ހުޅުމާލޭގައި ހިންގަމުންދިޔަ ސްޕާއެއް ބަލައި ފާސްކޮށް 7 މީހަކު ހައްޔަރުކޮށްފި!

ހުޅުމާލޭގައި ހިންގަމުންދިޔަ ސްޕާއެއް ބަލައި ފާސްކޮށް 7 މީހަކު ހައްޔަރުކޮށްފައިވާ ކަމަށް ދިވެހި ފުލުހުންގެ ޚިދުމަތުން ބުނެފިއެވެ.
ދިވެހި ފުލުހުން ބުނެފައިވަނީ ހުޅުމާލޭގައި ސްޕާއެއްގެ ގޮތުގައި ހިންގާ ތަނެއް ބަލައި ފާސްކޮށްފައިވަނީ ކޯޓު އަމުރެއްގެ ދަށުން ކަމަށެވެ.
އެ ތަނުގައި ހަށިވިއްކާ ކަމަށް ފުލުހުންގެ އިންޓެލިޖެންސަށް ލިބުނު މަޢުލޫމާތަކާ ގުޅިގެން ހިންގި މި އޮޕަރޭޝަނުގައި ހައްޔަރުކޮށްފައިވަނީ ދިވެހި ތިން އަންހެނުންނާއި ދިވެހި ފިރިހެނެއްގެ އިތުރުން ތައިލެންޑު ތިން އަންހެނުން ކަމަށް ފުލުހުން ވަނީ ބުނެފައެވެ.
މިމައްސަލާގައި ހައްޔަރުކޮށްފައިވާ 3 ދިވެހި އަންހެނުންނަކީ:-
•    ޝިއުނާ ހުސެއިން، 36 އަހަރު، ޒާމިޔާ/ ށ.ފުނަދޫ
•    ފާތިމަތު ސިއުނާ، 42 އަހަރު، ނޫބަހާރުގެ/ ށ.ފުނަދޫ
•    ޢާއިޝަތު ޢަބްދުއްރައްޒާޤް، 55 އަހަރު، ދަފްތަރު ނަމްބަރު ރސ 6810/ މާލެ ސިޓީ

މި މައްސަލައިގައި ދިވެހި ރައްޔިތެއްކަމުގައިވާ މުޙައްމަދު ޝަފީޢު (49 އަހަރު، ހުވަދުމާގެ / އދ. މަހިބަދޫ) ހައްޔަރުކުރެވިފައިވެއެވެ. މީގެ އިތުރުން، ތައިލެންޑުގެ ތިން އަންހެނުންވެސް މި މައްސަލައާ ގުޅިގެން  ވަނީ ހައްޔަރުކޮށްފައެވެ.
 
މި މައްސަލައާ ގުޅިގެން މި ހަތް މީހުންގެ ބަންދާމެދު ގޮތެއް ނިންމުމަށް ހުޅުމާލެ މެޖިސްޓްރޭޓް ކޯޓަށް ހާޒިރު ކުރުމުން ތައިލެންޑު ތިން އަންހެނުން 10 ދުވަހަށް ދިވެހި ތިން އަންހެނުން ހަތް ދުވަހަށް އަދި ފިރިހެން މީހާ ފަސް ދުވަހަށް ބަންދުކުރުމަށް ވަނީ އަމުރުކޮށްފައެވެ.
 
މި މައްސަލަ ފުލުހުން ދަނީ ތަޙުޤީޤު ކުރަމުންނެވެ.