ސިނގިރޭޓަށް ވުރެ ވޭޕް ރައްކާތެރިކަމަށް ބުނާ ވާހަކަ އެޗްޕީއޭ އިން ދޮގުކޮށްފި!

ސިނގިރޭޓަށް ވުރެ ވޭޕް ރައްކާތެރިކަމަށް ބުނާ ވާހަކަ ހެލްތް ޕްރެޓެކްޝަން އޮތޯރިޓީ(އެޗްޕީއޭ) އިން ދޮގުކޮށްފިއެވެ.

އެޗްޕީއޭ އިން އެއޮތޯރިޓީގެ ރަސްމީ އެކްސް އެކައުންޓުގައި ކޮށްފައިވާ ޕޯސްޓެއްގައި ބުނެފައިވަނީ ދުންފަތުގެ ބާވަތްތަކުގެ ތެރޭގައި ވޭޕްވެސް ހިމެނޭ ކަމަށެވެ.

ޝީޝާ، ދުންފަތް، ހީޓެޑް ޓޮބޭކޯ، ވޭޕް އަދި އީ-ސިނގިރޭޓްގައި ވެސް ނިކޮޓިން ހިމެނޭކަމަށެވެ. އަދި ނިކޮޓިން އަކީ ދުންފަތުގެ ބާވަތްތަކުގައި ހިމެނޭ ދެވިހިފާ އެއްޗެއް ކަމަށްވެސް އެޗްޕީއޭ އިން ބުނެފައިވެއެވެ.

މިބާވަތަތައް ބޭނުން ކުރުމުން ނިކޮޓިންގެ އިތުރުން ނުރައްކާތެރި އެހެނިހެން ކެމިކަލްތަކަށް ހުށައެޅި ކެންސަރާއި މިފަދަ ބޮޑެތި އެހެން ބަލިތައް ޖެހޭ ކަމަށްވެސް އެޗްޕީއޭ އިން ބުނެފައިވެއެވެ.

https://twitter.com/HPA_MV/status/1846093762466087231

ރައީސް ޑރ މުޙައްމަދު މުޢިއްޒު އިއްޔެ ވަނީ ރާއްޖޭގައި ވޭޕްކުރުމާއި ރާއްޖެއަށް ވޭޕް އެތެރެކުރުން މަނާކުރުމަށް ނިންމަވައިފައިވާކަމަށް ވިދާޅުވެފައެވެ.

ރައީސް މުއިއްޒުގެ މިނިންމެވުމާއި ގުޅިގެން އެކި ފަރާތްތަކުން ސޯޝަލް މީޑިއާގެ މަންސަތަކުގައި ވޭޕް އަކީ ސިނގިރޭޓަށް ވުރެ ރައްކާތެރި އެއްޗެއް ކަމަށް ބުނެ ވެސް ވާހަކަ ދައްކަމުންދެއެވެ.

އަދި ރައީސް މުޢިއްޒުގެ ނިންމެވުމަށް ގިނަ ބަޔަކު ދަނީ ތާއީދު ކުރަމުންނެވެ.