އެމެރިކާއިން ސީރިއާގެ އިޤްތިޞާދީ ދަތިކުރުމުގެ ގިނަ ފިޔަވަޅުތަކެއް އުވާލައިފި

އެމެރިކާގެ ޚާރިޖީ ސިޔާސަތަށް މުހިންމު ބަދަލެއް ގެނެސް، އެ ޤައުމުގެ ރައީސް ޑޮނަލްޑް ޓްރަމްޕް ވަނީ ސީރިއާގެ މައްޗަށް ކުރިން އަޅާފައިވާ އިޤްތިޞާދީ ދަތިކުރުމުގެ ފިޔަވަޅުތަކުގެ ބޮޑު ބައެއް ރަސްމީކޮށް އުވާލުމުގެ  އަމުރެއްގައި ސޮއިކުރައްވާފައެވެ.  ހަނގުރާމައިގެ ސަބަބުން ވަޅުޖެހިފައިވާ ޤައުމަށް އައި މުހިންމު ސިޔާސީ ބަދަލުތަކަށް ފަހު، މިކަމަކީ ދެ ޤައުމުގެ ގުޅުމުގައި އާ ބާބެއް ފެށުނު ކަމުގެ ހެކިކޮށްދޭ ކަމެކެވެ.

އެމެރިކާގެ މީޑިއާ ރިޕޯޓްތައް ބުނާ ގޮތުގައި، ދަތިކުރުމުގެ ފިޔަވަޅުތައް އުފުލުމުގެ މަޤްޞަދަކީ ސީރިއާ އަލުން ދުނިޔޭގެ އިޤްތިޞާދީ ނިޒާމުގެ ތެރެއަށް ޝާމިލުވުމަށް އެހީތެރިވުމެވެ. ގިނަ އަދަދެއްގެ އިޤްތިޞާދީ ދަތިކުރުމުގެ ފިޔަވަޅުތައް އުފުލާފައިވީ ނަމަވެސް، ސީރިއާގެ ކުރީގެ ރައީސް ބައްޝާރުލް އަސަދާއި، އޭނާގެ ކުރީގެ ރެޖިމްގެ މެންބަރުންނާއި، ދާޢިޝް ޖަމާޢަތާއި، އީރާނާ ގުޅުންހުރި ޖަމާޢަތްތަކަށް އަމާޒުކޮށްފައިވާ ދަތިކުރުމުގެ ފިޔަވަޅުތައް ދެމިހުންނާނެއެވެ. މި ޖަމާޢަތްތަކަށް އަދިވެސް ޓެރަރިޒަމް އަދި އިންސާނީ ހައްޤުތަކަށް އަރައިގަތުމުގެ މައްސަލަތަކުގައި ސަމާލުކަން ދެމުންދެއެވެ.

މި ނިންމުން ނިންމާފައިވަނީ ރައީސް ޓްރަމްޕް މަދު ދުވަސްކޮޅެއް ކުރިން މެދުއިރުމައްޗަށް ކުރެއްވި ދަތުރުފުޅަށް ފަހުގައެވެ. މި ދަތުރުފުޅުގައި ޓްރަމްޕް ވަނީ ސިޔާސީ ބަދަލުތައް ގެންނަ ޤައުމުތަކާ ގުޅުން ރަނގަޅުކުރުމަށް ތައްޔާރުކަން ފާޅުކުރައްވާފައެވެ. ދަތިކުރުމުގެ ފިޔަވަޅުތައް އުފުލާފައި މިވަނީ، މިދިޔަ އަހަރުގެ ޑިސެމްބަރު މަހު ބައްޝާރުލް އަސަދު ވެރިކަމުން ބޭރުކުރެވުމަށް ފަހު، ސީރިއާގައި އާ ވަގުތީ ސަރުކާރެއް ޤާއިމުކުރެވިފައިވާ ދަނޑިވަޅެއްގައެވެ.

އެމެރިކާއިން ސީރިއާގެ މައްޗަށް ހަރުކަށި ދަތިކުރުމުގެ ފިޔަވަޅުތައް އަޅާފައިވަނީ އަސަދުގެ ވެރިކަމުގެ ދުވަސްވަރުގައެވެ. ފުރަތަމަ ފިޔަވަޅުތައް އަޅާފައިވަނީ 2004 ވަނަ އަހަރުގެ ސީރިއާ އެކައުންޓަބިލިޓީ އެކްޓުގެ ދަށުންނެވެ. އެއަށްފަހު، 2011 ވަނަ އަހަރު ސީރިއާގެ އެތެރޭގެ ހަނގުރާމަ ފެށި، އިންސާނީ ހައްޤުތަކަށް  އަރައިގަތުމުގެ ގިނަގުނަ ކަންކަންހިނގުމުން، އެ ފިޔަވަޅުތައް އިތުރަށް ވަރުގަދަ ކުރެވުނެވެ. ސީރިއާއަކީ ޓެރަރިޒަމަށް އެހީތެރިވާ ދައުލަތެއްގެ ގޮތުގައިވެސް ހަމަޖައްސާފައިވުމުގެ ސަބަބުން، ދުނިޔޭގެ މާލީ ނިޒާމާއި ވިޔަފާރީގެ ގުޅުންތަކުން އެ ޤައުމު ވަނީ ވަކިވެފައެވެ.

ރަސްމީ ބޭފުޅުން ވިދާޅުވާ ގޮތުގައި، ދަތިކުރުމުގެ  ފިޔަވަޅުތައް އުފުލުމުގެ މަޤްޞަދަކީ ހަނގުރާމައަށް ފަހު ސީރިއާގައި އިންސާނީ އެހީތެރިކަން ފޯރުކޮށްދިނުމާއި، އިޤްތިޞާދު އަލުން ހަމަ މަގަށް އެޅުވުމާއި، ބައިނަލްއަޤްވާމީ އިންވެސްޓްމަންޓް އިތުރުކުރުމެވެ. ނަމަވެސް، ޒިންމާދާރުކުރުވުމަކީ އަދިވެސް އިސްކަމެއް ކަމަށް އެބޭފުޅުން ވަނީ ބަޔާންކުރައްވާފައެވެ.

"އެމެރިކާ ހުކުމްގެ މަތީގައި ޤާއިމުވެފައި އޮންނާނެ. ހަނގުރާމައިގެ ޖަރީމާތަކާއި، ޓެރަރިޒަމާއި، އަނިޔާވެރިކަމަށް ޒިންމާދާރުވާ ފަރާތްތަކަށް ދަތިކުރުމުގެ ފިޔަވަޅުތައް ދެމިހުންނާނެ،" ވައިޓް ހައުސްގެ އިސް އޮފިޝަލަކު ބަޔާންކުރެއްވިއެވެ.

އަސަދު ވެރިކަމުން ދުރުކުރުމަށް ފަހު ވެރިކަމަށް އައި ސީރިއާގެ އާ ސަރުކާރަކީ ކުރީގެ ދަތިކުރުމުގެ ނިޒާމުގެ ދަށުގައިވާ ފަރާތެއް ނޫނެވެ. ނަމަވެސް، އިންސާނީ ހައްޤުތަކަށް އެއްވެސް އަރައިގަތުމެއް ނުވަތަ ޓެރަރިސްޓް ޖަމާޢަތްތަކާ ގުޅުން ބަދަހިކުރުމެއް ހިނގައިފިނަމަ، އަލުން ދަތިކުރުމުގެ ފިޔަވަޅުތައް އެޅޭނެ ކަމަށް އެމެރިކާގެ ކަމާބެހޭ ފަރާތްތަކުން ވަނީ ސާފުކޮށްދީފައެވެ.