ދުޅަހެޔޮ ޤައުމެއް ބިނާކުރުމަށް ހަރުދަނާ ފިޔަވަޅެއް: ރައީސް މުޢިއްޒު ދިވެހިރާއްޖޭގައި ވޭޕް މަނާކުރައްވައިފި

ޢާންމު ޞިއްޙަތު ރައްކާތެރިކުރުމަށް އަޅުއްވާ ފިޔަވަޅެއްގެ ގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ދިވެހިރާއްޖެއަށް ވޭޕް ޑިވައިސް އެތެރެކުރުމާއި ބޭނުންކުރުން މަނާކުރައްވާފައިވާކަން އިޢުލާންކުރައްވާފައެވެ. މި ގޮތުން، ނޮވެމްބަރު 15 އިން ފެށިގެން ވޭޕިންގ ޑިވައިސްތަކާއި އެތަކެތީގެ ބައިތައް ރާއްޖެއަށް އެތެރެކުރުން މަނާވާނެ ކަމަށާއި، ޑިސެމްބަރު 15 އިން ފެށިގެން އެ ޑިވައިސްތައް ގެންގުޅުމާއި، ވިއްކުމާއި، އިޝްތިހާރުކުރުން މުޅިން މަނާކުރެވޭނެ ކަމަށް ވިދާޅުވެފައިވެއެވެ. މި ހަރުދަނާ ނިންމެވުމަކީ ދިވެހި ރައްޔިތުންނާއި، ޚާއްޞަކޮށް ޒުވާނުންގެ ދުޅަހެޔޮކަން ރައްކާތެރިކުރުމުގެ މަޤްޞަދުގައި، ޞިއްޙީ ތަޖުރިބާކާރުންނާއި ޖަމްޢިއްޔާތަކުގެ ކަންބޮޑުވުންތަކަށް އިޖާބަދެއްވައި އަޅުއްވާފައިވާ ފިޔަވަޅެކެވެ.

ވޭޕިންގއާ ގުޅިގެން ކުރިމަތިވާ ޞިއްޙީ ނުރައްކާތަކުގެ ތެރޭގައި ފުއްޕާމެއަށް ލިބޭ ގެއްލުންތަކާއި، ކެންސަރުގެ ނުރައްކާ ހިމެނެއެވެ. ޚާއްޞަކޮށް 13 އަހަރާއި 15 އަހަރާ ދެމެދުގެ ކުދިންގެ މެދުގައި ވޭޕިންގ އިތުރުވަމުންދިއުމާ ގުޅިގެން ބެލެނިވެރިންނާއި ޞިއްޙީ އިސްވެރިން ވަނީ ކަންބޮޑުވުން ފާޅުކޮށްފައެވެ. ސަރުކާރުން މި އެޅުއްވި އަވަސް ފިޔަވަޅަކީ މި ކަންބޮޑުވުންތަކަށް ޙައްލެއް ހޯދައިދީ، ކުރިމަގުގެ ޖީލުތަކަށް ރައްކާތެރި މާޙައުލެއް ޤާއިމްކުރުމަށް ވެވަޑައިގެންފައިވާ ވަޢުދެއްގެ ތަންފީޛެކެވެ. އިމްޕޯޓް އެންޑް އެކްސްޕޯޓް ޤާނޫނާއި ދުންފަތް ކޮންޓްރޯލްކުރުމުގެ ޤާނޫނަށް އިޞްލާޙު ގެނައުމުން، ދިވެހިރާއްޖެއިން ދަނީ މި ގެއްލުންހުރި ޓްރެންޑް ހުއްޓުވުމަށް ފިޔަވަޅު އަޅާފައިވާ އެހެން ޤައުމުތަކާ އެއްހަމައަކުން ކުރިއަށެވެ.

ވޭޕް މަނާކުރުމުގެ ސަބަބުން ޢާންމު ޞިއްޙަތު ރައްކާތެރިކުރުމުގެ އިތުރުން، ފާއިތުވި އަހަރުތަކުގައި ބޮޑުވަމުން އައި މައްސަލައެއް ކަމުގައިވާ ވޭޕިންގ ޑިވައިސް މެދުވެރިކޮށް ޤާނޫނާ ޚިލާފަށް މަސްތުވާތަކެތި ބޭނުންކުރުމާއި ސްކޫލްތަކުގެ ދަރިވަރުންނަށް ވޭޕްގެ ގޮތުގައި މަސްތުވާތަކެތި ހުށައެޅޭ މައްސަލައަށް ވެސް ޙައްލެއް ލިބިގެންދާނެއެވެ. މިއީ މުޖުތަމަޢުގެ ދުޅަހެޔޮކަމަށް ނުރައްކާވާ އެހެނިހެން ގެއްލުންހުރި މާއްދާތަކާއި އުފެއްދުންތަކާ ދެކޮޅަށް ވެސް ހަރުދަނާ ނަމޫނާއެއް ކަނޑައެޅިގެންދާނެ ކަމެކެވެ. 

މި ނިންމެވުމަކީ ދިވެހިރާއްޖޭގެ ޞިއްޙީ ދާއިރާއަށާއި އިޖުތިމާޢީ ދުޅަހެޔޮކަމަށް ލިބިގެންދާނެ ފާހަގަކޮށްލެވޭ ކުރިއެރުމެކެވެ. ވޭޕިންގ މަނާކުރުމުގެ ސަބަބުން، ޒުވާނުންގެ މެދުގައި ނިކޯޓިން އެޑިކްޝަން މަދުވެ، ދިގު މުއްދަތުގައި ކުރިމަތިވެދާނެ ޞިއްޙީ މައްސަލަތައް ދުރުކުރެވިގެންދާނެއެވެ. މީގެ އިތުރުން، މި ފިޔަވަޅަކީ ދުންފަތުގެ އިސްތިޢުމާލުކުރުން މަދުކުރުމަށް ކުރެވޭ މަސައްކަތްތަކަށް ވެސް ބާރު ލިބިގެންދާނެ ކަމެކެވެ.

ސަރުކާރުގެ މި ނިންމެވުމާއެކު، ޞިއްޙަތަށް ގެއްލުންހުރި އާދަތަކުން ދުރުހެލިވުމުގެ މުހިންމުކަމާ ބެހޭ ގޮތުން ހޭލުންތެރިކަން އިތުރުކުރުމުގެ ޕްރޮގްރާމްތައް ހިންގުމަކީ މުހިންމު ކަމެކެވެ. އަދި ވޭޕިންގގެ ބަދަލުގައި ޒުވާނުންނަށް ހެޔޮ ބަދަލުތަކެއް ގެނެސްދޭނެ ހަރަކާތްތަކާއި ޕްރޮގްރާމްތައް ތަޢާރަފުކުރުމަކީ ވެސް މި ފިޔަވަޅުގެ ނަތީޖާ އިތުރަށް ފުރިހަމަވެގެންދާނެ ކަމެކެވެ.