ރާއްޖޭގައި ވޭޕްކުރުން މަނާކުރުމާއި ވޭޕް އެތެރެކުރުން މަނާކުރަން ރައީސް މުޢިއްޒު ނިންމަވައިފި!

ރާއްޖޭގައި ވޭޕްކުރުމާއި ވޭޕްކުރަން ބޭނުންކުރާ ސާމާނު އެތެރެކުރުމާއި އިސްތިހާރުކުރުން މަނާކުރުމަށް ރައީސުލްޖުމްހޫރިއްޔާ ޑރ މުޙައްމަދު މުއިއްޒު ނިންމަވައިފިއެވެ.

ރައީސް މުޢިއްޒު މިކަން ހާމަކުރައްވައިފައިވަނީ އެމަނިކުފާނު އެކްސްގައި ކުރެއްވި ޕޯސްޓެއްގައެވެ.

އެމަނިކުފާނު ވިދާޅުވެފައިވަނީ ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެންބަރު 2024 އިން ފެށިގެން މަނާ ކުރުމަށާއި، ދިވެހިރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭ ބެހުން 15 ޑިސެންބަރު 2024 އިން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އެމަނިކުފާނު އަންގަވައިފައިވާނެ ކަމަށެވެ. 

ވޭޕް އާއި އީ ސިނގިރޭޓް ފަދަ ތަކެތި މަނާކުރުމަށް ރާއްޖޭގެ މެޑިކަލް އެސޯސިއޭޝަނުންނާއި ރާއްޖޭގެ ކުޅިވަރާއި ބެހޭ ޖަމިއްޔާތަކުން ވެސް ގޮވައިލައިފައިވެއެވެ. 

ވޭޕް ކުރުމުގެ އާދައަކީ ނޭވާލާ ނިޒާމުގެ ބަލިތައް، ހިތުގެ ބަލިތައް، ހަކުރު ބަލި އަދި ސްޓްރޯކް ފަދަ ގައިންގަޔަށް ނާރާ ބަލިތަކަށް އެންމެބޮޑަށް މަގުފަހިކުރުވާ އެއްސަބަބެވެ. 

ދުންފަތަކީ އެތައް ހާސް ކެމިކަލް މާއްދާ އާއި 250 ވިހަ އެކުލެވޭ އެއްޗެކެވެ. އޭގައި ހިމެނޭ މާއްދާތަކުގެ ތެރެއިން 70 މާއްދާއިން ކެންސަރަށް މަގުފަހިވާކަން ދިރާސާތަކުން ދައްކައެވެ.

ޕުއްޕާމެއަށް ޖެހޭ ކެންސަރު ބަލީގެ 85 އިންސައްތަ ސަބަބަކީ ދުންފަތުގެ ސީދާ ދުން ކަމަށްވާއިރު، އަހަރަކު 8 މިލިއަން މީހުން ދުންފަތުގެ އިސްތިއުމާލު ކުރުމުގެ ސަބަބުން އެކި ބަލިތަކުގައި މަރުވެއެވެ.

މީގެ ތެރެއިން 1.3 މިލިއަން މީހުންނަކީ ދުންފަތުގެ ނުސީދާ ދުމުން ދުނިޔެ ދޫކުރަންޖެހޭ މީހުންނެވެ. 

ވޭޕް ބޭނުންކުރުން ދުނިޔޭގެ 34 ޤައުމެއްގައި މަނާކޮށްފައިވެއެވެ.