެންސީގެ ޕާލިމެންޓްރީ ގްރޫޕުގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާޙު ވަނީ ބައްދަލުވުން ސިއްރުކުރަން ހުށަހަޅާފައެވެ. އެ ހުށަހެޅުމަށް މާމިގިލީ ދާއިރާގެ މެންބަރު ޤާސިމް އިބްރާހިމް ވަނީ ތާއީދުކުރައްވައިފައެވެ. އަދި މެމްބަރު ޤާސިމްގެ ތާއިދާއިއެކު ބައްދަލުވުން ވަނީ ސިއްރުކޮށްފައެވެ.

އެބައްދަލުވުމަށްފަހު ރައީސުލްޖުމްހޫރިއްޔާ ޑރ މުޙައްމަދު މުޢިއްޒު މުރައިދޫގޭގެ ކަންކަން ސިއްރުކުރަން ނިންމި ނިންމުން ބަދަލުކުރުމަށް އަންގަވައިފައެވެ. ރައީސް މުޢިއްޒުގެ އެއެންގެވުމާއި އެކު މަޖިލީހުގެ 241 ކޮމިޓީގެ އިތުރު ބައްދަލުވުމެއް މިއަދު ހަވީރު ވަނީ ބާއްވައިފައެވެ. އެބައްދަލުވުން ކުރިއަށް ގެންގޮސްފައިވަނީ ސިއްރުނުކޮށެވެ. 

އެ ކޮމެޓީގައި އިނގުރައިދޫ ދާއިރާގެ މެންބަރު އަދި ޕީއެންސީގެ ޕީޖީ ލީޑަރު އިބްރާހިމް ފަލާޙް ހުށަހެޅުއްވީ މުރައިދޫ ގޭގައި މަސައްކަތްކުރާ މުވައްޒަފުންގެ ވަނަަވަރާއި ޢަދަދާއި އަދި އެކަމަށް ހޭދަވާ ޢަދަދު ހާމަކުރުމަށެވެ. މެމްބަރު ފަލާޙުގެ ހުށަހެޅުމަށް ކޮމެޓީގައި ބައިވެރިވި މެންބަރުންގެ ތެރެއިން އެއް މެންބަރަކު ފިޔަވާ އެހެން ހުރިހާ މެންބަރުން ވަނީ ވޯޓުދެއްވައިފައެވެ. އަދި މިއަދު އެ މައްސަލައިގައި ކުރިން ނިންމި ނިންމުން ބާތިލްކުރަން ވެސް ހަވީރު ބޭއްވި ކޮމިޓީ ބައްދަލުވުމުގައި ވަނީ ފާސްކޮށްފައެވެ.   

ފަލާޙުގެ ހުށަހެޅުމާ ދެކޮޅަށް ވޯޓު ދެއްވި ހަމައެކަނި މެންބަރަކީ ހަނިމާދޫ ދާއިރާގެ މެންބަރު ޢަބްދުލް ޤަފޫރު މޫސާއެވެ.
އެ ކޮމެޓީގައި ވާހަކަ ދައްކަވަމުން  މެންބަރު ޢަބްދުލް ޤަފޫރު މޫސާ ވިދާޅުވީ މައްސަލައަށް ނިންމުމެއް ނިންމާފައިވަނިކޮށް އަލުން އެ މައްސަލަ ތާވަލްކޮށްގެން ނިންމުން ބަދަލު ނުކުރެވޭނެ ކަމަށެވެ. އަދި އެހެން ވިދާޅުވެ އޭނާ ވަނީ އެ ވޯޓް ނެގުމާ ދެކޮޅު ހައްދަވައިފަ އެވެ. ނަމަވެސް ކޮމެޓީގެ މުގައްރިރު އޭދަފުށީ ދާއިރާގެ މެންބަރު އަޙްމަދު ސަލީމް ވަނީ އެ ގޮތަށް ނިންމުން ނިންމޭނެ ކަމަށް ވިދާޅުވެފަ އެވެ. 

ރައްޔިތުންގެ މަޖިލީހުގެ މިހާރުގެެ ރައީސް ޢަބްދުއްރަޙީމް ޢަބްދުﷲ މުރައިދޫގެއަށް ބަދަލުވެޑައިގެންނެވީ އެ ގެ މަރާމާތުކުރުމަށް ފަހު 25 ޖުލައިގަ އެވެ. މަޖިލީހުގެ ރައީސްކަން ކުރައްވާ ބޭފުޅުންނަށް މުރައިދޫގެ ހަމަޖެއްސެވީ 2021 ވަނަ އަހަރު, ކުރީގެ ރައީސް މުހައްމަދު ނަޝީދު މަޖިލީސް ރައީސްކަމުގައި ހުންނެވިއިރު އެ މަނިކުފާނަށް ދިން ބޮމުގެ ހަމަލާއަށް ފަހު ޤާނޫނަށް ގެނައި އިސްލާހާ އެކުއެވެ. އެ އިސްލާހާއެކު ތިން ބާރުގެ ވެރިން ތިއްބެވުމަށް ރަސްމީ ގެކޮޅު ވަނީ ހަމަޖައްސަން ކަނޑައަޅާފައެވެ.