އީސީ ގެ މެމްބަރުކަމަށް އައްޔަނުކުރާ ހަސީބު އާއި މެދު ޝަކުވާ ހުށައެޅުމަށް މަޖިލީހުން ހުޅުވާލައިފި!

އިލެކްޝަންސް ކޮމިޝަންގެ މެމްބަރުކަމަށް އައްޔަނުކުރުމަށް ނަން ހުށައަޅުއްވައިފައިވާ ޢަބްދުލް ހަސީބު އިސްމާޢީލް އާއި މެދު ޝަކުވާއެއް އޮތްނަަމަ ހުށައެޅުމަށް ރައްޔިތުންގެ މަޖިލީހުން ހުޅުވާލައިފިއެވެ. 

ރައްޔިތުންގެ މަޖިލީހުން މިއަދު ނެރުނު އިޢުލާނެއްގައި ބުނެފައިވަނީ، އިލެކްޝަން ކޮމިޝަންގެ މެމްބަރުކަމުގެ މުއްދަތު ހަމަވާތީ، އެ މަޤާމަށް އައްޔަން ކުރެއްވި ޢަބްދުލް ހަސީބް އިސްމާޢިލް އައްޔަންކުރެއްވުމާ ގުޅޭގޮތުން ރައީސުލްޖުމްހޫރިއްޔާ، ރައްޔިތުންގެ މަޖިލީހަށް ފޮނުއަވާފައިވާ މައްސަލަ ނިންމުމަށްޓަކައި، މިމަހުގެ 14 ވަނަ ދުވަހު ރައްޔިތުންގެ މަޖިލީހު 34 ވަނަ ޖަލްސާގައި މިނިވަން މުއައްސަސާތަކުގެ ކޮމިޓީއަށް ވަނީ ފޮނުވާފައި ކަމަށެވެ.

މަޖިލީހުގެ އިދާރާއިން ބުނީ، ޝަކުވާ ހުށަހަޅަން ޖެހޭނީ އެ ހުށަހަޅާ ފަރާތުގެ ފުރިހަމަ ނަމާއި ދާއިމީ އެޑްރެސް އަދި ގުޅޭނެ ފޯނު ނަންބަރު އެނގޭ ގޮތަށް ކަމަށެވެ.

އެ މަަޤާމަށް ހަސީބު އައްޔަންކުރަން މަޖިލީހަށް ނަން ފޮނުއްވާފައިވަނީ އިއްޔެއެވެ. އެގޮތުން ހަސީބުގެ ނަން ފޮނުއްވާފައިވަނީ  އީސީގެ ރައީސް ކަމުގައި މިހާރު ހުންނެވި ފުއާދު ތައުފީޤްގެ ދައުރު މި އަންނަ މަހުގެ 24 ގައި ހަމަވާތީއެވެ.

ހަސީބު އަކީ 2019 ވަނަ އަހަރު އިސްލާމީ ކަންތައްތަކާއި ބެހޭ ވުޒާރާގެ ޕާމަނަންޓް ސެކްރެޓަރީގެ މަޤާމު އަދާކުރައްވާފައެވެ. އޭގެ ފަހުން އޭނާ ސަސްޕެންޑްކުރުމަށް ފަހު މަޤާމުން ދުރުކުރީއެވެ.